التدريب الصيفى للطلبة مشكلة كبيرة ...والطالب بيروح الصيدلية وهو تايه ..ومش عارف يبدا منين...
ومفكر انه الموضوع عبارة عن كتاب يحفظه صم ..يومتحن فيه ..فى الاخر...
او مفكر ان فيه حد هيعلمه يبدا منين...بس للاسف محدش بيعلم حد حاجة
وانا شخصيا عانيت جداااااااااااااا فى بدياتى .وكنت واقف فى صيدلية ..فيها خمس اشخاص غيرى ..ومش عارف هما بيعماوا ايه..وبتحرج انى اسئلهم ..خاصة ان اغلبهم مش صيادلة...ههههه
الموضوع دة مهم جدا ...وعاوزين نناقشه مع بعض للوصول الى افضل خطوات يتعملها المتدرب عشان يبقى فاهم
وبخبرتى البسيطة حبيت اقول رايى..واقول بعض لخطوات اللى لازم المتدرب يعرفها عشان يفهم شغلته كويس

الخطوة الاولى: الشركات
لازم تعرف اولا كل الشركات المنتجة للادوية سواء كانت مصرية او عالمية..وتعرف كل مايتعلق بالشركة من شهرة ومكان وجودة صنع ..شكل العلبة اللمميز للشركة ..وتخصص الشركة فى انتاج مجموعة معينى من الدواء
الخطوة الثانية:
طبعا لازم تكون مزاكر فارماكولجى كويس جدااااااااا..ودى الحاجة الوحيدة اللى هتنفعك من الكلية دى. .بمعنى انك تقسم كل الادوية والمواد الفعالة زى منتا مزاكرها فى الفارما..وتعرف دواء واحد فقط مشهور للمادةالفعالة دى..وبعدين تبدا خطوة خطوة تعرف البدائل بتاعت المادة الفعالة دى
مثال: مجموعة المسكنات ..تعرفها كلها ...و مثال منها..الباراسيتامول...وتعرف مثلا دواء تجارى منها ..زى البارامول وبعدين تعرف البدائل بعد كدة...خطوة خطوة...طبعا تبعا للشركات اللى انت عرفتها مسبقا ومش هتلاقى صعوبة فى حفظها خاصة ان كل شركة ليها شكل معين للدوا ء واسم او extensionللاسم مخصص بها زى مثلا شركة ايبكو..هتلاقى اكثر الادوية فيها كلمهepico...او فاركو..هتلاقى اكثر الادوية فيها الامتداد فاركو..farcolin,farcosolvinوغيرها
الخطوة الثالثة
تحاول تحفظ اسعار الادوية..ومكانها فى رفوف الصيدلية...(دى طبعا تختلف من صيدلية لاخرى) ..وتحاول لما تتيجى فرصة انك ترص الدواء وترتبه فى الصدلية ..عشان تبقى فرصة انك تحفظ اماكنها ...وتعرف كمان ايه اكسسوارات الصيدلية ..وفين بنحط الادوية المخدرةمثلا..والقطرات فين...والادوية اللى لازم تتحط فى التلاجة,...الخ

الخطوة الرابعة
تتعلم تقرا الروشتات ..وتتعلم تفك شفرة خطوط الاطباء ...المكتوبة فى الروشتة ..وتعرف ايه اكثر الادوية اللى بتتصرف فى الروشتات ..وكمان هتلاقى دكتور بيصرف دواء بعينه دايما ..تعرفه بردة ..وطبعا الخطوة دى لازم تكون بعد الخطوة السابقة وكمان تعلم ازاى تقرا التحاليل الطبية ..وقدر تعرف منها المريض عنده ايه وتنصحه بايه..وطبعا دى لازم تكون مزاكر بيوكيمسترى كويسbiochemstry
الخطوة الخامسة
مرحلة الotcووصف العلاجات ..يعنى لو حد دخل عليك الصيدلية ..وعنده مرض معين ..تتعلم ازاى تصرفله الدواء المظبوط ...او تنصحه انه يروح للطبيب فى الحالات الخطرة زى السكر ..والضغط...وغيرهم والحمد لله هنا منتدى مسائل الصيدلية الاكلينيكة هيساعدنا فى دة ان شاء الله
الخطوة السادسة
هتبقى تاجر ............يعنى تتعلم ازاى تتعامل مع الزبون(قصدى المريض) وطبعا عاوزة communications skills
وتعرف ازاى تمشى الدواء اللى عندك كويس....وتبقى صيدلى زكى,..تشوف ايه اللى مش شغال وتشغله ...
الخطوة السابعة
تدخل فى مجال السوق الصيدلى ..وتعرف ايه متطلبات السوق ..وازاى تقدر تطلب طلبيات ادوية...والمصاريف بتاعتها..والمديونيات ..وامتى تطلب دواء وامتى متطلبش ...دى طبعا بتتيجى من الخبرة..ودى بردة محتاجة تاجر مش صيدلى

دى بعض النصائح بمقتضى خبرتى المحدودة..ارجو لو كان حد عنده اى استفسار او اقتراح معين ...او فكرة كويسة ..يتفضل يضيفها

ملاحظة انا اسمى ابراهيم





الموضوع كنت مناقشه سابقا فى منتديات عالم الصيادلة وحبيت اناقشه معاكم هنا لزيادة الخبرة

بص يا هيما باشا ........... ربنا يكرمك طبعا على الموضوع ده .....

بس أنت كده أخليت بنظام الساحة .............. لكن بما أنك ضيف وصيدلى كمان ............ هنرحب بموضوعك ونوليه إهتمام كبير


بس تفتكر التدريب فى صيدلية صعب أوى كده

ده أنا كنت فاكر أنى هاقعد أشرب شاى فى الصيدلية وأقرأ قرأن والعملية هاتمشى حلاوة يعنى ............


المهم أنا بإذن الله ناوى أنزل الاسبوع القادم ............ ونبقى نشوف الليلة ديه هتمشى أزاى..........

أنا نزلت أول الأمس
الصراحة لم أرتح مع الصيدلي اللي كان قاعد خصوصاً إنه صغير في السن
خبرته مش بطالة أيوة لكن...... مش عارفة
المهم إنها جايالي بواسطة لأنها تحت البيت و أنا كنت رافضاها لكن اللي توسط قاللي : وليه تبهدلي نفسك في صيدليات بعيدة؟!
قعدت ساعتين كانوا بالنسبة لي دهر ولم يكن فيها زبون يوحد الله ..
الحمد لله مارحتش تاني.
حالياً ربنا ييسر المفروض أنزل صيدلية تانية بس ادعولي ربنا يسهل لي أمرها.

عموماً دردشت مع الدكتور وطلعت بالآتي :
-الأدوية ترتب أبجديأ حسب نوعها وحسب دماغ الصيدلي - المضادات الحيوية مع بعضها ، الأقراص والكبسولات في ركن آخر ، المراهم ، أدوات التجميل ، ......
-حاول تحفظ ترتيب الأدوية وعود عينك على مكان الدواء خصوصاً الأدوية المنتشرة بكثرة ( زي بارامول )
-الروشتة غالباً مكتوبة بطلاسم وحروف غريبة ، حاول تفكها بقراءة أول حرف وآخر حرف من اسم الدواء مثلاً ، ثم توقع غرضه العلاجي من خلال تخصص الطبيب ( باطنة ، أسنان ، ... ) وهكذا.
ده مؤقتاً لغاية مانزل تاني.

السلام عليكم ورحمة الله وبركاته

موضوع قيم ومفيد جدا

جزى الله كاتبه عنا خير الجزاء وجعله في ميزان حسناته

أعتقد إننا نكمل في هذا الموضوع أخبار التدريب في الصيدليات
اللي بالفعل نزل واتدرب علي طول يقول ملاحظاته
واللي عنده نصايح ما يترددش أنه يفيد بيها إخوته

وأرجوا مطالعتنا بالمزيد من الخبرات

ربنا يكرمك يا قبس علي إهتمامك بنقل ملاحظاتك

وعليكم السلام ورحمة الله وبركاته


نسيت أقول حاجة مهمة جدا ............ أرجو من الاخت سنبلة فعلا أن تضم هذا الموضوع إلى قسمها الصيدلى

وأن توليه أهتمامها كذلك


الاخ الكريم ........... د هيما هل من الممكن لنا تغيير أسم الموضوع لكى يتلائم ونسق الساحة خاصة وأن حضرتك ترى كم نحرص على أن تكون الساحة منظمة ومنضبطة ............ أكيد من غير زعل ........... لأن المهم الفايدة العلمية .......


أرجو الرد بالقبول أو الرفض ......... وجزاكم الله خيرا ...........

السلام عليكم
اولا شكرا للجميع

ثانيا


انا اخليت ازاى ياباشا؟؟؟
ثانيا انا مش فاكر ان الموضوع صعب
يمكن كان بالنسبة لى كان صعب لانى كنت فى صيدلية اسمحلى باللفظ دة...عقيمة...
كل اللى واقفين فيها مش صيادلة
فكنت مش عارف اسالهم..ولا عارف اتعلم منهم
والحمد لله ربنا كرمنى واتعلمت بفضل الله دون مساعدة احد
عشان كدة كانت صععبة جدا عليا

على فكرة انا من المنصورة
عندكم فى القاهرة ممنوع وجود غير الصيادلة فقفط
لكن عندنا عادى جدا
صيادلة ...دبلوم..متفرقش...
كلهم واحد
والمشكلة الاكبر انهم كانوا خمسة فى الصيدلية
وكان لما زبون ييجى ..تلاقى الخمسة كانهم لاقوا لقية ..........

وبعدين انا بتعامل فى الموضوع مع ابسط عقل
مع واحد لسة ميعرفش يعنى ايه صيدلية اصلا
زييى فى بدايتى

كنت منتظر كلمة كويسة
مع انى مش محتاج كلمة الشكر ولا منتظرها

بس انا اللى بشكرك
ممكن تقولى ازاى اخليت بنظام المنتدى هنا؟؟؟





هو اسم الموضوع ماله؟؟؟؟؟؟؟؟؟؟؟

التدريب الصيفى فى الصيدليات

هى مش اسمها كدة بردة؟؟؟

لما تنزل الاسبوع الجاى يادكتور محمد ابقى قولنا الليلة مشيت معاك ازاى؟؟


شكرا لكم

اخيرا

محتاج بعض الافكار والمشاركات والخبرات من جميع الاعضاء هنا

لافادة الجميع

السلام عليكم ورحمة الله وبركاته

دي أهم شركات الأدوية الموجودة في مصر

شركة سيد CID) Chemical Industries Development )

شركة آمون ( AMOUN )

شركة سيديكو (SEDICO)

شركة النيل (EL-NILE)

شركة القاهرة (EL-Kahira)

شركة مصر (Misr)

شركة ممفيس (Memphis)

شركة الاسكندرية (Alexandria)

شركة أدكو ADCO ) Arab Drug Company)

شركة النصر (EI – Nasr)

شركة باكينج (Packing)

شركة الجمهورية (EL-Gomhouria)

شركة المصرية (EL -Masriya)

شركة سيبكو .SEPCO) South Egypt CO)

وللأسف مش كلهم ليهم مواقع علي الانترنت
فقط اللي لقيتلهم مواقع شغاله:
شركة آمون

شركة سيدكو

شركة القاهرة

السلام عليكم

شكرا جزيلا لكى دكتورة سنبلة

ان شاء الله موضوع الشركات دة

هيتخخص ليه موضوع مفرد

وطبعا منقدرش ننكر مجهوداتك

شكرا لكى

على الاضافة الجيدة

يلا ياشباب نحاول نشوف اراء الاخرين ونوصل لافضل حل

وعلى حسب افضل مشاركة سيتم تعديل الموضوع ...وذكر اسم صاحب افضل فكرة

وعليكم السلام



لم أفهم ‍‍‍‍‍‍‍‍‍!!!!!!!!

صاحب أفضل فكرة لإيه ؟؟؟

الأخ عبد الـظاهر لما كان يقول نعدل اسم الموضوع كان يقصد إننا ندرجه ضمن المشروع القائم حاليا في الساحه هنا"مشروع جيل الصحوة "
لكن إننا نكمل فيه ذكر الخبرات وأي شئ ممكن يفيد التدريب عادي جدا


أما عن موضوع الخبرات فبالتأكيد اللي يفيدوا في الكلام ده هم الناس الكبيرة --سنه رابعه--اللي بالفعل تدربوا من فترة
المشكلة إننا محتاجين مثل هذه الخبرات --لإن معظمنا سنه تانيه--


وأنا أضفت أسماء الشركات ولي إضافه أخري وهي منتجات كل شركة من الأدويه (المفروض إن هذا هو ما نحتاجه عشان نتدرب في صيدليه)على حسب ما ذكر في أول مشاركه --الخطوة الاولي--

السلام عليكم

الاخت سنبلة

صاحب افضل فكرة ..فى كيفية ترتيب الخطوات للتدريب فى الصيدليات
زى منا عامل

ممكن يكون واحد عنه راى احسن من راييى
وهيتعدل المشاركة ويضاف رايه

اما بالنسبة للاخ عبد الاهر

فعاوزينى اعدل الموضوع واخليه ايه؟؟؟؟

معلش اصلى مش بدخل هنا كتير
ومش عارف اخباركم

انا خلصت سنة رابعة الحمد لله
واكيد هنا ناس فى سنة رايعة

الشركات ....فكرة كويسة اننا نزاكر مع بعض الخطوات هنا

اوك كملى الخطوات وان هساعدك ان شاء الله

اهلا بيكم

وعليكم السلام ورحمة الله وبركاته

مشروع جيل الصحوة القائم حاليا هنا في الساحه من ضمن أقسامه القسم العلمي فكنا نريد أن يكون هذا الموضوع جزء من القسم العلمي

عموما سأكمل

الشركات اللي فاتت كانت أهم الشركات الموجوده في مصر لكن مش أهمها في الصيدليات
بمعنى إن الأدويه اللي بتكون في الصيدليه طبعا مش بتكون لشركات مصريه فقط وإنما لشركات عده

ومن ضمن الخطوات --المفروض إننا نعرف شركات الادويه والشكل المميز لكل شركه--
دي أهم الشركات ورموزها ومواقعها الخاصه بالانترنت

الشركات العالميه:


شركة merck


شركة Glaxo SmithKline


شركة apexpharma


شركة altana


شركةservier


شركة OXOID


شركة UNIDENT


شركة schering-plough


شركة SANDOZ


شرمة sanofi-aventis


شركة novartis


شركة Bristol Myer Squibb


شركة merz


إنتظرو المزيد بإذن الله

أهم الشركات المصرية:
شركة فاركو


شركة minapharm


شركة ALKAN

شركة سيديكو


شركة إيبيكو


شركةmepaco



شركة أدوية


شركة القاهرة


شركة EVA


شركة آمون

السلام عليكم

شكرا لكى دكتورة سنبلة على مشاركاتك
بالنسبة للشركات انا عندى اعتراض بسيط
اولا حضرتك ضفتى شركات دانماركية ..من غير متقصدى واحنا طبعا مقاطعينها زى شركة Leo
وشركة novonordisk
فياريت تحذفيهم
وع الاقل تعرفى منتجاتهم وتقاطعيها وتنشرى الاعلان دة ..وهو اصلا موجود على موقع
no4denmark.com
وانا هبقى اضيف مشاركة بالمنتجات الدانماركية او حضرتك تضيفيها
ثانيا:الموقع دةة مفيد جدا فيه بعض المعلومات عن الشركات على فكرة صاحب الموقع كان مشرف هنا
http://www.egypharmazone.com/companies/index.html
نقطة مهمة ياريت حضرتك تعدلى المشاركات بحيث تكون الشركات المصرية لوحدها والشركات العالمية لوحدها

طيب احنا عوزين دلوتى ...نزاكر شركة شركة ..ونشوف اشهر منتجاتها؟؟؟تقدرى تعملى كدة؟؟
نبدا بالشركات المصرية اولا......ونشوف اشهر منتجاتها وتخصصات كل شركة فى انتاج معين
يعنى مثلا شركة ادوية تخصصها الاول المتجات البيطرية وياتى فى المرتبة الثانية الادوية البشرية
شركة ايبيكو بتخخصص بشكل كبير فى المضادات الحيوية ...(طبعا بالنسبة للادوية اللى بتنجها ..المضادات الحيوية اكثر شىء)


على فكرة انا ملاحظة ان مفيش حد تانى ليه راى ولا حد مشارك ليه؟؟؟


كملى يادكتورة سنبلة
وانا هساعدك ان شاء الله

وعليكم السلام ورحمة الله وبركاته

جزاك الله خيرا علي تبصرتي بالخطأ الفادح وتم التحرير
لكن حقيقة أنا كتبت هذه المعلومات دون خبرة تدريب فأنا حتى الآن لم أاتدرب بعد ولكن جئت بتلك المعلومات عن طريق البحث --علي الانترنت او في صيدلية البيت المتواضعه او في اعلانات الادويه او حتي في index الادويه --
وبالفعل نحتاج إلي خبرة في هذا الموضوع


أما عن بقية الأعضاء فسيتم إبلاغهم

وبالنسبة لدراسة كل شركه علي حدى فأعتقد أنها فكرة رائعه سنستفيد منها جميعا بإذن الله

أقترح نبدأ بشركة إبيكو --على حد معلوماتي إنها شركة شهيرة جدا--وكذلك شركة سيديكو وعموما وجود مواقع خاصه بها علي الانترنت سيسهل العمليه بإذن المولى

على فكرة أنا متابع .............. بس المشكلة أنى لسه مانزلتش التدريب

وتقريبا ماعرفش كل الكلام ده ............ والشركات ماعرفش غير أسماء بس وأنا مش بحب أفتى فى حاجة ماعرفهاش

وتقريبا كده انا بعمل مفواضات مع كذا صيدلية علشان أتدرب فيها ......... لأنى للأسف أتأخرت شوية


لكن ان شاء الله هانزل قريبا وأبقى معاكم فى الصورة .............


وعلى فكرة يا هيما أحنا كلنا هنا تانية حديث ومافيش حد فى رابعة خالص يعنى هاتلاقينا كلنا عاوزين خبرتك أنت ..........


وجزاكم الله خيرا على المجهود ..............

وعلى فكرة برضه إيجى فارما زون ده تبع كليتنا ............ بس ماعرفش أن عبد الله كان مشرف هنا ....

السلام عليكم

اخوانى ..انا بردة خبرتى قليلة جدا

بس ادينا بنحاول لحد منلاقى حد خبرة يقدر يساعدنا

بالنسبة للشركات اولا قومى يادكتورة بتعديل المشاركات وجعل الشركات المصرية لوحدها والشركات العالمية لوحدها

بالنسبة للشركة اللى نبدا بيها اوك نبدا بشركة ايبكو
مع انها مش اشهر شركة ولا اكبر شركة وسيديكو بردة مش اكبر شركة
راييى ان اكبر شركة هى مجموعة شركات فاركووالعامرية
وافضل شركة مصرية للصيادلة كراتب ..هى الكان فارما
وانضف شركة هى امون
طبعا دول المصريين

بس ماشى نبدا بايبكو
دى باة مهمتك يادكتورة تبحثى فى الاندكس عن اشهر ادوية ايبكو ..والاسطوانة هتلاقى فيها صور لادوية
تقدر تحفظى منها نسخ وتنزليها

معلش مش هقدر اضيف معاكم مشاركات جيدة
لانى بردة عندى منتدى ومشغول فيه جداااااا
انا بس هبقى مجرد متابع ومشرف على ارائكم
اسمحولى

ومنتظر مشاركات الاخرين ..ولو حتى بكلمة قد تفيد الجميع

على فكرة حاولت اعدل اسم الموضوع منفعش

جزاك الله خيرا كثيرا يا د. هيما على فتحك لهذا الموضوع

وربنا يكرم كل اللى بيشارك فيه بافادة

محتاجين همتكوا

السلام عليكم ورحمة الله وبركاته
أولا أنا اسفه جدا علي التأخير

ثانيا
ال index اللس عندي حقيقة هو قديم لسنة 2003 وهو كتاب وليس CD
عموما انا نقلت منه اسماء ادوية شركة ايبكو لنكمل ما بدأناه بإذن الله
وها هي :
Aerolin
Allergex
Asmolin
Bronchophane
Camisan
Cetal
Cevital
Cloderm
Colospasmin
Covit
Dexamethasone.sodium phosphate
Diphen
Distocide
E-mox
Epicocillin
Epicogel
Epicophyllin
Epicosalt
Epilat
Epilat Retard
Epimag
Epirax
Epizolone Depol
Epirazole
Fer.sol
Flumox
Gastrofatt
Kapect
Lactulose
Laxofin
Minervat
Nostamine
Nostamine Eye drops
No-uric
Nystaform
Optical Eff
Picolax
Tanum Rosa
Tanum verde

السلام عليكم ورحمة الله وبركاته :

جزاكي الله كل خير اختي سنبله وجعله في ميزان حسناتك

السلام عليكم ورحمة الله وبركاته
مجهوداتكوا عظيمة وربنا يوفقكوا لانكم بتفيدونا فعلا
انا كنت عاوزة اسأل سؤال بس
انا فى اولى حديث هل مفروض اتدرب السنة دة ولا لا؟
جزاكم الله خيرا

وعليكم السلام ورحمة الله وبركاته


سبحان الله

انا كنت هفتح نفس الموضوع والله العظيم بس بعد كام يوم لما استقر على الصيدلية اللى هتدرب فيها


لكن طبعا موضوع عن موضوع يفرق

انا كنت هفتح موضوع عشان اسأل واقرفكم بقى باستفساراتى عن كل كبيرة وصغيرة

انتوا ماشاء الله كاتبين حاجات جميلة ( منورة ياسنبلتى )


عموما انا جاية لكم اكييييييد بس لما اشوف هتدرب فين


واحنا متابعين طبعا


استمروا



ربنا يكرمكم


جزاك الله خيرا دكتور هيما


جزاكى الله خيرا ياسنبلتى

كويس يا ولاد.............

السلام عليكم ورحمة الله وبركاته:

جزاكي الله خيرا اختي mero_pharma_ على سؤالك


انا كان نفسي اسال نفس السؤال ده ؟؟؟

الرجاء الافاده

وشكرا للجميع

ازيكم ياشباب

اتخرت عليكم كتير

معلش كنت مشغول

نكمل مع بعض ...

ومنتظر استفساراتكم

وشكرا للدكتورة سنبلة

انا لحد دلوقتي منزلتش اي صيدليه لاني فعلا مكنتش عارفه هاروح اعمل ايه وكونت خايفه عشان تجربه اولي بس باذن الله بعد توجيهاتكم انا ناويه انزل مع واحده صحبتي وربنا يكرمكوا علي الموضوع الرائع ده بس كونت عايزه استاذن هل ممكن اطبع الموضوع ده علي ورق واديه لاصحابي لان فيه ناس كتير اعرفها مبتدخلش نت

شوفي .. ولو إني ماليش في الطور ولا في الطحين
أنا موافقة تطبعي
بعد إذن الباقي طبعاً

وعليكم السلام ورحمة الله وبركاته

أولا بالنسبة لطباعة الموضوع فاعتقد ان ده من حق اي حد يدخل علي المنتدي

ثانيا زماااان كنا اتفقنا علي اننا ننزل اسماء اشهر الادويه لشركة معينه ثم الصور والشرح لكل دواء

دي الصور اللي عرفت اجيبها للادويه اللي ذكرتهم في المشاركة الفائته

Aerolin

Allergex

Asmolin

Bronchophane

Camisan

Cetal

Cevitil

Colospasmin

Covit

Distocide

E-mox

Epicocillin

Epicogel

Epicophyllin

Epilat

Epirazole


والبقية تأتي بإذن الله

بجد رائع يادكتورة سنبلة ...
إستمري جزاكي الله خيراً ...

طيب المفروض دلوقتي نجيب معلومات عن كل دواء من اللي فوق دول ؟

جزاك الله خيرا ياسنبله
بس احب اسالك انت بتجيبي الصور دي منين

يا جماعه الموضوع حلو جدا ومفيد

بس هو احنا لازم نعرف الشركات ومنتجاتهم من دلوقتى ولا ممكن من السنه الجايه؟؟؟؟؟؟؟؟؟؟؟

سؤال لدكتور ابراهيم:
انا طالعه تالته حديث
لازم اتدرب.....علما باننا لسه مادرسناشpharmacology ؟؟؟؟؟؟؟؟؟؟؟؟؟؟

وانا شرحه

برضه طالعة تالته حديث وما اتدربتش قبل كده يعنى ابيض يا ورد

التدريب الصيف ده هيبقى مفيد ولا ملوش لازمة بما اننا لسه مدرسناش المواد الفعالة فى الفارما

انا بقالى اسبوع بلف على الصيدليات عشان اتدرب وماحدش وافق كلهم مليانين

و بعدين انا متهيألى التدريب دا هيكون مهم و مفيد لكل الناس اللى فى صيدله مش مهم اخدت المادة الفعاله ولا لا
اهو تعرفلك اسم كام دوا بيعمل ايه و البديل بتاعو لو حد طلبو منك ولا حاجة ؟ . . . . .

وأنا كمان عايزة اتدرب ومش لاقية صيدلية أتدرب فيها

السلام عليكم ورحمة الله وبركاته أما بعد ، انا اول مرة اشارك فى الموضوع الرائع دة ولكن تلك هي اول مشاركة كتابية ولكن انا

فعلا استفدت جدا جدا من الموضوع دة لان دى اول سنة انزل اتدرب فيها في صيدلية وللعلم بالشي انا طالعة رابعة_ حديث_

كنت بدخل على مواقع الشركات المكتوبة وانقل اسماء اهم الادوية وروح الصيدلية اللى بدرب فيها ودور عليها لحد ماخلاص

بقيت عارفة معظم الادوية وشكل ادوية كل شركة منهم.

وجزاكم جميعا خيرا على هذا الموضوع واقدم اعتذارا لعدم مشاركتى هنا من زمااااااااااااااااان!!

لكل اخواتى ( رايحين تالتة حديث) ممكن اقول رايي عن نزول التدريب الصيفى بالرغم من انكوا ماخدوش فارما لسه..

انا اللى خلانى انزل السنة دى ومش السنة اللى فاتت هو انى سمعت انى المفروض اخد الفارما الاول وسمعت النصيحة ومنزلتش

ومنكرش فعلا ان الفارما سهلت عليا الموضوع جدااااااااااا حوالى بنسبة 90% ويمكن اكتر لان بالفارما محتاجتش افتح اى

علبة دوا الا نادر قوى علشان اعرف الدوا دة بستخدمه فى ايه لانى كنت بعرف من اسم المادة الفعالة المكتوبة على العلبة من برة الاستخدامات بتاعة الدوا المطلوب

ولكن برضه ليا زمايلي نزلوا تدريب قبل الفارما وبرضه منكرش انهم كانوا مميزين عن الباقي لانهم كانوا على علم بالادوية قبلنا

وكانوا بيبقوا واضحين قوى فى المحاضرات ( طبعا من اجابتهم على الدكاترة) لكن اظنهم مكنوش عارفين غير اسم دوا

واستخدامه كدة بالحفظ والتدوال مع الجمهور فى الصيدلية لكن اللى اخد فارما هتفرق معاه بجد.

طولت عليكوا بس كنت عايزة اوضح لكم الفرق بالنسبة لمادة الفارما وملخص وجهة نظري فى الموضوع دة :

لو حد منكم عنده فرصة انه يدرب في صيدلية كويسة ( شغالة حلو) ينزل ومفيش اي مشاكل واللى معندوش الفرصة دى ميقلقش

لانه هينزل ان شاء الله السنة الجاية وهيستوعب اسرع من اللى نزل قبله بسنة لانه هيكون اخد الفارما .

وجزاكم الله خيرا جميعا

طيب يا شباب .....

أهدوا شوية كده ومش تتلغبطوا .....

بصوا يا جماعة بالنسبة للصيدلية ..... :

1- لو جاتلك فرصة يا بتاع تالتة حديث أنزل طبعا .... صدقنى بتستفيد خصوصا لو كان الدكتور اللى بيقف معاك فى الشيفت صغير فى السن شوية .... صدقونى الفايدة حلوة والمرضى زى العسل

2- لو مش لاقى .... حاول دايما ومش تيأس .... تعرفوا أنا كاتب أيه على كشكول الخطط بتاعى : أنا مقتنع .... أنا أكافح من أجل ما أقتنع به .... أنا أفشل .... أنا أنجح ...

أنزل وجرب وأسأل الدكتور أحرجك وقالك ما فيش شوف غيره .... ماهو أنت لازم تتبهدل شوية .... أفشل أفشل ... عشان تنجح ...... وخلى بالك أنك ماتزعلش من الدكتور اللى مش بيرضى وتقول ده خنيق ... لا هو مش خنيق وهاتحسها لما تفتح صيدلية ويبقى ليك شغلك .... ده أنت هاتكعبلو الصيدلية وتفتح الأدوية كلها ....

3- لو مالقيتش السنة ديه .... مافيش مشاكل من بعض القرأت المتفحصة وأخذ فكرة عامة عن أهم الشركات وأهم دوا لكل شركة ...... لكن خلى ليك جزء معرفة صيدلى فى حياتك .... خد دورات ... علشان ماتقطعش بحجة الأجازة ...


وشدوا حيلكم يا شباب .... الصيدلة فى مصر بتنهار .... وديه مهمتك وجهادك فى هذا الوقت ... قولها وزعك فى كل اللى يقابلك ..... ويقولك الصيدلى بياع ... قولها بعلو صوتك الصيدلى مش بيااااااااااااااااع .... وخلى عندك ثقة فى نفسك وقدراتك ....... وأن أنت تقدر تهد الجبال وتملك الأرض وكلها بعون الله .... لكن لازم تتعب وتشقى وتتحرج .... أرمى نفسك فى معترك الحياة لكن ماتنساش .... كتاب الله فى أيدك الشمال .... والدوا فى أيديك اليمين ... ونداء ربنا فى المسجد .... أوعى تسمعوا وأنت فى الصيدلية وتكبر ... لأن صدقنى من غير الله عز وجل فى حياتك ... يبقى أنت بتتدمر وبتموت ببطئ شديد ..........................

وعذرا على الإطالة

جزاك الله خيرا د.عبد الظاهر

بجد ربنا يكرمك على الكلام الجميل ده


انا ان شاء الله نازلة تدريب فى صيدلية العزبى من الاسبوع اللى بعد الجاى

ربنا يستر

انا معرفش حاجة عن اى حاجة

يلا خير

جزانا وأياكم يا دكتورة ....

بس العزبى مرة واحدة ... ربنا يوفقك يا أختى .... وعادى أنك ماتكونيش عارفة حاجة فى أى حاجة ... ده الطبيعى يعنى


المهم أنا النهاردة قابلت الدكتور أحمد رامى أمين لجنة الشباب فى نقابة الصيادلة وقعدت أتكلمت معاه وقالى أنا موجود فى النقابة سبت وأتنين وأربع ... وقالى لو عاوز أى حاجة تعالالى ....

يعنى يا شبابا اللى عاوز حاجة بجد الناس ديه واصلة أوى ... لو عاوز تدرب روح النقابة وكلمه هو ما شاء الله راجل خدوم جدا .... لما كنا فى القافلة كان بيختملنا طلب الأدوية المجانية من الشركات .... ولو حد من الولاد عاوزنى أروح معاه ليه ... أنا تحت أمركم والله ....

وشدوا حيلكم يا شباب مصر ....

السلام عليكم

انا اسف جدا ليكم

اتاخرت عليكم كتيرررررررررر

بس والله كنت مشغول جدااااااااا
هشوف استفساراتكم وهرد عليها ان شاء الله

شكرا عل تثبيت الموضوع

انا اسف جدا ع التاخير
بالنسبة لحضرتك
انتى ىاولا تحفظى اسماء الشركات كلها
وتعرفيها كويس
انتى كان عندك مادة مفيدة فى تانية وهى الميكروبيولولجى
ودة من خلالها ممكن تحفظى كل المضادات الحيوة فى الصيدلية ..يبقى كدة خلصتى 30%من ادوية الصيدلية
ناقصك لما تدرسى الفارماكولجى هتكلمى الباقى ان شاء الله

ودة هيبقى كويس ليكى دلوتى لو خلصتى جزء المضادات الحيوية

الصور يادكتورة فى اسطوانة اسمها اطلس 2006

او كتاب اطلس للادوية 2006
بس الدكتورةسنبلة متهيالى مصوراها بالموبيل

لا يا دكتور احنا كنا فى تانية حديث

لسه هناخد الميكروبيولوجى السنه دى (تالته حديث ان شاء الله)

غريبة اوى
احنا خدناها فى تانية
ع العموم مفيش قدامك غير الصيدلانيات
اللى بتسموها عندكم ceutics
تقدروا تربطوا الاشكال الصيدلانية اللى درستوها ..باللى موجود فى الصيدلية؟؟؟

بمعنى انكم مثلا درسوا ان الكبسولات الSRطويلة المفعول ..تقدروا تشوفها على الطبيعة قدامك
والsuspension
وال solutions
creams
الى اخر ذلك
هتساعدكم اوى لو فهتوها ع الطبيعة .
.واى استفسار انا تحت امركم ..بس لو اقدر

جزاكم الله خيرا كلكم على الافادة

بس عندى طلب منكو ولكل اللى نزلوا تدريب فى الصيدلية

يا ريت يا ريت لو تقولوا التفاصيل المملة لاول تجربة ليكو يعنى من بداية ما قررتوا تتدربوا

واخترتوا الصيدلية اللى هتتدربوا فيها على اساس ايه ؟

واتفقتوا مع الدكتور فى الصيدلية ازاى ؟

وايه اول حاجة عملتوها لما بدأتوا التدريب ؟ ..

وهل مسموح انكوا تفتحوا علب الادوية وتقروا البامفليت ؟

يعنى كل حاجة من طقطق لسلامو عليكو

معلش اصل التفاصيل دى قالقانى اكتر من التدريب نفسه

اه انا برضو عندى نفس اسئله اختنا فى الله
وبالتفصيل الممل من اول ما فتحتوا باب الصيدليه وقلتوا السلام عليكم ......من فضلك يا دكتور انا عاوز اتدرب.............................................

اهلا بيكم
فاكرين اول يوم دخلتوا فيه الكلية؟؟وشايفين فيه بتوع سنة رابعة ..ناس كبار كدة وتحس انهم فاهمين كل حاجة .وانتى ياعينى داخلة مش عرفة اى حاجة وخايفة ..اول يوم ليكى فى الكلية باة
مرت الايام وبقيتى فى سنة تانية وتالتة حديث..وبكرة تبقوا فى رابعة ..وبتوع سنة اولى حديث ينظروا ليكم نفس النظرة اللى انتم نظرتوها لبتوع رابعة.............
عاوزكم تحسوا بالموقف دة ووتتعايشوا جواه
هتطلعاو بحاجة مهمة اوى

المـــــــــــــــمارســـــــــــــــــــــــــــــــــــة
اسئلة اهل الخبــــــــــــــــــــرة
الايـــــــــــــــــــــــــام
التعـــــــــــــــــود
معايــــــــــــشة الواقـــــــــــــــــــــــــــــع

بقيتى فاهمة نظام الكلية عامل ازاى..وبقيتى بتقولى لزمايلك اللى لسة داخلين الكلية يعملوا ايه وميعملوش ايه
دى باختصار اللى عاوز اوصله ليكم
ياريت يكون كلامى وصل

التدريب ممارسة من الدرجة الاولى
ولما تمر عليكى الايام هتحطى لنفسك قواعد ..تمشى عليها ..وهتبقى احسن من اللى انا عاملها بكتير
بالنسبة لموضوع الاتفاق مع صاحب الصيدلية ازاى ..دى حاجة بتدخل فيها الوسطات والمعارف والقرابة..والكلام دة
منتيش محتاجة تفتحى البامفليت من دلوتى
خليها بعدين عشان متشتيش نفسك
خلليكلى فى البسيط السهل


منتظر استفساراتكم

مشكورين اخواني و اخواتي علي هذا الموضوع
انا فعلا كنت قلقانة من الموضوع ده
و لحد دلوقتي مش لاقيه صيدلة اتدرب بها
و ميرسي علي الموضوع

ياجماعة الناس اللى مش لاقيين صيدليات

يتصرفوا يشوفوا اى حد معرفة او قريب ليهم يعرف دكتور يكلمه

اسالوا صحابكم راحوا ازاى؟؟

اضعف الايمان لو مش لاقية صيدلية
هاتى كتاب اطلس واقريه..او الاسطوانة ب10حنيه ...

وسلوا نفسكم فيها ..وبعدين انتم مش مطلوب منكم تدريب بمعنى الكلمة ددلوتى

الفكرة بس
حاولوا تعرفوا اى حاجة تسهل عليكم لما تروحوا رابعة

جزاك الله خيرا يا دكتور ابراهيم موضوع حلو اوي

انا بقى مشكلتي مشكلة

انا في صيدلة اسكندرية وماخدتش حاجة عن الصيدلة خالص في اعدادي
لكن نفسي اتدرب بس كل الدكاترة بتوع الصيدليات بقولولي لسة بدري

مش عارفة اعمل ايه

هلا دكتورة
منتيش مطلوب منك اى شىء دلوتى

بس لو عاوزة ..ممكن تبداى تعرفى اسماء الشركات فقط مع كم منتج من اللى مشهورين

وخلاص
لسة قدامك سنتين على متبداى تتدربى