السلام عليكم و رحمه الله و بركاته

نظرا أنى بحب الساحه دى أوى.. و خصوصا قصه فوزى و فوزيه.. فقلت أخد رأيكم فى حاجه..

الحمدلله أنا خطوبتى فى نص شهر تمانيه.. على إنسان أكثر من رائع..

طول عمرنا عارفينه.. و عشره عمر زى ما بيقولو..

بس الحمدلله هو ملتزم و انا ملتزمه.. فماكنش فى كلام بيننا.. بس أنا نفسيا كنت برتاح له طول عمرى.. و هو برضو..

و الحمدلله.. بابا وافق و كل حاجه تمام.. و بيجى لنا فى زيارات منزليه..

و بابايا هو إللى أداه رقم موبايلى.. بس أنا و هو أتفقنا مانتكلمش .. إلا فى الضرورة و ده لسه الحمدلله ماحصلش.. بس هى مسجات بس لو محتاجه أقوله حاجه.. بالرغم أن بابا سامح لى عادى..

طيب فين المشكله..

مشكلتى أنى من الشخصيات العاطفيه جدا..

يعنى.. لما بحب.. بحب أوى..

و الحمدلله أنا خطيبى.. بحبه جدا جدا.. و بجد بزداد كل يوم حبا له فى نظرى..

لكن أنا من النوع أنى ممكن مثلا أيوه لا أسمح له بالتعدى فى الكلام أوى أى شىء أبدا.. لكن مثلا بحس أنى ممكن ابعت له مسج كل شويه أسأل عليه عادى.. أنا مش ممله.. بس هو بجد بيوحشنى.. و خصوصا أنه مش نفسى محافظتى.. فبحس أنى لا بشوفه و لا بعرف عنه أى حاجه من زياره للتانيه..

كمان مثلا أخرج مع صحابى.. افكر اشترى له هديه.. و هديه غاليه مش مهم.. صحابى قالولى لا هو غللى يشترى لك و بعدين مش دلوقتى..

بس أنا بحس أنى مش عارفه أعمل كنترول على نفسى.. لأنى حاسه أن ربنا كرمه كبير أوى أنه رزقنى بيه .. لأن دى قصه حب صامته .. أستمرت ست سنين جوايا.. لكنى لم أجرؤ ابدا على تصريحه بها.. و كان تعاملى معه منقطع خالص.. كل سنتين ممكن اشوفه مره و تقريبا مش بنتكلم.. و أكتشفت أن هو كان عنده نفس الإحساس من 3 سنين.. بس أستنى لحد ما اشتغل فى شغل كويس جدا و بيحضر ماجيستير.. علشان يبقى حاسس أنه مش داخل يلعب.. لكن جى و بابا يحس انه راجل يقدر يفتح بيت..

أنا مش عارفه أعمل إية فى شخصيتى.. و خايفه يحس أنى زى ما بيقولو مدلوقه عليه.. مع أنه قالى أنه بينبسط من رسايلى.. ( أنا ببعت مثلا رساله دينيه.. أو رساله أقوله أزيك يارب تكون بخير كده يعنى)..

و لا هل هو شخصيه تقيله.. و أنا إللى عاطفيه زياده..

منتظره أسمه رأيكم..

و جزاكم الله كل خير..

بحس مع خطيبى بمعنى الحب الحقيقى.. مش بالكلام و لا بأى حاجه..

لكن القلب يخفق حفقان شديد حين اراه..

أعجز عن التحدث.. أتمنى لو أقول له أنى احبك.. لكن لا أستطيع لأننا لم نكتب الكتاب بعد..

بجد ربنا يكرم كل بنت و كل شاب بالزوج و الزوجه الصالحه..لأنه شعور رائع لما تحس أن إللى ربنا رزقك بيه.. أكفاك كل شىء.. و مشاعرك كلها و قلبك كله يخفق معه.. كأنه لم يعد للرجوله معنى سوى هو..

و صدقونى..

على قد ما حتعف نفسك و تتقى الله قبل الخطوبه.. على قد ما ربنا حيرزقك ما تتمنى..

بس برضو نرجع للمشكله الاساسيه.. ياريت تقرو مشاركتى الأولى.. و تساعدونى..

السلام عليكم

اختنا الكريمة

انا شايف ان مفيش مشاكل خالص

ربنا يكرمك ويتمم على خير ان شاء الله

أخى فى الله
elwa7sh_forislam

المشكله أن لما تحس أنك مثلا قلقان و نفسك تطمن.. و عايز تعبر عن مشاعرك طول الوقت.. و تلاقى الطرف التانى أيوه مبسوط و كل حاجه.. بس مش عاطفى زيى.. و ممكن شويه شويه أقل فى نظره.. أو يحس أنى غير متوازنه..

يعنى أنا بحس أنى مثلا على الأقل يوميا مسج كويس أنى أطمن عليه.. لكن ليه أنا دايما أبدأ بأنى ابعت و هو إللى يرد.. و الله أنا دماغى مش صغيره.. بس بخاف أنى أقل فى نظرة.. أو نفسى ألاقى الجانب التانى هو إللى بيبدأ..

مش عارفه فاهمين وجهة نظرى و لا لأا؟

بصى اولا الف مبروك

بس عايزه اقولك ان ديه طبيعه البنات انهم عاطفيين جدا
وبرضه طبيعه الشباب انهم مش كده شويه لا هما اقل من البنات

فانتى متلوميش نفسك على حاجه غضب عنك

ولا يمكن انتى هتقلى فى نظره لما تبعتيله اى حاجه بالعكس هو اكيد بيفرح بيها اوى

كده متفقين ان مفيش اى مشاكل ان شاء الله


انتى بتقولى بقه نفسك تلاقى الطرف التانى هو اللى يبدا

بصى يا ستى بما انك لسه فى فتره خطوبه يبقى حاولى تعملى كنترول على نفسك مش عشان حاجه
بس عشان مش يتعود على كده مش انتى دايما اللى تكمليه لا اوعى

جوزك على ما تعوديه زى ما بيقولو

استخدمى بقه شويه اساليب البنات

جربى كده انك متبعتيش مسج او تتكلمى وشوفى هو هيعمل ايه

معلش استحملى شويه

بس تعالى قوليلى نفعت ولا لاء

أختى فى الله

MYFAIRLADY

جزاكى الله كل خير..

و أنا فعلا ححاول أعمل الموضوع ده بجد..

بس تفتكرى لو مابعتليش أى حاجه...

خايفه أفهمه غلط..

هو ملتزم جدا جدا.. فممكن يكون ده مش جفاء منه.. لكن علشان حريص على إلتزامه..

تفتكرى إزاى اقدر أحدد؟؟؟؟هل هى شخصيته كده و لا علشان هو إنسان ملتزم..و لو أنى مش شايفه أن ده له علاقه بالإلتزام..

اختنا الكريمة

الامور دى يعنى متروكة لطبيعة الشخصيات عن بعضها وقد يرى البعض ان ذلك ليس بالجميل

اذ كان يتمنى ان تنزل نصوص واضحة بالحدود ولكن ......

اراد الله عز وجل ان يجعل مرد الامور دى لقلب الانسان ورؤيته الفطرية النابعة من التزامه ليحكم بها

على مثل تلك الاشياء ........

وان يكون فى الامر سعة اذ ان الشخصيات تختلف عن بعضها البعض فى تلك الامور

يعنى الحاجات دى بالضبط ينضبط عليها الحديث " سددوا وقاربوا "

الاشياء اللى مش ينفع خااااااااااالص هي التصريح بأى شئ أو فعل شئ حرام صريح

كالخلوة .. كالتصريح .. كاللمس ......... وغير ذلك

اما فيما عدا ذلك فالامر متروك للفتاة بشكل اكبر .... وللاسف حبيبتى يعنى البنت مننا تتحمل مسئولية

اكبر من الشاب بكتييير فى الحدود دي

يعنى بحس ان الشاب ممكن يكون مش عنده مانع فى الحاجات البسيطة اللى ممكن البنت تقلق منها

مع درجة التزامهما العالية هما الاتنين

حقيقي اللى اقدر افيدك بيه اوى

ان تطلعى من الخطوبة دى على ود وفهم عااااااااااالى معه ومحاولة لفهمه وكسبه

ودخول قلبه بالعقل والمنطق ومعاني الوفاء والود والرحمة فهم اكثر ثباتا من الحب فالحب جنون وطيش

في بعض احيانه .

والحاجة كمان اللى انصحك بيها انك وانتى بعملى اى حاجة افتكرى كده انه رجل اجنبي وتسائلى " ياترى هل

سيذكرنى زوجي بشئ فعلته معه وقت الخطبة يحاسبنى عليه "

كمان تذكرى كده " لو الخطوبة دى مش تمت هل هتندمى على حاجة عملتيها له وقت تلك الخطبة ام انك تفعلين اشياء

من قبيل انها واجباتك نحوه فى كل الاحوال "

وكمان فى نقطة تانية حاولى تشغلى نفسك باشياء تانية واعمال كتير فى حياتك يعنى ده بيجيب نتيجة

هايلة ممكن مش تظهر فى الاول بس بتظهر كويس بعدين حبة حبة

وعاوزاك كده تاخدى وقفة مع نفسك وحاولى تمنعى الرسايل شوفي كده رد فعله ... لو مش بعت

وحسيته ان ده التزامه يبقى الاحسن مش تبعتى تانى اذ ان مفهوم الالتزام بنظره يحتم عليه ان لا يتواصل

معكى فكونى انتى مثله ان لم تكونى الافضل

ولو حسيتى ان دى طبيعته فحاولى ان لا تعلو قوة عاطفتك واظهارها عنه لان ده ممكن يتعب مستقبلاً


يعنى دى مجرد رؤيا ليا .. ووجهة نظر وربنا يعينك يا حبيبتى

ومش تقسين على نفسك فالحديث قال " انه أحرى أن يؤدم بينكما " والحب بين الخاطبين مؤشر راااااااائع

ونعمة جميلة يتمناها الكثيرون فى ذلك الموقف

سيدنا محمد ايضا لما بلغه حب بين شخصين لم ينكر عليهما العاطفة لكن بادر

بقوله " لم ير للمتحابين غير الزواج " فحاولى برضه قدر امكانك

الاسراع فى العقد .... والله المستعان

أختى الحبيبه مريم أبنه عمران..

بجد مش عارفه أشكرك إزاى.. جزاكى الله كل خير..

و للأسف انا موضوع العقد دا حيتأخر شويه معايا.. لأنى لسه فى أول سنه فى الكليه.. و الخطوبه مقرر لها أنها تستمر ابع سنين و دى فتره طويله.. ربنا ييسر و تمر يارب على خير و سعاده و فى طاعه الله..

جزاكى الله كل خير حبيبتى..

و بأذن الله ححاول أعمل بنصايحكم..

أسألكم الدعاء..

اختنا الكريمة

زي ما كل الاخوة والاخوات قالوا

ان طبيعة البنت كدا بتكون عاطفيه اكثر من الرجل

انا شفت القصة اللي حضرتك كتبتيها مع كلام حضرتك هنا

اول حاجة ان دي او عاطفة تتحرك في حياتك تجاه الجنس الاخر ..ومع التزام حضرتك فبتكون العاطفه اكبر ومسيطره علي اغلب تصرفاتك

زي الموقف بتاع الهدية مثلاً والمسج وحتي انك تتمني ان هو اللي يبداء بارسال المسج دا من دافع العاطفة وان حضرتك عايزة تحسي بمباردتة واهتمامة

وزي ما اختنا مريم واختنا ليدي قالوا

خضرتك حاولي تسيطري علي انفعلاتك وعاطفتك علي اد ما تقدري .لان لو صحتي حضرتك بحبك ليه دا هضرك كتير سواء ربنا قدر ان يتمم الزواج او لم يقدر لكم ذالك

طبعاً فترة 4 سنين فترة كبيرة جداً علي الخطبة ..واعتقد ان في النص ممكن يكون في العقد يعني حسب اتفاق الاهل وظروف الطرفين

من وصفك لخطيبك باين ان شخصية متزنة ..وواثق من نفسه لدرجة كبيرة جداً

ولو خدتي بالك هو قالك انه بيحبك بس من غير ما يصرح بكدا

لانه طبعاً مينفعش يقولها صراحاتاً الا بعد العقد علي الاقل

للانه لما بيقول انه بيكون سعيد بالمسج اللي حضرتك بتبعتيها هو مش علشان الرسالة انما علشان من حضرتك واهتمامك بيه

يعني ممكن الشخص يدلل علي حبة بطرق ابسط من التصريح والهدايا ..وفي نفس الوقت بالاحتفاظ بنفسه عاليه اكنه لم يدلل علي شئ

عن طريق الاهتمام باخبار الطرف ومعرفه اخبارة والانصات ليه ..يعني المشااركة في الحاجات البسيطة دي وفي وجود الاهل اثناء اللقاء بتفي بالغرض ..


وربنا يجمعكم علي خير اختنا الكريمة

مش لاقية حاجة اضيفها على كل كلام الاخوات و الاخوة بجد ربنا يجازيهم كل خير
استفدت منهم شخصياً في حاجات كتيرة


انا بس عاوزة اضيف نقطة صغننة
ان كل البنات عندهم زي "هسهس" في المواضيع دي
و دى حاجة في طبيعة المرأة و هتفضل بيها طول حياتها
حتى بعد الزواج هتفضل يجيلها اوقات على فترات متباعدة بتسأل نفسها جوزى دلوقتي بيحبني لسه ولا حبه قل ولا هوا متضايق مني و مش عاوز يقولي

المهم الي اقصده ان دي حاجة فعلأً موجوده على طول و في طبيعة المرأة
بس خليكي انتى ذكية و استخدمي عقلك شوية

خطيبك لو ماكنش بيحبك كان هيجي يخطبك؟!
كان هيجي يتقدملك؟
يعني اقنعيني انه حد هوا الي دلقه عليكي
او اقنعيني ان حد هدده عشان يروح يتقدملك

افتكرى دايماً ان انتى الي فضلتي في مكانة عالية و هوا الي وصلك بعد ما اتطمن انه وصل للوقت الي يقدر فيه يتقدملك
كمان حاسه انه جايلك و هوا عارف انك لسه ناقصلك اربع سنين عشان يضمن انه هوا الي معاكي
بس هوا ساعتها كان خلص و زي ما بتقولي اشتغل شغلانة كويسة عشان يكون واثق و اهلك واثقين انه يقدر يفتح بيت

يعني هوا الولد فعلًأ عايزك
و ةبيجيلكم كل فترة و بيتبسط من رسايلك
و زي ما الاخوة وضحو الكلام مش لازم يجي صريح عشان تفهمى المعنى
يعني يكفي انه بيقولك انه بيتبسط من رسايلك عشان تفهمي شوقه ليكي
و حاجات كتيرة قوى بتحصل بينكم اكيد تدلل على عاطفة قوية من عنده
بس لسه بدرى على مرحلة انه يقول اي حاجة زيادة

حاجة كمان
انتو ناقصلكم اربع سنين
بجد اوةلأً حاولى مع اهلك و معاه و اعقدو القران في النص و الفرح يبقى بعد ما تخلصي كلية
ده احسن ليكي و ليه
ثانياً
لسه ناقص اربع سنين
و انتى عارفة انك لو فتحتي الباب لمشاعرك اوى هتنطلق فعلًأ و ممكن قدام مايكونش ليكي سيطرة عليها
فاكرة قلتلك ايه قبل كده؟؟
لو انتو بدأتو دلوقتي انكم كل يوم -مثلاً مثلاً- تشوفوا بعض و تكلمو بعض في التليفون و تكلموا بعض كتير
صدقيني مش هتعرفي تستحملي الاربع سنين
ولا حتى هتستحملي سنة واحدة و هتبقى عاوزة تنجزى الفرح بسرعة
لأن طاقتك على السيطرة على مشاعرك هتبقى ضعيفة قوى قدام قوة مشاعرك
عشان كده
قللى انتي شوية
و هوا كمان ممكن يكون فاهم كده ف مش بيحاول يفتح الباب قوى
و يخليه متوارب على قد ما يقدر


ربنا يعينكم يا رب و يكرمكم
و شيلي الهسهس ده من مخك دلوقتي ربنا يكرمك
ربنا يجمع بينكم في الخير يا رب

انا اول مرة ادخل على لاساحه دى وشكلها فيها شغل جامد مشاء الله

مش عندي حاجة اضفها

الاخوة قالوا كل شئ

لكن فعلا رأيي فيكي انك انسانة رقيقة

ربنا يسعدك ويوفقك في حياتك