وعليكم السلام ورحمة الله وبركاته :

الحمد لله النتيجة كويسة اوى وجبت امتياز الحمد لله

والسيوتكس جبت فيها امتياز معرفش ازاى سبحان الله مع انى كنت خايفة منها اوى الحمد لله

اما عرفت النتجة ازاى ؟؟؟؟

فانا كنت فى الكلية علشان اعرف نتيجة امتحان كورس ال community pharmacist

وشفت بنتين اصحابى فبقولهم اهلا شهداء تانيه حديث فلقينا ولد قالنا هو انتوا تانيه حديث ربنا معاكم النتيجة بتاعتكم هتبان كمان نص ساعة على النت

طبعا العيال جريوا وسابونى علشان يشوفوا النتيجة

وانا كملت اليوم عادى وبعد ما روحت البيت دخلت على النت شوفتها

وروحت قلت لماما طبعا فرحت فى الاول لكن لما عرفت ان النتيجة باينة من الساعة 1 ولا 2 بعد الضهر وانا جايه اشوفها الساعة 5 زعقتلى

المهم

راضية عن نفسى وتقديرى: ايوه الحمد لله

اما عن ادائى ومذاكرتى : لأ

فى حاجات كتير ذاكرتها علشان الامتحان وبس ولا استفدت منها ولا حاجة

وده اللى مش ناويه اعمله تانى ان شاء الله وده هيجى بتنظيم الوقت شويه علشان متبقاش الدنيا مكركبة وابقى مضطرة اذاكر الحاجة زى ما هى من اغير ما اقول ليه ودى محطوطة هنا ليه ولو مكانها هنا يحصل ايه؟؟ وكده يعنى

حاجة يا ستى اتعلمتها ساعة الامتحانات انى متخدعش بطول الايام قبل امتحان مادة معينة لأنى كنت بذاكر باستهبال وراحة زيادة وازنق نفسى فى الآخر ده اللى عملته فى السيوتكس بس الحمد لله لحقت نفسى واتعلمت الدرس فى بقية المواد بس برضه متعلمتوش اوى

فاكرين كان د.مورتى اتكلم عن موضوع الوقت الكتير اللى قبل الامتحان فى موضوع طريق الامتياز

بس كفايه عليكوا اوى كده لحد دلوقتى

وعليكم السلااااااااااااااام ورحمة الله وبركاته .....
وحشاني والله جداً يا منمن
ما شاء الله موضوع جامد
بس اشمعنى يعني تانية حديث؟!
أنا نفسي نسمع آراء الحرس القديم كمان



الحمد لله نجحت نجحت نجحت
والتقديرات معقولة قياساً بما عكيت في النظري والشفوي
والله بجد ربنا كرمني أووووووووي


أبداً يا ستي .. خير اللهم اجعله خير
وأنا برة البيت بقضي عشر تلاف مشوار في الدقيقة
سمعت إن نتيجة جروب ( ب) ظهرت
والعيال صحابي كانوا مبسوطين الحمد لله
فكرت أتصل بالبيت أقول لهم يجيبولي نتيجتي لما تظهر
قلت بلاش لا تطلعلي حاجة كدة ولا كدة
بس بقى .. لما رجعت بيتنا فوجئت بأختي بتقولي : مش جبتلك النتيجة؟!
أتاريها عرفت من بقية أصحابي إنها طلعت
وتطفلت وجابتهالي
قالت لي نجحتِ من غير ولا مادة
بس التقدير @#$%!^& ( كانت عايزاني من ذوي الامتياز .. هي هي هي )
قلتلها احمدي ربك وبوسي إيدك وش وضهر ( بعد ما عرفت الدرجات)
أنا كان زماني في عداد الجرحى - أقصد الشايلين -
يااااااااااااه .. ياما انت كريم يارب




ياه ..ماتفكرنيش
والله كانت سنة عصيبة علي جداً .. يمكن أكثر من سنة أولى
كنت داخلة من اول يوم فاقدة الحماس والشعور بالرغبة في المذاكرة ( يمكن تأثير نتيجة سنة أولى )
وبدأت أكتسب صفات نفسية سيئة
زي حب العزلة والكتمان وتكبير الهموم ...



تقديري ... ألف حمد وشكر لله رب العالمين
وكيف لي ألا أرضى وقد غطتني نعم الله ؟!

أدائي ومذاكرتي .. نو وألف نو
للأسف كنت بخلي شعور الضيق يتملكني لدرجة إني أفضل النوم عن المذاكرة هرباً من أفكاري السوداء
والمحصلة ... إن أسبوع وراء التاني يعدي وأكتشف إن حصيلة مذاكرتي بضعة محاضرات من كل مادة
بإذن الله هافضل وراء نفسي لغاية ماكون قوية شوية عن كدة


اتعلمت حاجات كتيرة جداً .. جداً .. جداً
في كللل المجالات:
اتعلمت دراسياً إن الثانية اللي تفوت تساوي ساعات ، وإن كل شيء ممكن تداركه ما دام الوقت لم يمر ، وما لا يدرك كله لا يترك كله ..
اتعلمت إن لو المحاضرات جت على حساب مذاكرتي يبقى المذاكرة أولى لغاية ما أظبط نفسي ، وإن الجلوس في آخر المدرج = تضييع وقت والأفضل أقعد قدام على الأرض حتى لو برستيجي هايبوظ

على المستوى الشخصي:
اتعلمت ألا أسمح لظروفي البتة أن تؤثر على أدائي الدراسي والدعوي والاجتماعي
إيه يعني والدتي مسافرة هي وإخواتي وغايبين عني تسع أشهر؟! هما مش جايين جايين - إن شاء الله- ؟
إيه يعني ورايا مية حاجة أعملها ومية محاضرة أراجعها؟ مش كلها ضمن نطاق الاحتمال البشري؟
ليه الهروب من الواقع ؟ أنا لا أستفيد شيئاً سوى ضياع الوقت وتراكم المسئولية
ليه الاكتئاب شبه الدائم اللي يخلي الناس تنفر مني ؟ هو أنا مش ثقتي بالله عالية؟
والله لولا الله كان زماني حاجة تانية خالص... الحمد لله اللي علمني اللجوء له

وعلى المستوى الدعوي :
من يفعل الخير لا يعد جوازيهُ *** لا يذهب العرف بين الله والناسِ
ما دمت بشتغل عشان ربنا .. يبقى كل الصعب يهون ، وكل العقبات محلولة

كفاية كدة رغي.. ماعلش صدعتكم

صح معاك حق مليون فى الميه
الواحد كان يفضل يقول مش هلحق اخلص وهسيب الجزء الفلانى وهدخل من غير الجزء العلانى فى حين انه لو مضيعش وقته فى القلق والتوتر والندم على ما كان هيقدر يلم كل حاجة

والاجزاء اللى مش هيقدر يزاكرها كويس على الأقل يكون قاريها وواخد فكرة

الحمد لله رب العالمين والصلاة والسلام علي اشرف خلق الله أجمعين سيدنا محمد وعلي اله وصحبه اجمعين وبعد....

يعني احمد الله بداية علي نجاحي هذا العام بل وكرمه الشديد والله ربنا اكرمني اخر كرم وجبت ما يقارب

الجيد جدا والحمد لله كل الحمد علي ذلك الفضل ......بل أن الفضل كلمة قليلة


تعلمت في 2006

1-دراسيا:

التيرم الاول ........تقريبا محضرتيش ولا محاضرة وكان اهتمامي بالعمل الدعوي أكثر بكثير بل بمراحل من المذاكرة .......وندمت علي ذلك كثيرا

ولكن كرم الله كان يلاحقني وجبت 74.5 وعديت الكوجنزي ( المحظورة بجد )

قولت في عقل بالي بقي يا واد يا شقلبان صوحابك اللي بيحضروا المحاضرات جابوا تقديرات وانت يامنيل مجيبتش
بس....لقيتها.....يبقي احضر المحاضرات .....واجيب امتياز ......هيييه هيييه .......هاجيب امتياز

وبالفعل ....

هيلا هوبا هيلا هوبا وبدأ التيرم الثاني .....اوعي الصاروخ .....وسع ياعم ......شقلبان جاي يولع المناهج وهيحضر المحاضرات

وفعلا علي مدار 8 أسابيع نادرا نادرا نادرا ما كنت باسيب محاضرة الا عشان ظرف طارئ ....مسيرة – اعتصام – خناقة – أي ظرف طارئ

ودااارت الايام .....ودخلت الامتحانات ..ياللا بقي ياشقلبان المفروض تزبط عشان انت كنت بتحضر محاضرات

وللاسف ....

وجدت نفسي بعد كل ساعات المحاضرات هذه .....بالزبط زي التيرم الأول وألعن .....ليه؟؟؟

لأني بسلمتي كنت بخضر وخلاص .....نادرا ما باكتب ولا حتي بعلم ورا الدكتور ......سمميع من الاخر

ولما كنت بروح بقي ماقوللكش

ولاااااا كنت بافتح حاجة


من الاخر كده ضيعت من عمري 200-300 ساعة أونطااااااا

وبدأت امتحانات العملي والتي لم تشهد جديدا بالنسبة لي شوية كفتة بعملهم في المعمل واروح .ليتأزم الموقف في النظري


بس اطمن اطمن يا شقلبان النظري ده هاتقعد له علي رواقة وهاتفضااله وهتخلص عليه

ايه ده .....في ايه.......لا ......مش ممكن .......امتحان الكوجنزي بعد اسبوع وانا لسه مفتحتوش ولا فتحت المواد التانية

بس .....خلصت .....ربنا يستر ......بس هاشد خيلي ان شاء الله

وجلس شقلبان يطحن في الكوجنزي ويعبي ويحشي يعبببببييييي ويحشييييي

تصوروا .....دا انا من كتر ابدااعي لخصت محاضرات الدرة كلها ......في 12 ورقة A3 عشان اجيب امتياز
وجيت قبل الامتحان لقيت نفسي ما شاء الله مش فاكر الهيوسايماس ذات نفسها

والامتحان سيبت نصه فاضي وخرجت متاكد بنسبة 60% اني هاشيلها.....دا الجدول اللي كان فيه 48 فراغ مليت منه 8 فراغات بس والباقي طبعا عدا عليا لكن مافتكرتش منه الهوا

وتوالت الامتحانت

ومضي ثلاثة منهم علي وتيرة واحدة ....سيوتكس – اناليتيكال – باثولوجي ( متوسط )

وكانت الطامة الكبري في امتحان الاورجانيك

فبعد مضي ساعة الا ربع والله بجد اتخذت قرار نهائي اني هاسيب الورقة وامشي وما منعني والله ما منعني من ذلك الا تذكري والدي الذي كان يرقد اآنذاك في المستشفي وكيف سيكون تأثير ذلك عليه

فقررت الاستمرار وعندي ما يشبه الشلل في التفكير ولا اجد شيئا اعرفه لاحله مع اني ذاكرت المنهج كله وحليت عليه وحضرت لباااسم كمان لكن كنت حاسس اني غريب علي الورقة او اني جيت في يوم غلط وامتحنت مع سنة تالتة

خرجت من المتحان مسرعا كي لا يراني اصحابي بهذه الحالة وتلقيت مكالمة من والدتي اطمئنان علي وانا في الميكروباس واخبرتها انني صيفت ومش هاخش الشفوي .......راعني صوتها في التليفون – حيث كانت تكلمني من المستشفي عند والدي وكانت تتاوه وتستحلفني ان ادخل الامتحان الشفوي

وعدت منزلي ....ولم ارد علي التليفونات حتي عبد الظاهر ربنا يكرمه مرديتش عليه خالص وفضيلت كده حتي انتهيت من الشفوي

وانتهت الامتحانات ............كفاااااارة

وتعلمت من كل ذلك ....
1
-حضور المحاضرات = صفر بدون مذاكرة " ده اكبر درس اتعلمته "
2-لا بد أن يكون لك شيلله مذاكرة تساعدك وتعينك وتطللع عينك كي لا تبقي وحيدا
3-التشبث في الامل لاخر لحظة "لاني لو كنت مدخلتش شفوي اورجانيك مكونتش نجحت فيها"
4-وجودك مع اصدقائك اثناء فترة الامتحانات هايفرق معاك بنسبة 40% وده كان دور alltalabaبالنسبة لي في الفترة دي
5-انت مش بتنجح بحلك ...فعلا ......انت بتنجح بتوفيق ربنا .....بتنجح ببرك لوالديك......بتنجح "بمساعدتك لزملائك " ......بتنجح ببركة الدعوة إلي الله ......
6-لحظة النجاح لحظة لا تقدر بماااال
7-استعن بخبرات الاكبر منك بتفرق فعلا
8-عليكم باللبن قبل المذاكرة " كنت بشرب حوالي كيلو في اليوم "
9-.....لما افتكر ابقي اقوللكوا بقي

شكر خااص....

1-لوالدتي ....فكم عانت مني كثيرا وكم كانت تتجايل عليا عشان اذاكر والمفاجأة ....
90% من أوقات مذاكرتي والدتي كانت بتشجعني فيهل بجلوسها بجانبي لتراجع القران

انا اذاكر .....وهي تراجع..........وهكذا طول الايام

2-اخويا sahmysarem لان هواللي شرحلي السيكولوجي كلها عشان كده قفيللتها
3-اخواني في اسرة النور الذين لم يقصروا معي بصراحة في حثي وتحفيزي علي المذاكرة " وانا كنت بحفزهم برده"
4-كل اخواني واخواتي علي هذا الموقع اللي ساعدوني مش بس بالمعلومات لكن بروحهم وتحفيزهم وكنت ساعات بلاقيهم سابقينني في المذاكرة فاقعد اشد شوية عشان احصلكوا وساعات كنت الاقيكوا بتتكلموا عن حاجات معرفهاش وكنت ببقي زي اللي اسمه ايه ده.......

ومش غريب انكوا تجيبوا امتيازات وجيد جدا ....لان الله في عون العبد مادام العبد في عون اخيه ....وبجد ربنا يعزكم ويزيدكم قوة الي قوتكم ويرفع بيكو الاسلام

دعويا ....

هذا العام – الحمد لله – كان نقلة لي في العمل الدعوي .....اتعلمت كتيير اوي .....واكتسبت مهارات كتييير اوي


واتحطيت في مواقف صعبة وفجائية كتييير اوي ..... ناهيك عن المغامرات الكثيرة ...ويعني نفذت مع اخواني أنوية أفكار ينتظر لها التمام والنمو العام القادم .....وبجد يا اخواني ....عشت حلاوة الدعوة غير أي ايام حتي الايام دي

لكن الايام دعويا في الجامعة لها مذاق اخر

ووالله لا اظن ان الله اكرمني كل هذا الكرم وكل هذه المنة الا ببركة تلك الأوقات وببركة هذه الدعوة المباركة
وانصحكم يا اخواني ان تجعلوا لها من اوقاتكم قدرا ليس بالقليل واعلموا انها لن تؤثر علي مذاكرتكم اطلاقا

....احنا عندنا في الاسرة الحمد لله اكثر من واحد من أوائل الكلية ....


شخصيا ......

كل اصحابي – والحمد لله – قالولي ان انت بقيت انسان تاني خالص عن سنة أولي .....والحمد لله

تمكنت – بفض الدعوة برده – من تغيير بعض الصفات " بعض " التي كنت ارغب بتغييرها ومازلت اتعلم الكثير

والحمد لله احتكيت بالكثير من الدفعة خصوصا ايام الانتخابات



يوم النتيجة ......

تاني مرة اكشن ......ربنا اعطي لوالدتي المكافأة برده ان هي اللي عرفت اول واحدة ...انا كنت في الكلية


واخوكم " صقر الاسلام " اتصل بوالدتي وبلغها وهي كلمتني هناك وبشرتني ......وكانت فرحانة اكتر مني

اسالكم الدعاء لها لانها عانت علي مدار ما يقرب من شهر بيات في المستشفي مع والدي ومرافقته هناك في كل شئ بالاضافة الي معاناتها لاننا كنا بنمتحن ....


ويكفيني قبلة والدي لي .....والفرحة التي كانت تشع من وجهه بعدما سمع الخبر

وكم فرحت لفرحه لانه عاني كثيرا من ويلات الالم ......لكن الحمد لله احسن كتيييييييير دلوقتي



لكنه قال لي " السنة الجاية امتياز ............ماشي "


اللهم أعني علي ذلك

اعتذار واجب


لو تسببت خلال فترة الامتحانات بالياس والاحياط للبعض


بس لو سالتوا كل اصحابي هايقولولكوا اني انا كده ايام الامتحانات



بس الحمد لله اهو انا كويس دلوقتي وبحاول احفزكوا علي قد ما احضر


وشكرا بقي لانكم استحملتوني.......وياريت امانة في اعناقكم محدش يزعل مني


لان اقل مراتب الاخوة ان تبيت وليس في صدرك شئ لاخيك

يعني اللي مش هيعمل كده يبقي مش اخويا


ةانا اعتقد بل احس والله انكم مثل اخواني تماما



أحبكم في الله


ألف مبروك ليكوا ........من صميم قلبي

بسم الله الرحمن الرحيم

السلام عليكم ورحمة الله وبركاته

لا أعلم من أين أبدأ !!!!؟ ولكن ما أعلمه جيدا أننى يجب أن أبدأ ..... ولكن من أين أبدأ القصة ....

أولا : أدعوكوم جميعا للوقوف نصف دقيقة حداد على أرواح الشهداء تدعون لهم فيها وللمجاهدين بالسداد........

ثانيا : أنا نجحت يا ردالة وجيبت تقديرات لا تقل عن الجيد ولا تزيد عن الجيد جدا ...........


هو أنا بصراحة كنت فى مشوار ........... وكان معايا أمين صندوق الجمعية العلمية فى صيدلة حلوان ....... جالى الخبر بطلوع النتيجة ..... عديت على الكلية وكانت الساعة 2 أو 2 ونص ......... روحت سألت العيال بتوع الكرنك لقيتهم جايبين تقديرات حلوة وقالولى النتيجة جروب بى الى أنا منهم على النت ............ قمنا طيران على أقرب سيبر من الكلية وجيبت النتيجة ........... مبروووك ليا ...... بس ملهاش طعم أوى ......... محتاجة أعلى بإذن الله العام القادم يكون أحسن ...........

ثالثا : تانية حديث ........... سنة المراهقة ........... السنة العجيبة ............ خبايا حياة عبد الظاهر is now available :

قصتى تبدأ ....... من حيث كنت طالب فى كلية الصيدلة جامعة حلوان ..... ولكن لم أشعر يوما أنى قد حققت ما كنت أحلم به

فلم تكن جامعة حلوان تمثل لى إلا وصمة عار ألحقت بكونى طالب فى كلية الصيدلة ........ فقررت مذ أول يوم وطأت قدمى جامعة حلوان أن أحول إلى جامعة القاهرة .......... ولست أعيب فى جامعة حلوان فوالله الذى لا إله إلا هو قد عشت فيها أجمل سنة فى حياتى حتى الان فلقد عرفت فيها من الشخصيات من أعتز بمعرفتهم حتى الان بل وأشرف أنى أعرفهم ..... بل إن عقلى قد قطع شوطا كبيرا من النضج والفهم كبير جدا ...... وهى كذلك جامعة لها قدرها التعليمى الغير قليل والنشاط الطلابى المشهود ........... وقد حققت نجاحا فى جامعة حلوان على جميع الاصعدة دراسيا وإجتماعيا ...... ودعويا قطعت شوطا عظيما لم ولن أنساه ........
ولكن ............
رفضت جميع النصائح التى أرادت أن ترجعنى عن التحويل ......... وأستمعت لصوت واحد فقط هو صوت عقلى وصوت نفسى التى تبكى الان على كل لحظة ضاعت لم أكن فيها فى جامعة حلوان ........

المهم ........ حولت ........ وهنا كانت الطامة الكبرى

حدث لى نوعا من اللاماهية والرفض التام لكل حياتى ......... وبدأ التحول ......... وليس عجيب أو غريب ........ فهذه سنة الله يخفض أقوام ويرفع أقوام .......... يخفض الذين لا يدركون نعمته ولا يشكرون .....

وطأت قدمى أرض صيدلة القاهرة ........ كان الجو جديدا على ولكنه لم يكن صعب التأقلم فأنا سريع التأقلم على ما هو حولى ....

تعرفت على أخوانى فى الكلية ......... ولكن نفسى كانت ترفض كل شئ ....... كانت متمردة على كل شئ .......... ترفض الماضى وتراه أليما ......... تسعى لمستقبل مجهول ......... لا تعلمه ولكنها كانت لا تريد الماضى مهما كان الثمن حتى لو كان السبب هو خسارة أعز الاصدقاء .......

تمردت على أخوانى وكل من أعرف من أهل الخير ......... بل وتماديت وتجرأت على بعضهم .......... وصرت أقارعهم وأجادلهم وأرفض الانصات إلى أى شئ .......... كل ما أعرفه أنى أريد أن أنطلق إلى مستقبل لا أعلمه ........

عبر التيرم الاول ورصيدى هو صفر فى كل شئ ........... على المستوى الدراسى .......طلعت بمادة ......

بدأت أشعر بخطورة ما أنا فيه ......... فقد خسرت كل شئ ......... حتى أهلى ضجروا بى .......... فصرت أطول شعرى و ألبس الطواقى العجيبة وأحيانا كنت أسقط البنطلون ......... ولا نريد أن نخوض أكثر من ذلك حتى لا نكشف ماستره الله ....

بدأت أخسر كما قلت كل شئ حتى أمى كانت تتحملنى لا لشئ غير أنها أمى .......... وتصبر نفسها بأنى أعيش طور المراهقة ........... فقد تطاولت على كل من يقترب منى حتى أنى أذكر أنى مرة شتمت البيت واللى فيه ( كانت لحظة غضب )


المهم ........ جاءت الاجازة ....نفضت التراب من على كشكول الخطة التى وضعتها أنا وأخى فى صيدلة حلوان أبو سمرة .......... وكنا نخطط فيه لمستقبل الدعوة فى الكلية ولمستقبلنا كصيادلة .......... مسحت التراب من عليه وأخذت أبكى .......... وأقول هل كنت أنا هذا ؟ كيف صرت إلى هذه الحال المتردية ......... كيف أستجبت بسهولة للشيطان أم أنه أستدرجنى حتى وقعت ؟؟؟؟؟؟؟؟؟؟؟؟؟؟؟؟؟؟؟؟

المهم .......... عبرت أجازة نصف العام كفترة أنتقالية راجعت نفسى وقررت أن أعود إلى أدراجى ولكن أن أنتبه إلى نفسى كصيدلى ............. يعنى كبر لأخوانك وأنتبه لدراستك ( مدخل شيطانى أخر ) ..........

المهم تعرفت على بشر كتير فى الكرنك و غيره وغيره .......... عشان خلاص هنتبه لدراستى ........... بدأت مشاريع فعلية فى الكلية كان أخرها مع أسرة أصدقاء البيئة .......... وتعلمت التصميم وغيره .......

ولكنى ...........

ما هذا ......... لا أشعر بقيمة ..... لا أشعر أنى أنا ......... أفتقد أخوانى كثيرا ......... وما هذا ........ أضطررت للتعرف على الكثير من الفتيات بحجة إنجاز العمل ( مدخل شيطانى رابع ) .......... وكنا نعمل فعلا ولكن ......... إن كنت تضبط نفسك فكيف تضبط من أمامك .......... وإن كانت ثقافتك لا تسمح ......... فهى تسمح عندهم .......... وجدت أنى فى وضع ليس بوضعى ............ وأن كثيرا ممن عرفت عندهم مفاهيم مغلوطة عن الدين ......... فهو يجالس الفتيات ويكلمهن ويهزر ويضحك ويتكلم ويرقص ......... ولكن ما هذا ؟ تجده يتكلم بكل طلاقة فى الدين ويتحدث عن النية ........ وكل ألفاظه دينية 100%

ماهذا؟ أهولاء أقرانك ........... لا والله


أين أنتم يا أخوانى ........... وعدت مرة أخرى إلى أخوانى ........... كى أحتل مكانى فى الصف المبارك ......... ولقد كنت فاقد الامل فى أن يقبلونى مرة أخرى .......... ولكنهم قبلونى ........

وبقى شئ واحد ........... أن أعيد الثقة إلى مرة أخرى ............

وأنتظروا العام القادم ........... أسرة النور وخاصة دفعتنا ........... نيولوك حقيقى ...........

ولن أوجه أى شكر لبشر غير الله عز وجل أولا وأخيرا فهو الذى هدى نفسى وهدى عقلى ........... لأن للأسف أنا من النوع اللى دماغه حجر .............. مش من السهل أن حد يوجهنى .......... وده عيب فى بعض الاحيان

لكن صدقونى ......... أستفدت كتير جدا من السنة ديه .......... بالهبل يعنى .

طولت عليكم بس .......... علشان والله بحبكم ....

امتياز الحمد لله

انا بقى عرفت النتيجة ازاي ؟؟

كنت نايم و فجاة لقيت ايد عمالة تخبط عليا

فتحت عيني لقيت مامتي ماسكة التليفون و بتقولي خد كلم و على وجهها علامات الفرح

قلتلها مين قالتلي (توكسيك)

انا : السلام عليكم

توكس : و عليكم السلام و رحمة الله و بركاته.....مبروك يا عم حديدي

انا : الله يبارك فيك

توكس : انت جبت امتياز ما شاء الله

انا : طيب الحمد لله (بلهجة تدل على عدم الاحساس)

توكس : ايه يا ابني مالك مش فرحان ولا ايه

انا : عادي يعني اعمل ايه يعني ؟؟

توكس : انا اللي مسكتني عليك ان والدتك فرحانه

(و يا عيني الواد شكله زعل لاني كنت بكلمه كانه حاجة عادية يعني محصلش حاجة)

انا راضي الحمد لله بقضاء الله

لكن مش عاجبني حالي و عايز اتقدم اكتر ان شاء الله

اللي اتعلمته بقى مينفعش اقوله

علشان ممكن يتحدف عليا طوب

ما شاء الله !

الموضوع ده لسه مفتوح وكل دى ردود !!

بس موضوع حلو اوى يا منامينو
انا لسه مقريتش معظم الردود
بس هتكلم عنى الاول وبعدين اقراها




الحمد لله امتياز لأول مرة فى حياتى



معلش انا لازم الاول اشرح ظروفى الاول ..............
انا والدى بيشتغل فى السعودية , واحنا طبعا بما اننا كلنا اخدنا الاجازة سافرنا عشان نقعد معاه
بس تسعيرة النت هنا غالية مش زى ايام العز بتاعة ال DSL
لذلك انا مش بدخل النت كتيير وفى اسباب تانية برده

المهم انا عرفت ان النتيجة خلاص مفروض تبان النهاردة بس معنديش فكرة بالصبح ولا بالليل

بصراحة كنت مكبرة دماغى تبان وقت ما تبان مادام انا بعيدة عن الكمبيوتر مش بفكر فيها
وخصوصا انى الترم ده والحمد لله كنت مش قلقانة انى اشيل مادة ولا حاجة
وعلى الساعة 2 كده او 3 واحنا بنساعد ماما فى الطبخ وبنحضر الاكل ومشغولين على الاخر
لقيت اخويا بيقولى : تعالى شوفى هى مش النتيجة بتاعتكوا كده بانت ؟


وكان ساعتها مفيش حد فى الاوضة الا بابا وكان نايم ومش سامعنا
ودار بيننا هذا الحوار الغريب ( بتصرف )
انا : ليه كده يا بنى حرام عليك انا مش عايزة اشوفها دلوقتى اقفل النت

اخويا : ليه يعنى ؟؟؟؟

انا : اصل احنا مشغولين دلوقتى خليها بعد الاكل واحنا رايقين احسن ....
.وانا مش هقول لماما لو قلتلها هتقولى لازم نفتحها دلوقتى

اخويا : طب ليه كده ما هو ممكن تبقى حلوة وناكل واحنا مبسوطين
طب ما نفتح ونشوفها اذا كانت حلوة ولا لأ؟

انا : طيب ماشى ( فى تردد شديد عايزة اشوفها برده واقول لماما )

بس على فكرة....اول مرة تحصل انى اشوف النتيجة لوحدى واخويا
...من غير ماما واخواتى
كانت حاجة غريبة منى طبعا
بس انا والله مكنتش مصدقة انها هتبان بالسرعة دى
يعنى كأنى كنت بفتح نتيجة حد غيرى



واحنا بنفتح النتيجة والتوتر عمال يزيد ...
وبقت خايفة برده اوى برده والشياطين بدأت تلعب فى دماغى
نفسي أكون حصلت الامتياز
بس صعب شوية عشان تقديرى مش جامد اوى الترم الاول
بس مفيش حاجة صعبة على ربنا
وطبعا اول ما شفت النتيجة بقت مش مصدقة نفسي ورحت لبابا على طول واتبسط اوى
وماما واختى ... بس مفيش اجمل من اللحظة دى والله

بقية الاسئلة محتاجة امخمخ فيها شوية عشان اطلع بالمفيد ومقعدش ارغى زى فوق

ياترى راضى عن نفسك وعن تقديرك وعن أدائك ومذاكرتك

ممكن اكون راضية عن تقديري السنة دى فعلا
عشان اول مرة اجيب امتياز لكن اكيد اتمنى انى اجيب احسن من كده السنة الجاية ان شاء الله
ادائي ومذاكرتى : سبت ورايا جبال من التقصير
وزى ما بتقول محبة الحياة ... وحاجات كتير اتعلمتها عشان الامتحان وبس
وضيعت كتير اوى من وقتى


كتيييييييييييير اوى
هى السنة دى عدت بسرعة اوى
بس انا حاسة برده ان المواقف والاحداث اللى فيها كانت كتيرة على سنة

على مستوى الدراسة :
الترم الاول: كنت مقصرة جدا فى المذاكرة
وكان مستوايا فى النازل ...
يكفى انى جبت فيها اقل من سنة اولى رغم ان اللى مفروض العكس
المفروض الواحد يحسن من مستواه مش يرجع لورا
بس انا كنت بعانى من استهتار شديد وتضييع للوقت حتى قبل الامتحانات
كان فى احداث مش حلوة حصلت الترم ده يمكن اثرت فيا ...
اهمها وفاة عمتى - الله يرحمها - وهى كانت غالية علينا اوى ..
باختصار الترم ده كان ملخبط اوى .. حتى انا نفسيتى كانت ملخبطة فيه
وكنت مش بحب اروح الكلية اوى وبقت منطوية عن سنة اولى
كنت بحس انى مش داخلة فى مود المذاكرة كما يجب ...
حتى امتحانات العملى معملتش فيها كل اللى اقدر اعمله
باختصار كنت مقصرة جدا
الترم التانى :
كنت متحمسة جامد فى اوله ...
وبدأت احب احضر المحاضرات وانتظم فيها ...

وبعدين رجعت تانى استسلم للاكتئاب والياس والتعب
والافكار السوداء على رأى قبس
بقت اى حاجة بتأثر فيا وبقت قلوقة اوى

والباثولوجى والسيوتكس والاورجانيك

بس الجديد فى الترم ده انى عندى النية

وبدأت افوق على بداية امتحانات العملى كده ...
ووقفت مع نفسي وقفة ...
واعتبرت ان كل اللى بيحصلى ده والافكار السوداء دى من عمل الشيطان
رغم ان بعضها افكار صالحة
لانه عايز يعطلنى عن المذاكرة اللى هى اهم حاجة دلوقتى
ويدخلنى فى تفريعات ويشغل بالى بحاجات تسيطر على عقلى وتبعدنى عن مود المذاكرة
المهم انى بدأت اهتم بوقتى زيادة .. واحاول اعمل كل اللى اقدر اعمله واخد بالاسباب عشان ربنا يوفقنى
وانا مش هجامل لما اقول ان نصايح طريق الامتياز استفدت منها جامد اوى
وكان بتدينى دافع جامد اوى


ومفيش اجمل من الشعور بالرضا وانك حاولت تعمل اللى تقدر تعمله


بس انا اتمنى انه يبقى عندى نفس الهمة دى من اول يوم مذاكرة مش قبل الامتحانات بس
وخصوصا ان مواد سنة تالتة مهمة اوى - زى الفارما والهوسبيتال - وبداية احتكاك حقيقية لعملنا الصيدلى ...

انا عندى حماس من ناحيتهم لغاية دلوقتى

بس كفاية كدا عليكوا لحد دلوقتى

لسه الكلام مخلصش للاسف

أنا اسف والله اذا كنت طولت عليكم ......أنا رغاي اوي فعلا


بس معلش دي سنة بحالها برده


بس معلش


انا عاوز الناس اللي جايبة امتياز لا تكتفي بالسرد فقط


انا عايزهم يقولولنا نصااااااااااااااااايح



عشان بقي نبدأ من حيث انتهي الاخرون

الحمد لله يا رب انا مش لوحدى اللى عندى الأعراض دى

لأ بس ساعات بكون فرحانة بجد ويجى رد فعل بابا صادم بعض الشىء

يعنى لما تظهر النتيجة وتكون كويسة يقولى مبروك يا بنتى ان شاء الله السنة الجاية ...........................

وانا اقاطعة بينى وبين نفسى : سنة ايه اللى جاية المهم دلوقتى يلا هاتلى هدية او اى حاجة ظبطنى يعنى

يعنى عندى حالات ساعات لا مبالاة وساعات بفرح بالنتيجة

اخت فى الله : مبروك ياجميل على الامتياز لأول مرة ومش آخر مرة ان شاء الله

د.شقلبان : هرد عليك بعد الفاصل بس انا مش بعرف اقول نصايح مترتبة لكن اللى انا عملته طول السنه والكلام اللى انا مقتنعة بيه

ها


كملوا


استفيضوا فى الشرح


فضفضوا بكل اللى جواكم واللى حاسين بيه

انا فرحانة بيكم اوى والله وليا تعليق قريب باذن الله



كملوا

السلام عليكم

شوفوا بكل اختصار اقدر اوجز كلامي عن السنة اللي فاتت في جملة واحدة

قدر الله و ما شاء فعل

النتيجة: امتياز و لله الحمد
شعوري بالنتيجة : طبعا فرحت لكن مع بعض القلق وشوية برود
الرضا:واجب علينا اننا نرضى بقضاء الله
لكن الرضا بالعمل هو مفتاح للتخاذل و لازم نحذر منه
الدروس اللي اتعلمتها السنة دي:
1-" المرء على دين خليله " فالزموا اصدقاء الخير
قال تعالى "واصبر نفسك مع الذين يدعون ربهم بالغداة والعشي يريدون وجهه "
2-قال تعالى"ما أصابك من حسنة فمن الله وما أصابك من سيئة فمن نفسك "فاعمل ما استطعت ولا تسأل عن الأجر
3-قال تعالى "أحسب الناس أن يتركوا أن يقولوا آمنا وهم لا يفتنون"
فاعلموا ان ليس الايمان بالقول فقط ولكن الاختبار صعب و ساعلموا انكم ستلاقون من الفتن ما يهزكم و يزلزلكم لكن اصمدوا
و تذكروا ان سلعة الله غالية و سلعة الله هي الجنة

اييييييييييييييييه ده ؟

انا كنت اقصد نفسي بالكلام ده .. انا اللى رغيت مش حضرتك

وانا مقدرة انها سنة بحالها ومحتاجة اكتر من الكلام ده فعلا

وبعدين انا مش بحب احجر على حد ..انا احجر على نفسي لكن مش احجر على حد

اللى عايز يتكلم يتكلم

واللى مش عايز يقرأ ما يقراش



عايزاكى يا منامينو تتكلمى انتى كمان

مش هينفع كده



الله يبارك فيكى يا حبى

حاجة مهمة جدا أتعلمتها ومش هانساها أبدا :

إذا كان الله ورسوله فى جانب فأحذر أن تكون فى الجانب الاخر .......... أحذر وعن تجربة

سلاموعليكوا يا شباب
أنا أظن إن أنا إتوكست وكسة بيضلء وأرجوامن الله أن أحسن السنة الجاية وسلام

انتي رحتي فين يا منمن ؟
وبقية الناس ما عندهاش تجارب تحب إننا نستفيد منها؟

اه يا شمااااااااااااااااااااااااااااااتة العدوييييييييييين (( مفهوم يا شمتانين ؟؟؟؟ ))

انا الحمد لله جبت جيد جدا بس افل بكتير من كل جيد جدا بجيبها و كان نفسي اجيب احسن من كدة

بس للأسف كان مش عارف ايه الجديد اللى خلانى انزل كدة ...

انا دى اول نتيجه ازعل عليها فى الكليه مش عاجبانى خااااااالص

دا انا حتى طالع كوجنوزى رأأأأأأأأأأأأأأأأأأأأأأأأفه يا رجاله . .

ياللا اهو فى عين عايز اسكتها و خلاص

انا كنت فى الساحل الشمالى و اتبعتتلى مسج قالولى انى جبت جيد جدا

نزلت جرى على اقرب نت كافيه اشوفها و احبطت هناك قوى قوى . .

معلش و انشاء الله اعرف اعوضها التيرم الجاى

و الف مبروك ليكو و حظ اوفرر للى ما حالفوش الحظ

السلام عليكم ورحمة الله وبركاته :

اولا:
احب اباركلكم كلكم ياتانيه حديث سابقا وثالته حديث حاليا

الف مبرووووووووووووك على النجاح والى الامام دائما باذن الله

ثانيا : انا لسه حديثا(مبقليش كام يوم كده من ساعة ماطلعت النتيجه ) بقيت في تانيه فاحب اني استفيد من خبراتكم في تانيه

واسفه على الازعاااااااااااااااااااااج

وعليكم السلام ورحمة الله وبركاته



ربنا يبارك فيكى ياحبيبتى

عقبال لما نشوفك فى بكالوريوس ان شاء الله ( بس هنكون احنا اتخرجنا ان شاء الله برضه )



يارب يكون كلامنا فعلا مفيد ليكى

لو عايزة تسألى عن أى حاجة اسألى فورا وماتتردديش احنا تحت أمرك

وان شاء الله ربنا ييسر ونعمل موضوع مخصوص نكلمكم فيه عن سنة تانية باذن الله



ماتقوليش كدة ياسندريلاا

انتى نورتينا



انا موجودة ياقبس والله

ومتابعة مشاركاتكم مشاركة مشاركة

وهرد بالتفصيل قريب ان شاء الله

بس اصلى مسافرة النهاردة فبالى مشغول شوية

لكن ان شاء الله اول ماهرجع هكون انشط واحسن من كدة

استمروا

ربنا يخليكي لينا اختي منامينو وتسلمي

وان شاء الله يكون دايما كلامك مفيد باذن الله
وبالنسبه للموضوع اللي بتقولي عليه ففكرته جامده وربنا يعينك وتعمليه باذن الله


ده انتي هتكسبي فينا ثواااااااااااااااااااااااب


وان شاء الله منوره معانا في المنتدى دايمااااااااااااااااا

السلام عليكم ورحمه الله وبركاته
اولا كلمه لازم تتقال الف مبروك لكل اللي جابوا تقديرات كويسه وبذلوا جهدهم وطلعت عينهم عشان الفرحه بتاعت يوم النتيجه
ده كده الكلام اللي يفرح اللي اقوله بعد شويه يجيب اكتئاب تحذير
بالنسبالي السنه ده كانت من اصعب السنين اللي عدت عليا في حياتي كلها
اولا : علي صعيد المزاكره للاسف جبت جيد جدا لكن برضه اقل من الترم الاول وسنه اولي مش قادره اوصف لحظه ما عرفت النتيجه لانها كمان جت فجاه
كونت قاعده في البيت وبفكر في شويه حاجه ورايا وكنت مبسوطه وفجاه لقيت عمي بيتصل وبيقولي جبتلك النتيجه من الكنترول وانا اصلا مبحبش اجبها سري عشان صدمتي بتبقي اكبر
بعد مانقلتها فوجئت صحيح انه كان فه مواد امتياز لكن حتي امتيازها منخفض علي الحركرك يعني حسيت ان الدنيا وقفت بيا ايه ده مبقتش مصدقه ولقيت دموعي نازله غصبا عني خاصه اني كونت واعده بابا بامتياز السنادي انا جريت علي اوضتي علي طول واعدت اعيط ياه كان شعور فظيع وزاد علي كده احساسي ان انا السبب في كده بكذا حاجه
اولها :مكنش في مزاكره اول باول صحيح كونت بحضر محاضرات بس بدرجه اقل من الاول
ثانيا : وقت الامتحانت للاسف مكنتش بسمع كلام ماما في ضروره تنظيم المزاكره وكونت بسهر لحد الفجر واملي قل لدرجه نزلت خمسه كيلو بس في الفتره ده
ثالثا : وده عيب مش عارفه اعالجه ولقيته متكرر عند ناس كتير اني بتغر بطول الوقت وكل مااحس اني اتزنقت اعمل جدول اضغط فيه علي نفسي واحسسها ان كل حاجه تمام وطبعا كان بيبوظ لان الجسم والعقل ليه حدود
رابعا :حسيت اني بعدت عن ربنا شويه بمعني كل الطاعات بعملها بس مكنتش بستشعرها في قلبي زي مااكون بقيت مكنه
خامسا : وده اخر حاجه هانت اهو كونت بسمح لشعور الاحباط يسيطر عليا اجي اقول لنفسي وانا هاعمل ايه بامتياز مااخرتها صيدله وافكار سوداويه كده كانت بتقلب معايا باستهتار وتواكل الي جانب الثقه في اني علي اخر لحظه هاعرف الم المنهج واظبط نفسي
بالتالي طبعا انا مش راضيه عن حياتي خالص في الفتره اللي فاتت بحمد ربنا علي النتيجه وبتمني منه يعيني السنه الجايه
ثانيا : ده علي صعيد الاسره للاسف برضه مكونتش موفقه في النقطه ده واللي بحسه بجد ياجماعه انها سلسله واحده مربوطه بعضيها وقت ماتبوظ حاجه تلاقيها بتجر الباقي
علاقتي مع مامتي كانت متوتره بسبب موضوع انا حاسه انها مش معتمده عليا ومش مداني حريتي وانا شايفه اني كبرت وكده حاجات لما بفكر فيها تاني بقول ايه شغل الاطفال ده
ثالثا :علي مستوي اصحابي يمكن ده اللي طلعت بيها لاني كونت من النوع اللي ميعرفش يحكم كويس علي اللي قدامه طيبه زياده عن اللزوم النقطه ده دلوقتي حاستها اتغيرت وان مش كل الناس تتعامل معامله واحده
اخيرررررررررررااااااا نقطتين احب اشير ليهم عشان فرقوا معايا
1)يعني المنتدي ده لو اتكلمت فيه اد ايه مش هاقدر اوفيه جزء من جمايله عليا الوحيد اللي كان بيديني الدافع والشعور ان فيه ناس محبطه ممكن تشاركني شعوري وتخخف عني بس الموصيبه انه باز قبل الامتحانات الحمد لله علي كل حال برضه
2)نقطه قالها الاخ شقلبان موضوع العمل الدعوي ولو بجزء ضئيل بيفيد جدا علي الاقل الحاجه الي كانت بتخليني احترم ذاتي شويه وان شاء الله ناويه اجعلها دافع باذن الله لمزيد من التقدم خاصه ان ليا صديقه بحبها جدا من الناس النشيطه فغي المجال ده وبعد الجيد جدا القليل في اولي لقيت انها لازم تكون قدوه وحاجه كويسه سبحان الله بمزاكرتها وتوفيق ربنا اولا استطاعت تترتب علي الدفعه وده نموذن ان شاء الله ناويه اقرب منه
وبس كده سامحوني علي التطويل ده كله بس فعلا كنت محتاجه ارتب افكاري تاني عشان افكر نفسي باهدافيالمستقبليه باذن الله

نقطه مهمه نسيتها اعذروني احب اشكر منامينو جدا علي الفرصه اللي سمحتلي اعبر عن نفسي واستفيد واتاثر بمشاركات الاخرين وادي جنينه ورد حاجه بسيطه كده وعقبال العزومه الكبيره ساعه امتياز ان شاء الله

BABY SMILE

كلامك اثر فيا

بس ان شاء الله ربنا هيوفقك السنة الجاية وتجيبى امتياز كبير اوى

المهم بس تكونى عرفتى اخطائك السنة دى وتعرفى تصلحيها

وتخلصى من اى افكار سوداوية هى دى اللى بتعكنن علينا وبتأثر على مذاكرتنا

وتخلينا نجيب اقل من اللى كنا نقدر نجيبه
واظن دى اكتر حاجة زعلتك .. انك كنت تقدرى تجيبى اكتر من كده

عشان كده اوعى تفقدى الثقة بنفسك

بصى انا كنت كتبت المشاركات الجاية قبل ما أقرا مشاركتك

بس كلامك اكد على حاجات كتير فيها

بما انى الحمد لله من اللى جابوا امتياز
( على الحرفرك بس مش بطال برده )

احب انى اقولكوا ... هى مش نصايح قد ماهى حاجات مهمة
... اتعلمتها جديد وطلعت بيها فى الترم التانى ( اللى فرق معايا )
لذلك انا محتاجة افتكرها واتمسك بيها قبل اى حد

بس استحملونى بقى هقول كلام كتير كنت عايزة اختصر اكتر من كده بس معرفتش

ايام الدراسة :
مش هتكلم عنها كتير لأنى مش راضية عن اسلوبي فيها
بس انا الحمد لله كنت بهتم بحضور المحاضرات كلها
ولو محضرتش اى محاضرة كنت بحس انى ضايعة ..
والحمد لله صحابى اللى معايا بيشجعونى برده بحرصهم على الحضور
يعنى مفيش حاجة اسمها نفوت محاضرة مهما كان الدكتور مش بيفهم
وكنت بحب اكتب ورا الدكاترة عشان ده بينبهنى فى المحاضرة ... واحاول اركز فيها على قد ما اقدر

لكن :

مذاكرة المحاضرات ... قليل
سؤال الدكاترة على الاجزاء اللى مش فاهماها كويس ..... لأ
تنظيم الوقت .... لأ

بس والله اتعلمت ايام الامتحانات ان مذاكرة المحاضرات - او على الاقل تظبيطها - ده كننننزززز
يعنى مثلا فى السيوتيكس جيت فى الاخر واتزنقت كالعادة والوقت بقى مش مكفى
لكن لولا انى كنت ذاكرت شابترين ال sustained release , microencapsulation قبل كده
قعدت يا دوب فى واحد ليلة والتانى خلصته الصبح
لو مكنتش ذاكرتهم كنت قعدت فيهم اكتر من كده بكتييير واحتمال كبير كنت ادخل من غيرهم
رغم انهم كانوا اهم شابترين والدكاترة كانوا بيسألوا فيهم كتير فى الشفوى

والكروماتوجرافى لأنى كنت بذاكرها اول باول مأخدتش وقت كتير فى مذاكرتها
فى وقت كنت امس الحاجة فيه انى اتفرغ لمذاكرة الشباتر اللى مكنتش اعرف عنها حاجة ( وطلعت عينى طبعا )

والكوجنزى كنت هضيع فيها بالنظام اللى كنت ماشيه عليه لولا انى ذاكرت فيها حاجات كتير قبل كده عشان الشيت

ايام الامتحانات :

1-المذاكرة والمراجعة :
اتعلمت الحقيقة انو لازم عشان اجيب امتياز فى مادة لازم اكون مذاكراها كلها
يعنى مفيش حاجة اسمها اسيب شابتر كده ولاكده ( حتى لو كنت مذاكراه قبل كده )
.. ده حتى ممكن ييجى منه معظم الامتحان.. ده غير اسئلة الشفوى

انا قبل كده كنت دايما اقع فى الحكاية دى .. وده غالبا لعدم تنظيم الوقت
اذاكر فى الاول كويس ... وبعدين اجى فى الاخر واضطر اسيب جزء
وبعدين ييجى الامتحان واحل كويس اوى فى الاجزاء اللى مذاكراها
والاجزاء اللى مش مذاكراها ابييييض ... ده غير مفاجآت الشفوى


وعمرى ما جبت امتياز فى مادة كنت سايبة فيها حته ولو صغيرة

المراجعه : مهممممممة جداااا وضرورية

اقصد انى كنت بشوف المراجعة الاخيرة دى قبل الامتحان رفاهية يا اعملها يا معملهاش
لكن اكتشفت ان لا بد منها فى المناهج الكبيرة اللى بتكون فيها معلومات متشابهة ومحتاجة تربيط
وكل مناهجنا تنطبق عليها هذه الصفات
انا كنت بقول هى بس الكوجنزى المتعبة لكن الباقى هيبقى كويس
لكن لقيت برده السيوتكس كده والاناليتكال والباثولوجى والاورجانيك .....
تلاقى كله دخل فى بعضه

وطبعا عشان اضمن انى هذاكر واراجع المنهج كله لازم يبقى في خطة
( ده كلام طريق الامتياز بقى مش جديد عليكو )

يعنى اخلى يوم للمراجعة مقربش منه وباقى الايام اوزع الشباتر عليها كلٌ حسب الوقت اللى بياخده
اقل شباتر بتاخد وقت هى اللى اتذاكرت قبل كده

المراجعة :
طبعا الواحد بيبقى عنده عشم يكون فاكر كل حاجة وبخاف اكون نسيت

بصراحة مكنتش بتاخد اليوم كله
ودايما كنت اتزنق واضطر اخد من يوم المراجعة عشان المذاكرة
وغالبا كنت بخلص على الساحة 4 كده ...وببقى مرهقة
طبعا المراجعة مفروض تاخد اكتر من كده
بس برده مش لازم افقد الامل
واشرب حاجة تفوقنى والتوكل على الله وصلاة الحاجة
واول ما ابدا احس انى مش فاكرة حاجة
مش عارفة نفسيا ولأ ايه بقى .. بس كنت بقول لنفسي حتى دى لو جت فى الامتحان مش هفتكرها

واكتر مادة حسيت معاها كده هى الكوجنزى
وفعلا الحاجات اللى جت فيها الامتحان ومكنتش مراجعاها قبله مباشرة -وهى حاجات قليلة -مكنتش فاكرها خالص
وافتكرت حاجات فيها بالعافية

بس مش معنى كده ان الواحد بيبدأ من اول وجديد فى المراجعة
لأ ده مجرد كنت اقرأ الحاجة كنت افتكرها وبالتفصيل ...

وكمان بحس ان المعلومات بقت مترتبة اكتر فى الدماغ
واحسن حاجة تكون المراجعة بالتسميع

عشان تنشيط الذهن .... يعنى تحاول تفتكر الحته دى كان فيها ايه
هتفتكر حاجات وحاجات تانية هتكون مش فاكرها ..
وده طبعا بيساعد على حضور الذهن اكتر

2- النوم كفاية وعدم الاعتماد على السهر
ضرورى جدا>>> ومش لازم يكون 8 او 9 ساعات .....بس على حسب كل واحد
بس اهم حاجة فعلا ان الواحد مايسهرش ولاينام له ساعتين وبس

انا اعرف من صحابى بنات عادتهم انهم بيسهروا ليلة الامتحان ومش بيعرفوا يناموا
( حتى لو مخلصين مذاكرة)
وبيشتكوا ان بيأثر عليهم جدا ومش بيكونوا مركزين كما يجب فى الامتحان
بس انا بصراحة بقولهم ان ده مش صح
مادام عملنا اللى علينا وتوكلنا على ربنا يبقى ليه التوتر ده ؟
واحسن حاجة فى الموضوع ده قراءة القران والاذكار بتريح الاعصاب اوى

ياما حاجة تانية وهى انى اكون مخلصتش مذاكرة ولازم اسهر عشان اكمل
انا عملت كدا فى الترم الاول وده كان تأثيره سئ
والحل انى معملش حسابى ان وقت السهر اساسا ده وقت مذاكرة
يعنى لو جه معاد النوم هدخل انام حتى لو مخلصتش
والنوع ده من التهديد كان بيخلينى فعلا اخلص فى معادى
لانى طول مانا عاملة حسابى انى لو مخلصتش هسهر مش بيخلينى اخلص مذاكرة
بالعكس دانا بضيع وقت ماهو لسه الليل طويل بقى

3 - مذاكرة الشفوى :
مذاكرة الشفوى انى اذاكر كل حاجة


بضمير طبعا

انا كنت ساعات مثلا اقول لنفسي ان الجزء ده صعب ييجى فى الامتحان
اقوم افتكر ان ممكن ان اتسأل فيه فى الشفوى
ولذلك اهتم انى اذاكره بفهم او حتى ابص عليه عشان يبقى عندى فكرة

مش عارفة ليه قبل كده كنت دايما اشيل الشفوى من حساباتى خالص
وعشان كده كان دايما يحصللى فيه حاجات غبية

انتوا عارفين طبعا ان الشفوى ده حظوظ
هو مش حظوظ اوى ... هو توفيق من ربنا

لذلك احنا محتاجين ندعيله زى ما بندعى لامتحان البيبر


4- انتهاز الفرص

اقصد بيها زى اللى حصل معانا فى الباثولوجى
الدكتور استاذ المادة هيعمل مراجعة وهينزل ورق هييجى منه الامتحان

وبرده لو فى ورق عملى فى المكتبات وبيقولوا عليه كويس

بس برده لازم نستنضف يعنى مش اى ورق نجيبه
ورق الدكاترة والمعيدين هو بيبقى احسن ورق طبعا

انا فاكرة انا وصحابى رحنا نشترى ورق عملى كوجنزى
ملقيناش غير ورق واحد فى المكتبات اشتريناه
كان الرسم فيه سئ جدا .. والغريب انهم بيقولوا انه ورق د.احمد فتحى ولا د.فريد
بس احنا كنا عايزين نعرف ايه اللى علينا نرسمه بس
لكن محاولناش نرسم زيه لأننا كنا اكيد هناخد صفر

3- التوكل على الله - الدعاء - صلاة الحاجة

اهم 3 حاجات
لولاهم كان الواحد فقد الامل من زمان

وزى ما قال دكتور شقلبان التشبث فى الامل مهم
وده فى نظرى مش بييجى الا من ال 3 حاجات دول

وبقية النصائح اللى دكتور شقلبان قال عليها بضمها برده

بس خلاص
وفقنا الله واياكم

جزاكي الله خيرا وبارك الله فيكي اختي في الله على نصائحك القيمه

أنا رجعت من أسكندرية يا رجالة .....

بس كانت جرعة ترفيه مكثفة ..... الواحد كان محتاجها .... بس التوقيت بتاعها متزامن مع المذابح فى لبنان ..... معلش بقى ... معذرة إلى ربنا ....

الواحد زهق من التلفزيون المصرى ده زى الزفت ........ أخبار المذابح كانت كلها ناقصة ..... أسفخص عليه ..... الواحد كان حاسس أنه فى قبر وما يعرفش الأخبار ......

لكن رجعنا للجزيرة تانى ......... تميز ....

بس الحمد لله ......... الواحد أول مرة يبقى كويس فى المصيف ......... بس للأسف فى ناس كتير مش حاسة ومش فى دماغها حاجة ......... خصوصا الناس اللى فى الساحل الشمالى ......

كنت فى قرية المنتزه ......... الشباب تقريبا كله ضايع ........ والفتيات .... تقريبا برضه كلهم ضايعين إلا من رحم ربى ................... الواحد أبتدى يستشعر أهمية الدعوة فعلا وأد إيه الناس محتاجة الدعوة ديه .......... يعنى ناس فى لبنان بتتدبح وناس هنا حتى مش مراعية أدنى شئ

زمان كان فيه حاجات كتير فى دماغى ضاربة لكن بعد ماشوفت منظر الشباب الطاهر اللى كله أحسن منى بيموت كده بلا ذنب .... قولت أنا أحسن منه فى إيه ..... ما عشى هناك وقت لل......

بس قولولى يلا حمد لله على السلامة .... وحشتونى والله

حمدلله على السلاااااااااااااامه

حمدا لله على السلامه يا اخ عبد الظاهرررررر

انا برضو لسه راجعه من الساحل وحسيت بنفس الحكايه

وحمدت ربنا على نعمة الاسلام ونعمة الهدايه ( يارب تزيد وماتقلش ابدا ) ونعمة الوالدين ونعمة الاصدقاء الملتزمين واللى بيشجعونى على الطاعات


اما بالنسبه اخت فى الله:
فشكرا جدا جدا و ربنا يكرمك على المعلومات والنصائح القيمه دى
و بارك الله فيك ويا ربا لتفوق ده يستمر لاخر سنه ان شاء الله

وان شاء الله هنزل الصفحه دى واقراها قبل الدراسه علشان اتحفز و ازاكر من الاول
لان انا كل ترم بكون ناويه على امتياز مرتفع جدا.........بس بترسى على جيد جدا.........الحمد لله طبعا ........انا اصلا ماستاهلش


بس عندى ليكى سؤال::::
ايه رايك فى المزاكره مع حد اقصد يعنى المزاكره الجماعيه ( لانها بتنفع مع ناس........ وبتضيع وقت ناس )

وشكرا

السلام عليكم ورحمه الله
اخي عبد الظاهر : حمدا لله علي السلامه ولعلها ترويح عن النفس ترجع بعده بقوه للساحه تاني والترشيح
حبيبتي واختي في الله : معلش مكنتش بدخل فتره كده فمشفتش المشاركه بتاعتك جزاكي الله خيرا علي الدعاء وها فعلا اكتر حاجه مزعلاني انه كان بقيلي علي امتياز نص في الميه وانا عارفه اني كنت اقدر اجيبها
بس ان شاء الله نعوضها
كان ليا تعليق علي كلامك في نقطه السهر ده عشان انا مجرباها وبجد تعتبر ابتلاء والله للاسف من ضمن الحاجات اللي ساهمت في نزولي اني كنت بواصل لحد الصبح ليله الامتحان بحجه المراجعه وطبعا كنت ببقي مجهده جدا وبجاوب بصعوبه وبرجع ميته
فده نقطه لازم ابطلها بقيت الكلام انا مافقه عليه وجزاك الله خيرا علي النصائح ربنا يسهل كده ونعدي كلنا الخط الاحمر ونقول امتياز :
والف مبروك ليكي
بالنسبه لاختي صيدلانيه : انا جربت موضوع المزاكره الجماعيه ده منفعش معايا خالص مكنتش بركز كويس
بس لقيته نفعني لما كنت اخلص شايبتر مثلا ونعد نسال بعض فيه حسيت بستفيد منه اكتر فهوا الموضوع علي حسب كل واحد والسلام عليكم

ياااااااااااااااااااااااااااااااااااااااه

ده أنا بقالى كتير يا أخت بيبى راجع من السفر ..... المهم جزاك الله خيرا على السؤال ....

وإن شاء الله الامتياز جاى جاى .... اللى عاوز حاجة ... صدقينى حضرتك بيعملها .... حتى لو كانت مستحيلة ...

جزانا واياكم اختى الصغيورة Dr.cenderlla



آمييين
ربنا يكرمك ويوفقك وتجيبى امتياز مرتفع باذن الله



بصراحة انا مجربتهاش

رغم انى عاوزة بس مفيش حد من صحابى بيشجعونى

بس عارفة بحس ان مراجعة العملى بالذات بتبقى حلوة بالنظام ده

انا جربتها فى العملى بتاع السيوتكس .. وانتوا عارفين عملى السيوتكس كله procedures وبندخل من غيرها
كنت عمالة اذاكر فيه وحاسة انى مش عارفة المه .... لغاية اليوم اللى قبل الامتحان فى الكلية
كنت فى المسجد ولقيت اختين بيراجعوا مع بعض وخلاص امتحانهم فاضله ساعة كده وحاميين طبعا
قمت انا قعدت معاهم وبقينا نراجع مع بعض .. فكرونى بحاجات كتير انا كنت ناسياها .. وانا برده فكرتهم بشوية حاجات
يعنى حسيت انها فرقت جامد اوى وبقيت احسن


هو متهيالى بتبقى مفيدة بس بشروط :
الجدية - اختيار اماكن ومواعيد مناسبة - الكل عايز يستفيد ويفيد مش ياخد بس

بس يا ريت لو حد عنده تجارب بخصوص المذاكرة الجماعية يفيدنا بيها





نص فى المية بس !
ان شاء الله تعوضيها



انا برده جربت السهر ده فى الترم الاول ( فى الاناليتيكال ) وكانت نتايجه مش كويسة خالص

انا كنت داخلة الامتحان بقول يا رب انجح بس ولا اكتب اى حاجة فى الورقة من كتر التعب

ولما جبت فيها جيد فرحت اوى بيه

ربنا يوفقك باذن الله

السلام عليكم ورحمة الله وبركاته
يا جماعة لو سمحتم حد يفهمني الخبر ده يعني ايه بالظبط قبل ما يحصللي حاجة
الخبر ده موجود على موقع الكلية وبيقول:
امتحانات التخلف سوف تكون بعد امتحانات كل ترم لكل سنوات النظام الحديث أما النظام القديم فسوف تكون في شهر سبتمبر القادم 2006
يعني ايه بقى الكلام ده؟؟!!
يعني مثلا أنا عندي مادة من الترم الأول في تانية حديث
مش هامتحنها إلا بعد الترم الأول في تاتة حديث ولا ايه بالظبط؟
لأنه لو كان كده يبقى أنا هيجيلي حالة اكتئاب حادة وهأكره سنة تالتة من قبل ما أخشها

بجد يا جماعة اللي يعرف أي حاجة عن الخبر ده يرد عليا بسرعة
لحسن أنا حاسة إني مخنوقة
والبيت كله رجع يقلب عليا من تاني ويقولولي انتي السبب وانتي اللي عملتي كده في نفسك

معلش ياجماعه انا لسه قاريه الخبر بتاعك ده اختي (أختكم في الله)

انا كنت عاوزه اعرف ايه الحقيقه بالظبط وايه الصح احسن انا مش في مصر وعاوزه اعرف هحجز امتى علشان انزل مصر لو هيكون الامتحان في شهر 9

معلش ياجماعه اللي يعرف حاجه يقولي

بليييييييييييييز

وشكرا للجميع

د/ اختكم في الله من الواضح فعلا ان هما قصدهم كده ومش عارف ايه الداعي انهم يغيروا النظام
وان كان ولا بد يبقى نبعتلهم رسايل اعتراض على الموضوع دهد
لعل وعسى...