ان شاء الله فى الموضوع ده سوف أقوم بنشر أى أعمال أدبية أقوم بتأليفها ...


وطبعا لو حصل وطلعت شعر ولا حاجة لازم أحطه فى سوق عكاظ حبيبى

أنا حاليا معنديش أى حاجة بس انّ شاء الله الانتاج قريب

نبدأ مع القصص القصيرة وكنت نشرت حوالى تلاتة فى سوق عكاظ

قصة : تشاهدون اليوم

فى يوم من الأيام الدافئة فى صيف القاهرة , جلس وجدى على السرير ممنيا نفسه بقضاء سهرة سعيدة بعد شراء الدش الذى طالما حلم بيه وتمناه.

وأخذ يقلب فى محطات الستالايت باحثا عن ضالته المنشودة وكانت بدايته مع قناة الجزيرة المنبر الاعلامى العربى الأول

وأثناء متابعته لقناه الجزيرة لم تخل الأخبار من مصر ولا من أحوالها ولا من مشاكلها , مصر عملت ومصر سوّت
- يووو هوا مفيش وراكو غير مصر النهاردة ولا ايه

وقرر وجدى أنّه يختار قناة تانية لليوم اللى بعده وللأسف الشديد وقع فى قناة روتانا سينيما
وهى قناة لمن لا يعرفها ( أحسنله ما يعرفهاش)

- استغفر الله العظيم , والله لنا مغمض عينى

اليوم اللى بعده اختار قناه دريم 2

كان وجدى محتار شويّة يلاقى برامج محترمة وهادفة جدا وشويّة تانى ....

اللى بعده وقع وجدى على قناه المنار الاخبارية

- ايه ده قناة رائعة والمذيعات محجبات والأخبار زى الفل ايه الحلاوة دى

وأثناء ما هوّا مندمج اكتشف وجدى اكتشاف مذهل انّها قناه شيعيّة!!!!


فى اليوم الخامس والأخير

وجدى : يا ولاد أنا داخل أنام وابقو صحونى على معاد سلاحف النينجا تصبحوا على خير
( تمت)

ده نثر أدبى

الصديق

الأصدقاء أنواع فمنهم الشجاع ومنهم الرعاع, فالصديق الحق هو من داست قدمه على خطاك , وشاقت عينه لرؤياك فتستشعر معه أنسة ,ولا تجد منه خسة

وصديق السوء من أصبح لك محبا وأمسى لك مسبا , فى الضيق غارب وفى المكروه هارب, لا يلقى للصداقة بالا وتأتيك شروره وبالا.

فاحرص كل الحرص على اجتباء الأوفياء واجتناب الخبثاء ,وليكن صديقك ممن يكسبك الورع, فالطيور على أشكالها تقع

من واقعنا المعاصر أنا هتخيل انّى رحت ماتش النهاردة ف الاستاد مع انى مرحتش

قصة : وهاتها م الشبكة

(انبعث صوت المعلق الكروى جهوريا من الراديو: أعزائى المشاهدين معادنا النهاردة مع ماتش مصر والمغرب فى تصفيات أفريقيا وانتو عارفين طبعا انّ الماتش ده مفيد لووز لمنتخبنا ولو كسبنا هيبقى فل قوى ...)

- لوز أيه ونيلة ايه واحنا من امتى بنكسب ف الماتشات المهمة دى

كانت المرة الأولى التى أذهب فيها لاستاد القاهرة وكان مشهدا مهيبا , مية ألف متفرج وسرحت مع نفسى لحظة وفكرت لو كل الشباب دول بينزلوا لصلاه الجماعة ده احنا نبقى

( وطبعا حضراتكو عارفين اننا النهاردة جايبن اللعيب الكبير بتاعنا ميدو , ميدو المصرى لا سحر ولا شعوذة , ميدو اللى لما اسمه بيتقال حراس المرمى بيحبوا على رجله عشان ميجيبش اجوان فيهم )

- يا راجل

( وكرة القدم بتتلعب من فريقين وكل فريق 11 لاعب والكسبان اللى بيقدر يحط الكورة فى الجون ونقوله هاتها م الشبكة , والخسران نقوله حقك علينا . ولو انتو قاعدين ف الاستاد هيبقى منتخب مصر على ايدك اليمين بفانلته الحمرا والشورت الأبيض والمغرب على ايدك الشمال بالتشيرت الأخضر والشورت الأبيض , وبتوع الفيفا كتر خيرهم زودولنا لعيب كمان عشان احنا الدولة المنظمة وهنلعب 12 )

- جررررررر....

المهم بدأ الماتش وكان أول عشر دقايق مذبحة , كل لعيب يخبط ف التانى ودماغه تجيب دم

والحكم الصراحة كان حكاية ونسى انّ معاه كروت صفرا وحمرا لغاية ما واحد م الجماهير بعتله رسالة ع الفودافون فى الشوط التانى

واستمر مسلسل حرق الدم ( مش ليّا طبعا ) مع ضياع حوالى 3 فرص مؤكدة لمصر الحبيبة

والكعادة انتهى الماتش صفر \ صفر وزيتنا فى دقيقنا ....

( أعزائى مستمعين شبكة الكباب والرياضة قدمنا لكم مبارة مصر والمغرب , ونعتذر عن ارتفاع الضغط بتاعكو وخيرها فى غيرها وانتو عارفين ان الماتش الجاى ف اللذيذ ده حتى كوت ديفوار مفيهاش لعيبة الا الواد الاسمرانى أبو شعر أسود .....)

- أاااه ه ه والله مارايح استاد تانى
( تمت )

حلوين اوى وفيهم ابداع

بارك الله فيك



مش الكلمة دى بتاعت space toon ؟

وبالنسبة للنثر بتاع الصديق ... فكرنى بنص اختيار الصديق اللى كنا بناخده بتاع ابن المقفع

بس جميل اوى ومبتكر وكلماته معبرة

و حلوة الحتة دى اوى :



اما بالنسبة لبتاع الماتش

بالمناسبة انا سمعت تعليق من المعلق فى التليفزيون .. بيقول والله اللعب حلو اوى وجامد ومفيش زيه

بس فاضل ان الكورة تخش فى الجون بس

بصراحة قعدت اضحك عليها

انا معرفش فى الكورة وازاى اللعب يبقى حلو فيها بس دايما المنتخب بتاعنا يعمل كده ...

وبيسموها حتى الفرص الضائعة



هو كان بيحصل كده فعلا

أيوا فى أول ربع ساعة اتنين دماغهم جابت دم ( بس دى بتحصل ف الكورة يعنى مش مصيبة قوى يعنى والاتنين نزلوا تانى عادى)


بالمناسبة أنا عدلتها , احرص كل الحرص على ( مش فى )

بالنسبة لسبيس توون

يعني انت عايز تحرق دمي

متفكرنيش

بس بجد انا اكتشفت اني كنت مصاحب انسان موهوب و انا مش واخد بالي (بلا خيبة)

بص انا مش معجب اوي بالقصص معلش يعني

انا عايز شعر

عايز ابداع

اعصابي كولونيا

يلا انا مستني

بالعكس دا انا فاتح الموضوع ده تقريبا للقصص


لانّ الابداعات الشعرية مكانها سوق عكاظ وبس

كويس ان انت قلتلي علشان مدخلش هنا تاني

أيوا متدخلش الا لما تحلق

بما أنكم عاوزين إبداع فأنا هكتبلكم قصيدة

أنكتبت فى لحظات يأس حولتها للحظات إنشكاح

المهم أعذرونى لأن مستوايا فى الشعر متواضع

بس أهو محاولة للإبداع يمكن تنجح

لماذا خلقنا.........؟

كان دائما يأتينى هذا السؤال

ولماذا كان فهو مازال

لماذا خلقنا..........؟

أخلقنا من أجل الطعام

أم خاقنا لكسب هذا المال

أم أنها أيام

نحياه ولا ندرى إلى أين المأل

أجيبونى لماذا خلقنا.......؟

أمن أجل أمجاد الرجال؟

أو النساء؟

لا يهم إن كانوا رجالا أو نساء

فالمهم هو السؤال

لما لا تردوا على السؤال؟

أعرفتم سرها؟

وتطمعون وحدكم فى جنة الرحمن


أم أنكم مثلى؟

لا تدرون أين هو الجواب

لماذا خلقنا.........؟

أمن أجل حلاوة السلطان

وما يصنع من بريق الانتصار

ثم لو كانت من أجل مال وجاه وسلطان

ولو كانت من أجل الطعام

فلم نتركها بعد أن نصبح فى أوج الانتصار

لماذا خلقنا..........؟

إذا لا إجابة على السؤال

وقد بدأتم فى العناد والجدال

ومنكم من مازال

لا يعرف مثلى أيننجد الاجابة على السؤال

أترون هؤلاء الرجال

لم يضحكون وهم على هذا الحال

لا يملكون مالا ولا جاه ولا سلطان

ولا يلبسون الا ما يوارى عورات الرجال

ولا يأكلون الا القليل من الطعام

أيها الرجال ....هل لنا بالسؤال؟

قالوا بلى وهل هذا سؤال!!!

هلموا قبل أن يدركنا الاوان

ويفوتكم القطار

فلا ينفع حينئذ ندم الرجال

قلنا سنسأل فالوقت حان

لم تضحكون وأنتم على هذا الحال؟

من الضعف والانكسار

من الذل والهوان

من الفقر وقلة الطعام

قالوا عرفنا سرها بفضل من الرحمن

قلنا أعرفتم سرها؟ونعم الرجال!!!!

وهل تعلمون لماذا خلقنا.........؟

أخلقنا من أجل المال والسلطان؟

فنحن لا نرى فيهم الا الذل والامتهان

قالوا أوهذا سؤال...؟

قلنا بالله هذا قلب السؤال

قالوا ما أسهله من سؤال

لقد خلقنا من أجل عبادة الرحمن

خلقنا من أجل عمران الارض صنعة المتعال

خلقنا خلائف النافع الضار

فقلنا وماذا تقولون فى المال والجاه والسلطان؟

قالوا بن أدم لا يملؤ عينه الا التراب

فلا طعم لمال فيه سخط العزيز الجبار

ولا معنى لسلطان يحكم بغير شريعة القرأن

ولو سألتم عن الطعام أو أى من غرائز الانسان

سنقول لكم فتن لا تنفع يوم الملك لله الواحد القهار

قلنا .........صدقتم أيها الجال

فهل مازال من وقت يجعلنا نركب فى القطار

قالوا نعم مازال

قلنا وهل ما معنا يكفى للصعود والانضمام

قالوا هذا قطار لا يعترف بجاه ولا مال ولا سلطان

فقلنا مرحى أيه الرجال

هلموا نلحق بالقطار

ولا تيأسوا فالوقت حان

وكيف نترك هذا القطار

بعد أن عرفنا

لماذا خلقنا.............

وعشان أختنا الكبيرة وردز لوفر ماتزعلش

هاحطها فى سوق عكظ برده

جميلة يا اسلام

بس انت كده هتعملى أزمة دبلوماسية

بصوا يا جدعان دلوقتى سوق عكاظ هوا المصدر الوحيد والنهائى لأى خاطرة او شعر أو حتى نثر

وانّ شاء الله الموضوع ده هيبقى للقصص

اللى عنده رواية حلوة يحطهالنا سواء نقد , فكاهة , ثقافة , أى حاجة

خلاص اتفقنا يلا ورونا الابداع

بالنسبة لاسلام خواطرك جميلة على فكرة بس أنا مشكلتى انّى مش بعرف أحكم عليها قوى لانّى بميل اكتر للشعر والحاجات الموزونة

بس الحاجة اللى عايز اقولهالك




مفيش اسم من أسماء الله الحسنى ثبت اسمه الضار , وخللى بالك انّ الأسماء اللى بيقولوها ف التليفزيون فيهم حاجات مثبتتش

ماشى يا عم توكسك هاتأكد وأبقى أظبطها

وبعدين هما مش 99 أسم

ماهو الضار ده من ال99

طيب لو هو مش يبقى الاسم ال99 فين

ويا عم أبقى اكتب شعر بس القصايد ديه بتاخد وقت فى كتابتها

وعايزه كمان واخد على قفاه من عنيا يا عم

بس بعدين بقى

ان شاء الله يجماعة أنا مستنى منكم مناقشات فى المواضيع بتاعة القصص دى

ودى قصة جديدة لو سمحتوا اقروها بعناية واسمع ردودكو

القصة دى مش قصتى بس ممكن تكون قصتك

قصة : كل سنة وانت ....

منذ وطأت قدماى كليتنا الجميلة ولا يمر يوم عليّا الا وأسمع كلمة : كل سنة وانت طيب يا دكتور

فى البداية كنت غشيم ومش فاهم حاجة لدرجة مرة من المرات رديت على العامل وقولتله بكل بلاهة : وانت طيب يا روح قلبى

ويوم فى يوم فهمت ان الكلمة دى غرضها دنىء وهوا انّك تحط ايدك وتطلع اى حاجة من جيبك الحلو

وكعادتى رفضت الاستسلام , وبالاستعانة بجهاز المخابرات بتاعى عرفت أصنف شخصيات العمال كلهم لتلت أنواع

النوع الأول : نوع صريح ومباشر تجده دوما فى الأماكن الحيويّة ( أبواب الشفوى , أبواب اللجان .... الخ ) ويقوم هذا النوع بقفل الباب واستقبالك بوشه السمح وسنانه المرعبة والنوع ده خطير ومفترس .

النوع التانى : نوع غير مباشر تلاقيه بين السلالم وخارج المبانى ويقوم هذا النوع باصطياد الأشخاص اللى بيتوسّم فيهم انّهم حلوا كويس ف الامتحانات, والنوع ده ممكن تنفضلوا

النوع التالت : النوع العفيف اللى مش بيمد ايده أو يجبرك انّك تدفعله حاجة وده للأسف أقل الأنواع فى كليتنا ( ولو شفتوه ابقوا ادفعوله)

بس وبعد تعب وتمحيص عملت كتاب خطير سميته :توفير الأموال فى التعامل مع العمّال

وحطيت صورة كل عامل ف الكليّة وتصنيفه وصفاته

وبعدين لقيت نفسى مشهور قوى( ولا المعيدين) والكتاب نزل زيروكس وبقى فى ايد كل طالب

ولكن تأتى الرياح بما لا يشتهى الفلاح

كانت النتيجة انّ الطلبة كلها دفعوا للنوعين الأول ( بالعافية) والثالث , أمّ النوع الثانى فكانت الخسائر الاقتصادية على ودنه.

وقامت رابطة النوع الثانى بعقد اجتماع سرى فى قسم السيوتكس وكان هذا الحديث:

عطوة : احنا جايين النهاردة قاتل يا مقتول لازم نعرف ايه اللى جرا ف الكلية الزبالة دى

أم محمد : على رأيك دا أنا كل ما دكتور يشوفنى يقوم باصص فى كتاب فى ايده وبعدين يسيبنى ويمشى ولا كأنّى واقفة .

سيكا ( أزكى واحد) : أيوه أيوه الكتاب ده هوّا السبب واللى مألفه دكتور اسمه toxic

عطوة : دا أنا لو شفته هشرب من دمّه

سرنجة : لا على ايه يا عطوة دا احنا ناس واصلة ما تيجو نديله استمارة 6

أم محمد : سيبوها عليّا أنا دنا عارفة كل الدكاترة , امّا خليتهولكوا يرجع ثانوية عامة مبقاش أنا أمّ محمد


كانت دى بداية نهاية حياتى الصيدلية , كان كل لما أخش امتحان شفوى يقولولى انت toxic طب اطلع برّا

وطبعا أصفار العملى والنظرى كانت بترن

وودعت كليّة صيدلة فى مشهد جنائزى مهيييييب, ورجعت بيتى وأديت سواق التاكسى خمسة جنيه

ورد عليّا : خمسة ايه بس يا باشا دا النهاردة الجمعة كل سنة وانت .....

- كفاية بقى حتى انت كمان
( تمت )

أسلوب حضرتك جميل أوى
بس آسفة أنا مش عاجبنى الموضوع نفسه أقصد موضوع القصة

مش قادر فيصت من كتر الضحك بس مش على القصة على حاجة تانية هبقى اقولك عليها بعدين

السلامو عليكم
جميلة القصة فعلا بتتناول المشكلة بشكل فنتزى

ليه بس ده موضوع مهم على فكرة

و مادام احنا دفعنا فلوس بالاجبار يبقى الفلوس اللى بياخدوها دى حرام

يعنى يجرا ايه لو العامل وقف وما لزقش فى وش الدكاترة واللى عايز يدفعله يدفع


وجزاك الله خير أخ فولاك

وأنا مستنى مناقشاتكم فى الموضوع ده و مواضيع القصص الجايّّة ( لو كان فى)

يعنى كل لما قصة تنزل ان شاء الله هتتناول موضوع معين يا ريت نناقشه سوى

روايات شيزوفرانيا:

مقدمة : شيزوفرانيا وباء قاتل , أصاب قطاع عريض من أمتنا الاسلامية وأعراضه: السرحان , اللامبالاه ,التنفيض , انعدام الدم

مضاعفاته: هزال وضعف عام وتفكك ف المفاصل وقد ينتهى بالشلل والوفاة

الحلقة الأولى :

- السلام عليكم ورحمة الله , السلام عليكم ورحمة الله

انتهى فتحى من أداء سنة العشاء بعد فراغه من صلاه العشاء, وبعد خروجه من المسجد :

- ياه دى الصلاه دى أحلى حاجة فى الدنيا , الواحد قلبه بيرفرف

تررررررن ( أغنية بصوت واحدة من ايّاهم ):

- أيوة يا لمعى عملت ايه

* متخافش يا باشا عملت كل اللى سيادتك قلته وزيادة

- والراجل بتاع المزاد خد كام

- عشر تلاف يا باشا

- ابن ال .... يلا المهم انّه رسّا المزاد علينا , ليك عندى الحلاوة خمس بكاوى يبو لمعة

* ربنا يخليك لينا يا باشا, دنتا اللى فيهم, دنتا الىى هو هو هو ...

- خلاص هزودك عظمة , قصدى باكو كمان

* الله يعمر بيتك , يا مأكلنا المال الحرام

وعاد فتحى لبيته ونام على السرير:

- فاكرة موضوع المزاد يمّ العيال

* ونا أقدر أنسى يا فتوح دنتا بتحلم بيه وانت نايم , طمنى ايه اللى حصل؟

- ميّة ميّة , مشورتك جابت لنا المزاد لحد عندنا

* شفت بقى يا فتوح عشان بس تبقى تمشى ورايا لولولولولولى

- خلاص يا ست انتى هتفضحينا , أنا عايز أنام تصبحى على خير , صحيح أوعى تنسى تصحينا على الفجر

( نهاية الحلقة الأولى )

الحلقة التانية

الأب وابنه وجهان لعملة واحدة , ينتميان لعائلة عريقة تسمى عيلة الطلياوى, ولكن ثمة اختلافات ....

-الأب : تعالى يبنى اعد فى ريعى

* الابن : حاضر يابا

- عامل ايه فى مذاكرتك يا حبيبى

* الحمد لله ماشى تمام يابا

- وعامل ايه فى حفظ القرأن

* تمام يابا

- بس أنت مش عاجبنى اليومين دول

* ليه يابا؟

- يعنى مقصر فى السنن وصلاه الفجر ساعات بتروح منّك

* عندك حق يابا , ان شاء الله أوعدك انّى هتغيّر

( هذا وقد أفاد مراسلنا فى الأراضى المحتلة أن ثلاثة فلسطينين قتلوا برصاص القوات الاسرائيليّة فى نابلس , وفى جنين قتل طفلين وأصيب خمسة أشخاص فى اشتباكات اندلعت عندما حاول الجيش الاسرائيلى اقتحام المخيّم .. ونوافيكم بالأخبار على رأس الساعة المقبلة )

* بابا هوا لغاية امتى الاحتلال ده هيستمر والأقصى مش عارفين نصلى فيه؟

- بص يا حبيبى , دلوقتى احنا مش كويسين وعايشين أخر حلاوة , احنا مالنا بقى ومالهم

* ازّاى يا بابا هما مش اللى هناك دول اخوتنا

- لا محدش قالى ان ليا اخوات هناك, أنا هوّا أخويا صبحى الوحيد اللى طلعت بيه م الدنيا
شوف يبنى ان كان ع الأقصى م الجوامع كتير حبكت يعنى , بص انتا بس لنفسك ومستقبلك وربنا يوفقك.

انتهى الحديث ودلف الأب الى غرفة النوم وأخرج من تحت السرير صورة لشخص يرتدى جلباب بنى ويمسك بعصا سوداء

- الله يرحمك يا جدو طلياوى

ثم أخرج من داخل الصورة ورقة مكتوب عليها بحروف بارزة أخر وصايا الطلياوى لأولاده
: يا نحلة لا تقرصينى ولا عسلك هيغرينى

( نهاية الحلقة التانية)

لأ جامدة اوي

لء بجد القصص روعه انا عجبتني جدا لاني اصلا بحب الاسلوب الساخر والمواضيع من حياتنا وده احلي حاجه
بالذات موضوع العمال ده انا طلعت عيني فيه ده غير ان الواحد لما يطلع فلوس يلاقيهم كلهم اتلموا علي الواحد وممكن منالاحراج الواحد يتطر
والرسوال صلي الله عليه وسلم قال فيما معاناه :مااخذ بسيف الحياء فهو حرام يعني لما الواحد يديهم يبقي بيساعدم علي الغلط
والغلط يكبر ويبقي عادي وهوا الطبيعي زي اي مشكله في حياتنا السلبيه بتاعتنا تحولها لمجرد شئ عادي ويبقي الصح هوا اللي بيتحارب
والموضوع التاني برضه مهم الازدواجيه في التصرف وان الواحد يفصل بين العباده وبين الحياه وده اكبر غلط وقع فيه بقيت الاديان قصروا الدين علي الصلاه وخلوا المعاملات يحكمها مصالحهم معلش طولت عليكوا بس كنت عايزه اعلق فعلا وممتاز يا toxic كمل الشغل عايزه اقرا حاجات كمان
وعايزين نشوف ابداعات تانيه من قراء كمان بس اعفوني انا عشان مليش في القصص بحب اتابعها بس

طب أرجو انّها تكون كويسة فعلا, ولو سمحتو عايز ارشادات اقتراحات , نقد , بتنجان أى حاجة





يارييييييت

بس ان شاء الله مش كل القصص هتبقى كده

يعنى احتمال أعمل كذا سلسلة خفيفة وتبقى الكتابة فيهم كلهم

ومش كل القصص برضه هيبقى ليها واقع فى حياتنا

معلش أنا كلامى غريب شوية لانّى أساسا مفيش حاجة مألفها واللى بييجى فى مخى بكتبه, يعنى لسه معرفش الخطوة الجاية ايه

بالمناسبة جتلنا رسالة من صديق الموضوع اينشتين بيطلب فيها كتابة قصص باللغة العربية وعدم الاستعانة بالعامية

ونرد عليه ونقوله ان قصص النقد الساخر العاميّة فيها بتبقى مناسبة اقرب للموضوع

وبنوعدك ان شاء الله فى أقرب فرصة تكون القصة باللغة العربية عندك

ع العموم جزاكم الله خير على ردودكم المشجعة

برافو يا toxic

استمر عشان نشوف فى الأيام الجاية كاتب ساخر جديد زى أحمد رجب ويوسف معاطى

وانا أؤيدك فى الكتابة بالعامية لأنها أنسب فى الأسلوب الساخر اللى بتكتب بيه من الفصحى

بالرغم ان فى اعمال من النوع ده باللغة العربية الفصحى واقرب مثال المقامة الحلوانية اللى خدناها فى ثانوى

عجبتنى اوى قصة العمال وعلى فكرة انا عملت زيك لمل كان حد بيقولى كل سنة وانتى طيبة يا دكتورة

كنت برد وانت طيب

فى الأول نتيجة للعبط (لأنى مش فاهمة المقصود بالكلمة)

أما دلوقتى بقول برده وأنت طيب

بس ده بقى استعباط

طول عمري باقول عليك موهووووووووووووووووب

حلوة القصص بجد

شوف انا رايي في الكتابة الساخرة هي ان اللغة الفصحى تبقى هي الاساسا و العامية تستخدمها في الحوار و في بعض الاوصاف

طبعا احب اقولك ان القصص دي قصص قصيرة ما ينفعش تبقى مبنية كلها على الحوار و لا يكون الحوار فيها اكتر من 5 في المية
عشان كده احب اني اسمي القصص بتاعتك "صور من الواقع"

ربنا يكرمكو بجد شرحتو صدرى بالردود بتاعتكو



أنا معملتش كده لان القصص دى مش قصصى



دا اللى هوا أنا ؟؟؟؟





جزاك الله خير على نصايحك يا مورتى وموافق على الاقتراح , بس المشكلة انّى مش عارف القصص هتبقى كلها حاجات كده ولا لأ

سلسلة جديدة قد تصيبك بالاحباط , وقد تصيبك بالشلل , وقد تصيبك أحيانا بالسعادة

صيدلى المستقبل

( مقدمة : صلاح صيدلى مصرى , خريج جامعة القاهرة ,التحق بالمخابرات العامة الصيدلية منذ عدّة سنوات , يجيد استعمال كافة الأسلحة من ضرب الحقن وحتى ضرب الشباشب , يجمع بين ذكاء هولمز وسرعة فانتوم ومهارة كابتن ماجد...)

تررررررررررررررن
* ألو
- عايزك فى مكتبى بسرعة يا صلاح . توت توت توت
* الجبان قفل فى وشى .

بعد تلت ساعات دخل صلاح مكتب القائد الأعلى داخل شركة فايزر ويبدو أن القائد اعتاد على التأخير فلم يعاتبه
- اتفضل أعد يا صلاح, احم احم خد اقرا الملف ده يا صلاح. يا علاء هاتلنا كوبايتين قصب

بعد قراءة مستفيضة

*هيا العصابة دى رجعت لنشاطها يا فندم

- أيوا يصلاح بس المرة دى مش عارفين نثبت التهمة عليهم

* الكلاب بيدمروا شبابنا بالهيروين

- ده الظاهر لينا وده اللى عرفناه من جاسوسنا فى المصنع بتاعهم , بس للأسف المصنع مترخص لانتاج سكر البودرة واجراءاته القانونيّة سليمة تماما ومعندناش دليل مادى

* خلاص ياباشا أنا فهمت أدينى مهلة اسبوعين

- اسبوعين ايه يصلاح انت رايح شهر عسل , يومين وتكون جايبلى خبرهم ,شباب المنطقة أدمن الهيروين بتاعهم وبقم ملقحين فى الشوارع يصلاح

* اللى تشوفه يا باشا , وأدى التحية الصيدلية وانصرف

وبدأ صلاح مهمته بمعاينة المكان بعد أن شرب كمية لا باس بها من الشاى الأخضر الذى يداوم عليه منذ نعومه أظفاره .

كانت الوجوه غير معروفة بالنسبة له الا أنه لاحظ توّرط عم مصيلحى بواب العمارة اللى جنبه فى الشغل معاهم

همس صلاح لنفسه : وقعتك مهببة يا مصيلحى

وبالاستعانة بقليل من الايثر استطاع صلاح أن يباغت مصيلحى ويفقده الوعى

فى قبو شركة فايزر حيث يتم استجواب المتهمين كان مصيلحى يرقد على الأرض وقد قيدت يداه باحكام وبدا صلاح أشبه برجل جستابو فى طريقه لاستجواب احد العملاء البريطانيين الخونة

بدأ مصيلحى يستعيد وعيه ليجد أمامه صلاح وقد بدت أمارات التوحش على وجهه

- انت فقت يا مصيلحى

* مين صلاح بيه كيفك وكيف مرتك وولدك...

- اخرس يا وغد وليك عين , بص يا مصيلحى الانكار مش هينفعك قولى ايه علاقتك بالعصابة بتاعة الهيروين

* هيروين يعنى ايه يصلاح بيه وعصابة ايه اللى بتجول عليها ؟

- خسارة يا مصيلحى انت كده جنيت على نفسك

وأخرج صلاح حقنة شرجية من جيبه وقام باعدادها

* تبجى ايه اللى فى يدك دى يصلاح بيه؟

- هتعرف حالا يا روحى

* أاااااااااااااااااه , هقول هقول , خلاص كفايااااا

- مكان م الأول , هاه أنا سامعك

* الحكاية وما فيها انّ مدير بتاع شركة كده مش فاكر اسمها طلب منى انّى اشتغل معاهم وأدانى عشر تلاف جنيه وجاللى أجيبله معلومات عن اللى بيحصل جوا

امتقع وجه صلاح
- شركة ايه يا مصيلحى

* اسمها كده فايبر , كايزر حاجة اكده

- فايزر ,,, يا دهوتىىى
بقى انتا الجاسوس بتاعنا يا خيبتك يصلاح ,وانتا يا راجل يا عرة مش تلبس لبس جاسوس محترم بدل الهباب اللى حاطه على جتتك ده

* الله يسامحك يصلاح بيه

أخذ صلاح يفكر تفكير عميق , لقد تلقى صفعة كبيرة وخانه الحدس الصيدلى الذى يتميّز به عن سائر أقرانه , ولكن خبرته جعلته يعيد تقييم الموقف ويعتصر مخه ...

- هيه .. وجدتها
* وجدت ايه يصلاح بيه

- الحل بسيط قوى يا مصيلحى بص تعرف بكرة تجيبلى عينة من الهيروين بتاعهم ده
* أيوا يصلاح بيه سهل قوى بكرة يكونو باذن الله عندك

فى المعاد المتفق عليه استلم صلاح العينة ثم أخرج من جيبه أنبوبة اختبار وهو يتمتم فى سره : يا لعبقريتك يا صلاح فينك يا أدهم يا صبرى تيجى تشوفنى ( كان صلاح دائما يعاير أدهم صبرى لأنّه بكالريوس صيدلة لكن ادهم معاهوش شهادة !!!)

اتبع صلاح تعليمات د. نظيرة صفحة سبعة : بامكانك يا سيدتى وضع ملعقة سكر بودرة مع قطرات كونك سلفوريك فى أنبوبة تجارب على لهب خفيف ....

- شايف اللى أنا شايفه يا مصيلحى

* أنا مش شايف حاجة خالص يا بيه

- تمام هوّا ده , عارف لو كان سكر كان ايه اللى حصل

* ايه يبيه؟

- كان اتحرق يا بجم

* يسلام على عبقرية سعادتك
- أمال يبنى انتا فاكرنا بنهرج , كده بقى معانا الدليل اللى هعرضه هلى مباحث الصيدلانيات نياههههه

فى اليوم التالى استقبل مدير فايزر صلاح بابتسامة عريضة

- تهانينا يصلاح انت فعلا عملة نادرة , قواتنا حاصرت المكان والمصنع اتقفل بالشمع الاحمر

* متشكر قوى يا فندم , بس كان ليّا طلب صغنون عند سيادتك
- قول يصلاح
* يعنى يشرفنى احم احم .. انّى اطلب ايد بنت سيادتك الأميرة رحاب

- رحاب مش فاضية سيبها تكمل دراستها , وبعدين مبقاش الا انتا من دون الرجالة اللى اجوزك بنتى
* طيب عن ازنك يا فندم

بعد خروجه التقط صلاح من جيبه منديلا وقام بمسح دموعه التى انسابت على وجنتيه ثم أكمل طريق العودة

(تمت)

السلامو عليكم
جمدة جدا
[quote] الجبان قفل فى وشى [/quote]

[/quote]وأخرج صلاح حقنة شرجية من جيبه وقام باعدادها[quote]

[/quote]اتبع صلاح تعليمات د. نظيرة صفحة سبعة : بامكانك يا سيدتى وضع ملعقة سكر بودرة مع قطرات كونك سلفوريك فى أنبوبة تجارب على لهب خفيف[quote]

قصة حزينة , وموضوعها خطير

قصة : زوج الى الأبد

- البقاء لله , ربنا يصبرك انتى وولادك

* متشكرة يا حجّة فاطمة , تعبناكى معانا

أغلقت هدى باب بيتها ثم مشت فى الردهة شاردة الذهن

ها هو زوجها الذى طالما أخلصت له خمسة عشر سنة عاشت خلالها معه أجمل سنوات عمرها قد انتقل للرفيق الأعلى

انتقل زوجها وتركها مع أبنائها الثلاثة فى بحر من الذكريات....... والعبرات

اقترب منها ابنها الأكبر أحمد ذو التسع سنوات
- ماما هوّا بابا راح فين

ضمت الأم ابنها اليها فى حنان وأخفت دموعها عنه
* بابا فى مشوار... ( تن تن)
روح افتح لخالك يا أحمد

فتح أحمد لخاله كمال , دلف كمال الى داخل البيت باحثا عن هدى

احتضن كمال أخته وقال مواسيا اياها:
البقاء لله , شدى حيلك واصبرى
* صابرة والله يكمال , لولا فضل ربنا عليا كان هيجرالى حاجة بس عينيا هيّا اللى مش قادرة تصبر

وأجهشت فى بكاء حار

ضمها كمال اليه أكثر حتى هدّأ من روعها
- شوفى يا هدى انا مستعد أسيب كل شغلى فى سويسرا واجى أعد معاكى

*ازاى بس يكمال أنا مرضالكش كده
- أمال الحل ايه , وذنب ولادك ايه فى كل ده

خيّم الصمت لمدة ثلاث دقائق
* شوف يكمال سيبنى أفكر يومين تلاتة وبعدين أقولك
- براحتك أنا همشى دلوقتى وأعدى عليكى بعدين , بس أوعى أشوفك متضايقة تانى

قاطعه صوت أحمد:
خالو هوا بابا راح فين؟
- بابا راح الجنة يا حبيبى
* أمال ماما زعلانة ليه

كاد كمال أن يبكى بدوره الا أنه أشاح بوجهه
* هبقى أقولك بعدين يا أحمد

انصرف كمال تاركا هدى فى حيرة من أمرها ماذا تفعل ؟, هل يضحى كمال بعمله لاسعادها ؟ , هل تكافح هى وحدها وتربى أبنائها الثلاثة ؟؟؟؟؟

( نكمل الحلقة الجاية)

ومرت الأيام , وفى مكالمة من مكالمات كمال لأخته

- هتتجوزى !!!

* أيوا يكمال أنا قلت حاجة غلط

- لا بس يعنى ....

* بس ايه يكمال أنا لا هعمل حاجة غلط ولا حرام

- طيب اللى تشوفيه يا هدى , بس مقولتليش مين

* ده جارنا اللى جنبنا , انت عارفه على فكرة

- أيوا راجل الله يكرمه , ربنا يسعدكم مع بعض

وفعلا تمّ الزواج , وكان الرجل نعم الزوج فقد رعا أبناءها وكفل لها حياة كريمة وعادت البسمة من جديد لترتسم على وجه هدى ...

لكن للأسف قليل من يعرف أن زوجها السابق كان لديه أختين كريمة ونظلى , وبعد أن عرفتا الخبر التقتا فى منزل الأخيرة

- شوفتى يا كريمة الوليّة الأرشانة

* شفت يختى الا ما عملتله أربعين وسكتنا , لكن تتجوز عليه بعد العمر ده ؟

- دى لما صدقت العدة خلصت , انتى خدتى بالك يوم ما مات المرحوم كانت عاملة ازاى؟

* على رأيك دى لا لطمت ولا شقت هدومها , ستات أخر زمن

- الله يرحمك يا عنتر يا جوزى يوم ما مت عملتلك جنازة تحلف بيها الناس كلها

* لا أنا أخويا ميتاكلش لحم ويترمى عضم أنا هوريها...

لم ترتسم البسمة طويلا على وجه هدى . فقد أحاطت بها مكائد كريمة ونظلى وصارت حياتها مع زوجها جحيم لا يطاق

ترى ماذا اقترفت هذه المرأة كى تجنى ثمار زواجها قطعا من الجمر... هل لأنها اختارت العفاف أم لانّها لم ترد أن تشغل الناس بهمومها؟

هل الزواج أصبح جريمة تعاقب عليها المراة ... هل من الوفاء ان تظل المراة بلا زواج فى زمان ينهش فيه القوى الضعيف ؟

أسئلة نتمنى ان نجد لها اجابة ( تمت)

مش عارف ليه عندي احساس انك بدأت تخش في دور الافلام و المسلسلات العربي؟؟؟

طب وفيها ايه؟؟؟؟؟؟
المشكلة اللى عرضها فعلآ تستحق المناقشة

مش فاهم يا مورتى

بجد لو أى حاجة معينة مش عجباك قولى

صدقنى أنا بستفيد من ملاحظاتكم قوى



ونا برضه شايف كده

انا باتكلم من الناحية الادبية

عموما ان امش باعترض و ده تعليقي انك تفكر في المواضيع المفيدة

يعني احنا كلنا عبارة عن ايه؟؟

شوية شباب اكبر واحد فينا عنده بتاع 23-24 سنة يعني اساسا ما دخلش دنيا

تروح حضرتك تفتح موضوع زي ده؟

هو ده اعتراضي

طب انا بقى عندى كلمة عايزة اقولها

انا عايزة اعرف انت ليه يا توكسيك بتقول رأيك الشخصى او استنتاجك فى موضوع القصة بشكل واضح وصريح

بتهيألى لما تخلى شخصيات واحداث القصة تتكلم عن نفسها وتعبر عن الرأى اللى عايز توصله للقارىء هيكون احسن وامتع

يعنى مثلا ليه كاتب الجملة دى:

ماذا اقترفت هذه المرأة كى تجنى ثمار زواجها قطعا من الجمر... هل لأنها اختارت العفاف أم لانّها لم ترد أن تشغل الناس بهمومها؟

هل الزواج أصبح جريمة تعاقب عليها المراة ... هل من الوفاء ان تظل المراة بلا زواج فى زمان ينهش فيه القوى الضعيف ؟

أسئلة نتمنى ان نجد لها اجابة ( تمت)

طب ما تخلى كل واحد فينا يقولها فى نقسه بعد ما يقرا قصتك انا شايفة ان كده هيكون احسن

مع العلم انا معرفش الكلام ده صح ولا غلط ادبيا

وانا بقولك تانى برافو لأن اسلوبك فعلا حلو

نصيحة غالية , ان شاء الله تفيدنى فى المواضيع القادمة

شكرا عليها

الترم بدأ وشكل الانتاج هيقل

قصة : مجمع التحرير

استيقظ أيمن من النوم وأدى تمارين الصباح ثم ارتدى ملابسه فى عجالة واستقل سيارته ال 128

كان فى طريقه لمجمع التحرير لاستخراج بعض الأوراق الخاصة بجواز السفر , ركن أيمن سيارته ودخل المجمع , وجد امامه يافطة:

(للمرور من فضلك ضع عملة معدنية , لو اردت شراء عملة معدنية تجدها من عند عم عطية بتاع الكشك)

ذهب أيمن للكشك : لو سمحت ادينى كوين
- واحد بس , ماتشترى اتنين
* لا كفاية واحد , ده موضوع سريع.
- على كيفك , بس انا حذرتك
* بكام الكوين
- خمسة جنيه

أخذ أيمن الكوين ووضعه فى المكاكينة فأصدرت أزيزا خافتا ثم انفتح الباب ودخل أيمن لداخل المجمع

( أمامك نقطة تفتيش احترس)

مر ايمن من البوابة الالكترونية , وكلما كان يمر كانت تصدر صفيرا مزعجا..
سألنى أحدهم : معاك حاجة بيضا, مطواة , سنجة...
- لأ بس أنا قلبى أبيض وزى الفل , يمكن عشان كده .هههه
بعدها وجد أيمن اثنين أمناء شرطة قاموا بتفتيشى ,ثم أشاروا له بالدخول ووجدت يافطة تانية:

( من فضلك اختر طريقك يمينا أو يسارا ثم أصعد للدور الأول)

اختار أيمن الجانب الأيمن وصعدت لأجد موظف شارد الذهن
- من تلات حروف وبنزرع فيها كوسة , مبعثرة , تبقى ايه يبو على ايه ايه...
* مصر !!!
- بيقولك مبعثرة , انت مبتفهمش
* طب هوا حد قالك على مصر انها مش مبعترة
- هايل صح يبنى , انت عبقرى
* الله يكرمك قولى بقى الورق ده أخلصه منين
- هيا فين
* هيا مين ؟
- الفلوس
* فلوس ايه؟
- طب بص , اطلع السابع هتلاقى كل اللى انتا عايزه

صعد ايمن للسابع ( على رجله طبعا)

( بعتة , من فضلك ادفع عشرة جنيه غرامة فورية والا سوف يتم حجزك)

- اهىء اهىء أنا ايه اللى جابنى هنا

التهمت الماكينة العشرة جنيه كوحش مفترس

( من فضلك اختار أحد الأدوار 3 أو 6)

نزل أيمن للدور الثالث ليجد موظفة منشغلة بطلاء اظافرها و بجانبها خمس ساندوتشات فول وطعمية
- لو سمحتى
* .....
- يا أنسة
* نعم
- لو سمحتى ممكن أعرف الورق ده أخلصه منين ؟
* انت راجل وقح , عايزنى أبوظ المونيكير عشان شو¡