السلام عليكم ورحمة الله وبركاته


من الاخر كده......عشان ماطولش عليكو


فات من عمرنا ترم كامل.......واكيد طبعا كل واحد مننا مر بنجارب مختلفة

واكتسب خبرات جديدة


واتعلم حاجات كتير


واستخلص دروس وعبر ومواعظ وحاجات كتيير جدا.......



لازم ها يكون ليك تجربة.......ولو مالقيتش يبقي عندك حاجة غلط في حياتك



والمطلوب من اعضاء الساحة الافاضل......التناصح فيما بيننا.....دون الخوض في تفاصيل التفاصيل....ولكن


يكفيك اجرا وثوابا كل نصيحة هاتنصحها لزمايلك



انا عملت الموضوع ده عشان سمعت قبل كده كلمة جميلة للامام الحسن البصري


يقول"رحم الله عبدا وقافا.....يقف عند كل اموره.....فن كانت لله مضي......وان كانت لغيره توقف"



يعني يا شباب......الترم ده سوق وانفض


عملت حاجة لدينك

ذاكرت كويس....ولا لا


هل كنت طالب من البيت للكلية ومن الكلية للبيت



يا ريت يا اخوانا من باب النصيحة فيما بيننا......ان كل واحد يفيد بخلاصة تجربته اخوانه التانيين لان الحياه اصلا عبارة عن مجموعة من الخبرات



وجزاكم الله خيرا

وعليكم السلام ورحمة الله وبركاته

انا اللى كان جاى عليا النهاردة اسال صحابى ذكرياتكوا ايه عن الترم ده

وكلهم كانوا متفقين ....

بس طبعا حضرتك تقصد ذكريات من نوع النصائح ....

طبعا احب انى اشارك فى الموضوع ده ولو بالقليل ... بس اعتقد ان ده هيبقى بعد فترة عشان يبقى الكلام منظم وله فايدة

بس انا هتكلم دلوقتى عن الكوجنزى بما انى لسه ملحقتش انسى

انا اتعلمت حاجة مهمة اوى وهو ان حضور المحاضرات مازال مهم ( رغم انى كنت مش بفهم من الدكاترة )

انا للاسف مكنتش بحضر المحاضرات لانى حسيت انها مضيعة للوقت

وفى امتحان الكوجنسى حسيت انى وادى والامتحان فى وادى تانى ..... واعتقد ان السبب المباشر

فى كده عدم حضور المحاضرات وانى ذاكرت المادة لوحدى وكمان بورق ملخص عشان ضيق الوقت

وده محصلش معايا السنة اللى فاتت لانى كنت بحضر محاضرات وحتى كنت بذاكر من اللى كنت بكتبه فى المحاضرة

فانا قلت بقى خلاص الترم الجاى لازم احضر المحاضرات حتى لو كانت بنفس الحال

ومش مهم اكتب الكلام ورا الدكاترة ( ماهو الواحد كان ياما يلحق يكتب او يلحق يفهم مينفعش الاتنين مع بعض ) واطلع باى حاجة من المحاضرات دى

وبالنسبة للشفوى ... وفى المادة دى بالذات من رايي ان الواحد ميتأخرش فيهاويدخل يمتحن باسرع وقت ممكن

حتى لو مش مذاكر .... لأن كده او كده مش بتفرق لأن الدكاترة بيبدأوا بالسهل الاول وبعدين مستوى الصعوبة بيزيد كل ما نتأخر

أنا لو دفعولى فلوس وقالولى احضر كوجنوزى مش هحضر

أنا شايف المشكلة مش ف الحضور لكن فى حاجات جت م الكتاب ومش موجودة ف المحاضرات بس انا اؤكد ان محاضرات الدرة بخير وأسرة أسماء بخير وعمار يا مصر


من الدروس المستفادة:

لازم الواحد ينام ولو ساعتين تلاتة يوم الامتحان وبلاش الواحد يروح صاحى من غير نوم (عن تجربة ف الميديكال)

لمّا نيجى للمواد اللى فيها حفظ لازم نحفظ الحاجة بفهم أولا وكمان نعلمها بعلامة معينة تثبتها ف الدماغ

ثالث حاجة هدوء الأعصاب مهمة جدا لانّ القلق مش مفيد خالص لكن ده مش معناه انّ الواحد يبقى بارد


دى كانت خواطرى وقلت أعرضها

ايه ده

يعنى فى حاجات ماتقالش فى المحاضرات وموجودة بس فى الكتاب وجت فى الامتحان ؟!!

دى سابقة فى تاريخ كلية الصيدلة

بس انا كده اطمنت بقى لان مفيش حاجة مش تتقال فى المحاضرة وتبقى علينا ( مش دى قاعدة برده ولا هنضطر نكسرها )

يمكن بقى الدكتور حب بس يختبر ذكاءنا وفهمنا

والحمد لله طلع عندى

وعلى فكرة تقريبا اللى حط الامتحان هو دكتور عبد الرحمن الشبراوى انا دخلتله فى الشفوى وكل اسئلته كانت عاملة زى اسئلة الامتحان كده

بس برده ما زلت اؤكد على اهمية حضور المحاضرات ( فى اى مادة ) :

1- الفهم السهل والسريع ( فى بعض الحالات مش كلها للاسف )

2- نقدر من المحاضرة نعرف الحاجات المهمة اللى الدكاترة بيركزوا عليها : يعنى من المحاضرة بقدر احس ان فى حاجات مهمة الدكاترة عملوا stress عليها وبحس انها مهمة وممكن تيجى فى الامتحان غير فى حالة عدم الحضور المنهج كله قدامى ومش عارفة ايه المهم ومش المهم

3- على الاقل مش اول مرة اسمع او اقرا الكلام

4 - الفلوس ( فى حالة الكوجنزى )

أيوا فى حاجات بس كانت قليلة

بجد محاضرات الدرة أسرة أسماء جميلة بجد

بالنسبة لحضور المحاضرات أنا مقتنع بيه باستثناء الكوجنوزى والامتداد بتاعها ( الفايتو)

والباقى لسه هشوف بس شكلى هبقى أحضر حاجات كتير ان شاء الله ف الترم التانى

ياااااااااااااااااااااااااااااااااااااااااااااه
أول ترم في أول سنة كلية
حكااااااااااااااااااااااااااااية
بالنسبة للدراسة زفت طبعا عملنا اللي ما يتعملش
ضيعنا وقت كتير ومذاكرة كتير
أما بالنسبة للتهييص فاحنا عشنا حياتنا بالطول والعرض
بس بصراحة اتعلمنا الأدب لما خدنا على دماغنا في الامتحانات
يعني عيال طول الترم بنلعب كوتشينة وناكل كشري في الكلية
والدكاترة اللي رايح واللي جاي يقولنا انتو دفعة زفت
ودكتور جلال قالنا كلمة جامدة بصراحة(((((أنا ح اربيكوا)))))
بعد كل دة لازم طبعا نتصدم في الامتحانات

ايه دكتور جلال قالكوا كده؟؟

واضح انكم استفزتوه جدا

كيد طلع عينيكم لانه من ما حد يستفزه كان مطلع عينينا

المهم يا جماعة النصيحة اللي احب اقولها لكل الناس

امشي جنب الحيط و اسمع الظيط

بلاش تندمج اوي مع الاسر لو كنت ناوي تجيب تقدير

اصعب حاجة انك توفق بين الاتنين

ليه؟؟؟

لان الواحد عشان يجيب تقدير لازم يبقى على اعصابه معظم الوقت"يعني سيمباثاوي"

اما شغل الاسر فبيحتاج مزاج و روقان يعني "بارا سيمباثاوي"

صعب انك تكون الاتنين في نفس الوقت

السلام عليكم ورحمة الله وبركاته

يمكن أنا كنت أجدد عضو فى تانية حديث يعنى أخر واحد ألتحقت بالشباب الطيب داهوة

لأنى كنت محول

والله يا جماعة التيرم ده كان من أصعب التيرمات على كان مليان قلق وتفكير وخناقات

ده غير الصراعات النفسية والقرارات المتسرعة ده غير أن التيرم ده شهد تردد فى أتخاذ القرارات

لم أعهده من قبل فكنت دائما ما أتخذ القرار وأمضى فيه لا يثنينى عنه أحد لكن هذا التيرم شهد صعوبات فى أتخاذ القرارات

وتردد رهيب

يعنى كان تيرم صعب أوى بس كان أكثر التيرمات أستفادة وكان فيه وقفات كتير

يمكن النصيحة اللى أحب أوجهها لكل أخ وأخت أنه يقف مع نفسه ويراجعها ويشوف هو كان صح ولا غلط

ولو كان الطريق اللى هو ماشى فيه ده هو طريق الجنة ولا لا

وأحب أنصح برضه أنك أوعى تبعد عن الصحبة الطيبة أيا كانت

وأحب أوجه كلمة شكر لأخويا شقلبان والله أنى أحبك فى الله حبا لا تقدر سطور هذا المنتدى أن تتحمل معانيه أو أن تستوعب

عباراته والله يا جماعة الراجل ده وقف جنبى كتير أوى وهو عارف وأعتقد أنه تحمل منى كثير من الغرور والانحرافات الاخلاقية

التى فعلا تنم عن حب وأخوة شديدة وعميقة

ربنا يباركلك و يوفقك يارب

وأحب برضه أقول أنى سعيد جدا بوجودى هنا فى المنتدى

والله من خلاله عرفت خيرة شباب الكلية زى حديدى وعمار وعبد المنعم والسلفى وتيفا وغيرهم كتير الذين أعتز بمعرفتهم

وحبهم والله الذى هو ليس لشئ الا لله وفى الله


وأعتقد أن دخولى على المنتدى كان صعب وتقيل وزعل ناس كتير منى لكن والله التيرم ده زى ماقولت كان تيرم مصيرى ويتحدد فيه مستقبلى الذى هو بيد الله

اللهم أرزقنا الشهادة فى سبيلك بعد عمر طويل فى سبيلك

ومستنيكم فى حلقات التوأم

جزاكم الله خيرا علي مشاركاتكوا.......


بس ليا طلب.....


ياريت النصائح متبقاش دراسية بحتة(مفيش مانع برده تبقي دراسية)



وانا علي فكرة مش هاعلق علي حاجة دلوقتي الا لما تخلصوا



عشان صراحة كلام عمار يغيظ........وهارد عليه بعديين

سبحان الله!
أنا بردوا أول ما قريت الردود كنت ناويه أرد على كلام عمار

إنت منين جبت النظريه دى عندك دليل
أنا عندى دليل على العكس
يابنى معظم الأوائل إللى عندنا فى الدفعه هم من أعضاء أسر وأعضاء فعالين كمان
الرك على ترتيب الأولويات

بمعنى أن فى ناس غير قادره على أنها توفق بين دراستها وبين النشاط دول لازم يتنحوا جانباً لأن المهم فالأهم
ودول غالباً بيبقوا عدد ضئيل جداً
لأنك لو بصيت لنوعيه الطلبه فى الكليه عندنا هتلاقى معظمهم بينقسم إلى قسمين ، إما الطلبه إللى بيعرفوا يظبطوا نفسهم
ومعنى أنهم يظبطوا نفسهم مش لازم يكونوا بيجيبوا تقديرات عاليه، لأ
يظبطوا نفسهم على حسب ما هم عايزين،
يعنى فى ناس مسستمه نفسها على الجيد وناس مسستمها نفسها على الجيد جداً والناس دى حتى لو أنهم تفرغوا للمذاكره بردوا هيجيبوا نفي التقدير
ولو أنهم دخلوا فى نشاطات آخرى بردوا هيجيبوا نفس التقدير طبعاً ممكن الواحد يقل عن ما كان مخطط لكن مش بالدرجه إللى تخليه يترك النشاط م
ما تنساش أن الواحد بيستفيد من النشاط ده وإسأل مجرب

أما الناس التعبانيين إللى هم حتى مش بيقدروا يظبطوا نفسهم فدول كمان ممكن تقسمهم
يعنى منهم إللى كده كده مش نافع يبقى أحسن يتعلم حاجه غير الدراسه
ومنهم إللى لو توقف عن النشاط ، ممكن ده يحسن مستواه الدراسى

لكن ياريت ما تتهمش النشاط أنه سبب فى تضييع الوقت

أقولكوا بصراحه
المنتدى ده سبب فى تضييع الوقت

لالالالالالالالالالالالالالالالالالالالالا مين قال كدة انا ماظنش اني كنت حقدر اعيش في الكلية بين الكتب والمخاضرات والدش وبس بصراحة كلامك مع احترامي الشديد مش صح
وعندي دلائل كتيرة جدا:
اولا : بالنسبة ليا انا انا الحمدلله جايبة جيدجدا السنة اللي فاتت وانشاء الله نفسي اجيبها السنةدي بس ربنا يستر من الcognoooooooooooooosyالله يسامحهم

ثانيا: تعرف حد اسمه محمد عبدالله سنة رابعة على العموم لو مش عارفه اعرفك عليه وهو مقرر اسرة شباب مصر التاني على دفعته
ثالثا : زميل لينا اسمه باسم في سنة تالته وبرضة من الأوائل


مفيش علاقة ابدا بين التفوق والنشاط بالعكس النشاط بيدي حماس للمذاكرة لانك بتفضي فيه شحنة الكبت والضيق

بس بشرط:


وهو ان يكون النشاط منظم ومرتب وفي وقت مناسب وان يكون فيه تعاون يعني باختصار اختار الاسرة اللي تناسبك واللي تقدر مذاكرتك


وبالنسبة للموضوع نفسه انا التيرم دة اتعلمت درس مهم اوي: وهو ان احسن طريق لاكتساب خبرات الحياة هي انك تتعامل بحذر مع الناس لحد ماتعرف هم من اي نوع من البشر وانك لازم تعذر اي انسان قبل ماتبتدي تعاتبه
بصراحة يا شباب انا لسه متعرضة لموقف بجد حسيت فيه اني صغيرة اوي قدام نفسي وهو: ان في انسان كنت متعودة منه انه دايما موجود وعمر ماحد طلب منه حاجة واتأخر عنه لحد ماحصلتلي مشكله واحتجت فيها الانسان دة جدااااااااااااااااااااااا بس للاسف مالقيتوش وخصوصا اني كنت لوحدي فبصراحة زعلت منه جدا وشيلت في نفسي ولما عاتبته فؤجئت بيه هو اللي بيعاتبني وقالي: " بما اني على طول موجود وفجأة بعدت يبقى اكيد غصب عني واني لو كنت اقدر اكون موجود كنت بقيت" ووضحلي ايه اللي خلاه يبعد وبصراحة ساعتها زعلت من نفسي اوووووووووووووووووي
واتعلمت اني قبل ماعاتب اعذر واتأكد ان اللي قدامي فعلا يستاهل العتاب

اما بالنسبة للمذاكرة اظن ان اللي حط امتحان الcognosyهود. علي واننا كان لازم نحضر له حتى لو مافهمناش منه لان اكتر حاجة تستفز الكتور هي عدم حضور الطلبه يعني نحضر للدكنور اللي بيحط الامتحان عشان مايقلبش علينا
بس خلاص معلش طولت عليكم

انا كنت متوقع هجوم على الكلام ده

و خصوصا من شقلبان حبيبي

بس يا ريت يا جماعة تقروا الكلام كويس

انا قلت لو ناوي تجيب تقدير ما تندمجش اوي مع الاسر

واضح كلامي وللا لسة؟؟

اوضح

يعني انا ما قلتش قاعدة عامة ان اي شغل مع اي اسرة يؤدي الى انك تتأخر دراسيا

لا انا حددت ان "التقدير" يتطلب انك "ما تندمجش اوي"

اظن كده كل الكلام اللي اتقال ما يتعارضش مع كلامي

كمان انا قلت ان التوفيق بين الاتنين صعب مش مستحيل

عشان نتعلم نركز فى الكلام كويس

بس هو ده عيب الكلام المختصر فى المنتدى ...

ممكن يتفهم غلط ( وساعات ممكن ما يتفهمش اساسا )

كملوا يلا بقي


بس في صلب الموضوع



عشان مش عاوز اتخانق

بما انى مواقفى فى الترم ده كلها عبر والموضوع ده عبارة عن ذكريات فانا شايفة ان الافضل انى احكى مواقف كاملة هى للاسف هتطول بس ممكن تستخلصوا منها عبر كتييير اوى

انا عشت تجربة صعبة اوى فى موضوع السهر ... لانى كنت اول مرة اعملها ده حتى فى الاجازة مش بحب اسهر كده ...و السهر ده وحش اوى على فكرة انا مش بنصح به
بس هو حالات يبيقى مفيش بد منه ..... فى حالتى مثلا التخطيط وعدم تضييع الوقت كان ممكن يجنبنى انى اعمل كده بس خلاص الفاس وقعت فى الراس

اول يوم الميديكال ...الساعة 12 كنت لسه مخلصتش حاجات مهمة فى الفسيولوجى اما الهستولوجى والاناتومى كنت حاسة انى ناسياهم تماما
موقف زى ده مرعب جدا وانا تعبانة وعايزة انام بس الواحد لازم يتماسك على قد ما يقدر ويحتفظ باعصابه كويس اوى

اولا فى اى موقف ممكن احكيه هلاقى نفسي لازم الف حوالين نقطة معينة وهى ستر ربنا

انا طبعا مهما اكتب مش هقدر اعبرعن فضله عليا فى كل الامتحانات اللى فاتت دى

انا توكلت على الله ورميت حمولى عليه ودى كانت الحاجة الوحيدة اللى بتتحسسنى بالراحة وتدينى امل وتشد من ازرى
انا حسيت ان ربنا قريب اوى ,وفهمت اوى معنى الاية دى :

(((وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ )))

الاول خلصت اللى عليا فى الفسيولوجى وبعدين مسكت التانيين وقعدت اراجعهم بهدوووء كأن مش ورايا حاجة ( بحاول اطمن نفسى ومش ارعبها )
بس المشكلة انى كنت وانا ماسكة حاجة اقعد افكر فى اللى بعديها هلحق اخلصها ولا لأ ودى نقطة مش كويسة طبعا( دايرة الهموم اللى كان فى كلام عنها ) وكنت بحاول انسى....والمنبهات كل شوية طبعا
كنت خلصت كده على الساعة 4 تقريبا .... لسه قدامى وقت وفكرة انى انام دى صعبة موووت
وخصوصا ان ممكن تروح عليا صلاة الفجر لانى صعب اصحى بعد ساعتين وارجع انام تانى
قلت يلا نخش على اللى ذاكرته فى الفسيولوجى واراجعه تانى
طبعا ده كان طمع منى لان خلاص مخى مش قادر بس هعمل ايه يعنى هقعد العب اتارى ... بس خدوا بالكوا من ان الوقت كفى معايا وانا كنت متصورة انى مش هلحق

المهم مسكت الفسيولوجى بس مش كله .... راجعت على الحاجات اللى عارفة انى كروتها واسئلة امتحان السنة اللى فاتت راجعتها وجه منها سؤالين والحمد لله

وبعدين حان موعد صلاة الفجر وتجدد الامل بعد الصلاة والدعاء ....ونقلت الجدول بتاع عاشقة الورود وقعدت احفظه
ثم توكلت على الله ورحت الكلية وهناك مخبيش انى كنت لسه قلقانة وبالذات انى انام فى اللجنة ولا حاجة وخصوصا انى خالى حكالى مواقف من دى كتير
وكمان الفسيولوجى ده مشكلة لوحده لان فى حاجات فى وسط المنهج وعارفة انى مش مذاكراها كويس وملزمة بحالها كانت مش معايا ومش عارفة اذاكراها من الكتاب وخايفة ان ده كله ييجى فى الامتحان والسؤال فى الفسيولوجى عليه درجات كتير
وفى الامتحان حليت كويس فى الهستولوجى والاناتومى وبالنسبة للفسيولوجى .. حليت برده احسن من اللى كنت بحلم بيه فى الوقت العصيب وزيادة... وكنت حاسة اوى اوى اوى بفضل ربنا عليا وستره لأنى كنت متخيلة ان التعب هيخلينى مش اعرف افتكر حاجة خالص لكن ده بسبب فضل ربنا وحده
طبعا انا طولت اوى ... بس يارب يكون كلامى فيه افادة انا عن نفسى اتعلمت حاجات كتير

بالمناسبة انصح أى حد قبل كل امتحان لازم يبص على شكل الامتحان

يعنى أنا شخصيا مكنتش اعرف انّ الفسيولوجى هييجى 6 أسئلة وبس وعليهم 80
بس حصل خير والله ربنا وفقنى كتيييييير والواحد ما يستاهلش


أنا برضه موضوع السهر ده كان اول مرة ليا انّى أروح امتحان مش نايم وكنت يوميها بارد قوى وسقعان

بس اكتشفت انّ نوم ساعتين تلاتة حلوين قوى ( ده لو انت أصلا شبعان نوم ف الأيام اللى قبل الامتحان )


بالمناسبة حديدى ان شاء الله هيبقى يحكيلكو على طريقة الفوتو ريدنج اللى أنا مش مقتنع بيها

من اهم الحاجات يا اخواني اللي عرفت اهميتها خلال التيرم ده

1- التوفيق بين الوظيفة الدعوية والوظيفة الدراسية

2-اهمية العمل مع المجتمع واد ايه ده مهم

3-اد ايه الشعب المصري ده فيه بذرة خير وحبه لدينه ولاسلامه فوق الحدود

4-حب الاسلام عمل واجتهاد وتنظيم ....ليس مجرد عبادات روحية فقط

5-نجاحك علي قدر تحكمك في اعصابك

6-الاخوة في الله احساس عظيم صعب الكلمات تعبر عنه


7-لما اتشطبت في الانتخابات......ايماني بقضيتي زاد وتمسكي بيها فاق الحدود لاني حسيت بالظلم

8-هاكمل بعدين....ويالله عاوزين مزيد من العبر......واشكر اخونا توكسيك......واختنا اخت في الله علي النصائح

صراحه كلامك يا شقلبان منظم وجميل ، وواضح منه أنك مريت بتجارب خليتك تطلع بالنتايج إللى أنت ذكرتها،
لكن-فى رأيى-الأفضل أنك تحكى إللى أنت مريت به الأول وتخلى القارىء يستنتج الأستفاده وبعدها انت ممكن أنك تكتب إيه إللى أنت استفدته ،
عارف! كده هيكون أحسن كتير
بالظبط زى لو أنت عندك طفل وعايز تديله حاجه
أحسن تخليه يجتهد ولواجتهاد بسيط عشان يوصلها أكيد يكون أفضل من أنه ياخدها على الجاهز ، على الأقل الكلام الحلو إللى انت كاتبه مش يمر مرور الكرام دون تفكير وتمحيص وتدقيق و....(كفايا كده هو مش هيتعمل فيه دكتوراه) لا بجد صدقنى هيبقى أفضل

بس على فكره أنا حسيت أنك فعلاً استفدت كتير لأن كلامك واضح أنه مش من فراغ

على فكره يا شباب ويابنات ( أنا بكلم الجيل الجيد) براعم صيدله
أنتوا فى الأول هتحسوا أنكوا بتستفيدوا جامد أوى لأن كل حاجه بتكون جديده وأنا هنا بقصد الأستفاده من المعاملات إللى هى فى نظرى أهم بكتير من الحياه الدراسيه

أنت فى الكليه بتخلتط بمجموعه كبيره جداً من البشر على مختلف أنواعهم وطبيعاتهم البشريه
وأنصح كل واحد أنه مش يخلى علاقته مقتصره على أصحابه وبس لأ
أنا بنصح كل واحد وواحده أنه أما يشوف أى واحد زميله فى المدرج أو فى المسجد أنه يبدأ معاه حديث حتى ولو كانت كلمة كل سنه وانت طيب فى أيام العيد حتى لو أنك ما تعرفهوش ، بعد كده الناس هتألفك وأنت تألف الناس
كمان مش تكون علاقاتك متوسعه على نطاق أفقى فقط يعنى أنك تكون تعرف عدد كبير مجرد معرفه السلام عليكم
لأ
لازم تحاول توسع علاقاتك فى نطاق رأسى يعنى تحاول أنك تتحدث مع الأشخاص إللى أدامك أما تشوفها، لكن لازم تكون عارف إنت بتتكلم فى إيه لأنك لو فضلت طول ما أنت ماشى فى الكليه تكلم ده و ده من غير ما يكون الكلام له هدف يبقى أنت بتخسر وقت على الفاضى ، لازم ياإما تكون بتفيد حد أو بتستفيد من حد
وبكده تقدر تتعرف على عدد كبير وزى ما بيقولوا معرفة الناس كنوز
لكن حذار حذار من أن تقع فى الوجه الآخر للعمله ألا وهو مضيعة الوقت
وهو أنك أما تلاقى نفسك تعرف ناس كتير يؤدى ده إلى إلتزامك ناحيه عدد منهم أنك تقف معاهم فتره أطول أو أنك تتكلم معاهم فى التليفون مكالمات ممكن يضيع بها وقتك، أنا ليه بحذرك
لأن التوسع الرأسى فى العلاقات ممكن يشعر من هم أمامك أنك أصبحت صديق ويبدأوا فى الحكايات اليوميه والشكايا الحياتيه والهموم الشخصيه التى أنت فى غنىعنها
وهى معادله صعبه
ولكن يجب أن تكون أنت المتحكم فى أبعاد العلاقه حتى لا تتطور إلى مالا يحمد عقباه
وزى ما بيقولوا إللى أوله شرط أخره نور، يعنى لو من أول موقف حسيت إن إللى أدامك بيحاول يطور العلاقه معاك لأكتر مما كنت أنت محدد يبقى لازم تديله إنذار بطريقه لطيفه أو جافه على حسب نوع الشخصية إللى أدامك وبكده يبقى أنت حافظت على علاقه جميله كلها إفادات وإستفادات دون القرب بالدرجه التى تجعلك ترى مساوىء من هم أمامك
على فكره إللى نبهتنى إن الناس أما بتقربلهم أوى بتشوف مساؤيهم كانت ربه اليف والقلم
وشبهتلى الموضوع ده زى بالظبط لو صورنا واحد عن قرب أوى بتلاقى الصوره شكلها وحش لكن لو بعدنا شويه الصوره بتبقى أحلى


وكمان بنصحكوا أنكوا تتعرفوا على الدكاتره وتصاحبوهم ودايماً تروحوا تسلموا عليهم وتعرفوا إيه نواياهم ناحيه الأمتحانات وعموماً معرفه الدكاتره كلها فايده حتى لو هم مش كويسين على الأقل تبقى أنت واسطه لنفسك فى الشفوى


أما بقى عن الأستفاده إللى أنا أخدتها فعلاً الترم ده بالذات فكانت أيام الأنتخابات
بجد أنا أتعلمت منها ان الواحد لازم يثق فى نفسه وفى رأيه وأن محدش يهزه لأن فى ناس بتكسر المقاديف كمان اتعلمت ان الواحد لازم يتعلم صناعة القرار لأن فى مواقف حاسمه أنت بتتحط فيها ولازم تقرر
وفى حاجه شفتها وأشعرتنى بالأسى
وحاجه شفتها وفرحت قلبى
من أكتر الحاجات إللى حزنتنى-وبقول حزنتنى مش زعلتنى- إنى لقيت طلبه ما يعرفوش معنى الأمانه مش بيتجاهلوها لأ
هم فعلاً مش عارفين معناها وأما كنت أكلمهم وأحاول أصحى ضميرهم كانوا بيستغربوا كلامى أوى كأنى إنسانه من كوكب آخر
تخيلوا أما يبقى المراقبين فى اللجان هم نفسهم غير أهل للثقه ، عارفه أنكوا هتقولولى أن الدنيا مليانه، لكن أنا بتكلم عن طلبه فى كليات لسه عود أخضر مخرجش للدنيا ولسه الشر جواه ضعيف ، وده من أتفه المواقف إللى ممكن الواحد يتحط فيها وربنا يختبره ، يعنى هو الواحد هيستفيد إيه أما ينجح واحد صاحبه
فى مقابل إيه يضحى بإختبار بسيط من ربنا

أما عن الموقف إللى أما شفته فرحنى أوى فى نفس اليوم
هو منظرنا وأحنا الشباب من أسر مختلفه كلنا واقفين واقفة رجل واحد معترضين على شخط التيار ومستعدين أننا نساعد فى عمل الأنتخابات الحره، بجد منظر فرح قلبى ساعتها قلت فى نفسى إن الجيل ده فى قوه لو أجتمعوا لن يقف أمامهم شىء بإذن الله

يا جماعه أنا عايزه أقول حاجات تانيه كتير فى الدراسه وخارج الدراسه بس مش عايزه أطول عليكوا( بصراحه أنا إللى تعبت)

انا استفدت حاجة مهمة

الصديق ثم الصديق ثم الصديق

انتم ممكن تستغربوا لما اقولكم ان انا و مورتي السنة اللي فاتت تقريبا مكناش نعرف بعض الا بالاسم

اسلم عليه و اقوله ازيك يا عمار و هو يقولي ازيك يا حديدي

المهم انا كنت احتجتله في حاجة كدا

فجبت ايميله من على السايت (يعني السايت طلع ليه فايدة)

و بدات اتكلم معاه

و الحمد لله وجدت عنده ضالتي

و اكتشفت ان الواحد ممكن يكون قدامه ناس كتير كويسة و هو مش واخد باله و طبعا مورتي واحد منهم

و كمان مش ممكن انسى عبد المنعم

اللي كان بيفكرني دايما بغلطاتي و ينبهني اذا غلطت

و سبحان الله الطيور على اشكالها تقع

لما نكون ماشيين جنب بعض تحس ان في دولاب ماشي انا الضلفة اليمين و هو الضلفة الشمال

و كمان الى حد كبير جدا جدا جدا طباعنا متوافقة (ما عدا في الاكل لحسن هو فظيع)

تخيلوا لما تكون ماشي مع اتنين زي دول تتوقع انت يكون ايه شكلك و ايه نظامك

و لا انسى صاحب الموضوع

الاخ شقلبان حبيبي قلبي

بجد الانسان دا محترم جدا جدا جدا

و الواحد بيحس انه مرتاح و هو قاعد معاه

ربنا يخليهم ليا

و يرزقكم بصحبة صالحة

ضحكتنى بجد يا عم حديدى

بقى انت ضرفة يمين وأنا شمال وكمان فظيع ف الأكل

طب انا مش هتكلم عشان لو اتكلمت انت عارف..

بص ملكش دعوة بشعري علشان دا حالة استثنائية

و بعدين انت متغاظ علشان شعري ناعم

هههههههههههههههههههههههههه

اه لو شفتوا شعري

ممكن على فكرة اخليكم تشوفوه بس كل واحد و هو جاي يجيب معاه عربية اسعاف علشان يروح فيها

الاخت اجوان....

معاك حق انا فعلا مفصلتش المواقف.....وده لانها كتير جدا + ان تفصيلها ممكن يثير خلافات علي الساحة ووجع دماغ خصوصا موضوع الانتخابات ده

واوافقك الراي فعلا ان يوم الاعتراض علي الشطب عامة اي كان المشطوب كان يوم كرامة لكل طلبة صيدلة

وده يدل تماما علي الانفصال التام بين رغبة المسئولين ورغبة الشعوب والافراد وبيشكك برده في وجود هؤلاء المسئولين بارادة حرة....ولا اقصد الادارة طبعا.....لان اغلبهم ناس محترمي جدا....ما علينا

وانا ممكن الخص نصايحك في كذا نقطة

الثقة بالنفس

انا خلقناكم من ذكر وانثي وجعناكم شعوبا وقبائل لتعارفوا....

التوحد شعور جميل

كل علاقة ولها حدود علي حسب الهدف من العلاقة




اينشتين.....

صراحة انت قلت حاجة انا شايف انها من اهم الحاجات....الصديق

المرء علي دين خليله.......بجد والله الصحبة الصالحة.....والله......تغير مجري الحياة .....وجزاكم الله خيرا جميعا

امال فين بقيت الاعضاء مالهمش تجارب ولا نصايح ولا ايه.......ايه عقمت صيدلة عن ذوي التجارب؟؟؟

السلام عليكم
الحقيقة انا مش عارفة أقول ايه نظرآ لأحوالى الدراسية اللى كلكم عارفينها
بس ممكن نقول لازم نتجنب الاستهتار والاهمال
ولازم نفهم كل حاجة ده بيساعدنا اوووووووى وبيسهل علينا ويوفر لنا وقت
ونكون مذاكرين المنهج كله قبل الامتحان وبلاش الحاجات اللى بنشوفها لأول مرة قبل الامتحان
ونراجع بعد مانخلص مذاكرة أو على الأقل نعيد قراءة كل اللى ذاكرناه عشان نلم الموضوع قبل ماندخل الامتحان
واياكم والسهر
السهر ده أسوا حاجة فى الدنيا بجد
ولازم جدول
ولازم يكون فيه طموح وأمل دول بيخلوك فى أسوا حالاتك ترجع تقف على رجليك من جديد وتحاول تانى من غير يأس



ليا سؤال بقى

هى النصايح دى لمين بالظبط؟؟؟؟؟؟؟؟؟؟؟؟؟

انا طبعا موافقه علي كل الكلام اللي اتقال
انا مشكلتي الوحيده هيا السهر وعدم القدره علي تنظيم الوقت يعني اقول هاعد ازاكر الاقيني كل شويه اقوم وبالتالي بطر اسهر وده حاجه فعلا مدمره وللا سف ان الواحد بيتعود عليها وان شاء الله ناويه ابطلها في الترم التاني وربنا يعيني

حاجه كمان من سلبيات المزاكره ان الواحد يسيب حاجات في المنهج يبص عليها اول مره قبل الامتحان لان شئ طبيعي ان المعلومه مش بتثبت من اول مزاكره وحتي لو ثبتت يامها الواحد يسترجعها بصعوبه ياما يحس انه مشتت ومش عارف يخرجها كلها يبقي بيقطع يعني

تالت حاجه مهمه وده يمكن انا بالذات اللي هاموت نفسي عشان ابطلها ان انا لو عندي وقت زياده اعد اراجع واحل اسئله وفضلت مقتنعه بالنظام ده لغايه ماجيه وقت لقيت اصحابي اللي بيحلوا اسئله بيجيبوا اكتر مني مع ان العقليه واحده والمزاكره واحده
فحل الاسئله مهم جدا عشان تفهم نظام الامتحان والاسئله والمواضيع اللي بيحبها الدكاتره

معلش هاطول عليكوا بس اخر حاجه حضور المحاضرات مهم جدا حتي لو مكنتش بتزاكر من اول السنه لان عليالاقل بتبقي المعلومه عدت عليك وابسط حاجه لما بتبدا مزاكره بتكون عارف المنهج بيتكلم عن ايه ده غير انه بيوفرك فرصه تزاكر قبل ماالكتب تكون نزلت او قبل ماتتاكد من مصدر تزاكر منه

طبعا الكلام ده ليا في المقام الاول وكنت براجعه معاكو عشان افتكره
لاني محتاجاه فعلا الترم التاني لو كنت عايزه اجيب امتياز واترتب

علي فكره حصل غلط فوق انا كان قصدي اعد اراجع ومش بحل اسئله ولا ببص عليها عشان متستغربوش بس ايه اللي بتراجع وتحل ده وبعد كده تشتكي