الساحة > @@""لو بتحب تعال وانا اخطبهاك بس ياريت تفهم""@@

المساعدة - البحث - قائمة الأعضاء - التقويم

@@""لو بتحب تعال وانا اخطبهاك بس ياريت تفهم""@@

الساحة > قلوب بتطير > يـلا نحـــب بجـــد

ag_bsb

19 Dec 2007, 04:52 AM

اهلالالالا انتوا جيتوا فينكوا من زمان؟!

موضوع النهارده عن الحب .. ييييييييييييييه هو انتوا مبتزهقوش
لا انا اكتر واحد بيزهق .. بس صدقوني النهارده غير
كل مرة هتكلم اول مره عن الحب ..

بس الحب بمنطق عملي

تعالي يا آدم لرحله صغيره هنطلعها سوا بس يارب تستحملني ونكمل المشوار..

بتحب؟!

قوي؟!

قولتلها انك بتحبها؟!

وكان رد فعلها ايه ؟!

هي كمان طلعت بتحبك.. مممممممم

وبعدين؟!

لا ازاي الحب فيه بعدين ..

زي انكـ هتعمل ايه بحبك ليها

ولغايه ما تقدر تتقدم هتعمل ايه ؟!

سكت يعني .. متخافش مني .. انا انسان برضه واكيد هيجي يوم هحب واتحب بس الفرق بينا اني حسبتها صح .. قولي بس ناوي علي ايه وانا اعلمك تحسبها صح..

مممممم هتقضيها مكالمات وحوارات واحيانا مقابلات

واهلها عارفين؟!

يدبحوها مش كفايه .. مممممممممم

وياتري لما بتقولك بحبك بتصدقها؟

طيب ازاي وانت ساعدتها تكدب علي اهلها؟

حتي لو الاهل تفكيرهم رجعي من وجه نظرك يبقي البنت اقل منهم تفكير لانها اختارت تحل المشكله بالكدب وانها تستغفل اهل

تعمل ايــــــــــــــــــــــــــــــــــه ؟! صدقني هو ده اللي انا جاي علشانه.. بتحبها قوي ومعاك في الجامعه - في الشغل- في الشارع - في اي مكان مش هقولك بطل تحبها لان محدش يقدر يشيل الشعور ده من جواك.. انت بس بنفسك تقدر تتخطاه..

او.. توظفه في الحلال

ازاي؟! .. اولا لازم تحط في اعتبارك ان الانسانه دي بنت ناس
ايا كان مستواهم فهي بنت ناس .. وفي الغالب الناس دي معترضه ان بنتهم تحب وتستعمل الحب
تستعمله يعني تكلمك وتخرج معاك..
دي سمعه يا بن الناس مش لعب عيال..
ده من وجهه نظرهم ..
شوفت خلتني برضه ارجع لكلام الناس..
ونسيت اهم نقطه ..
ربنا.. تعالي نتكلم شويه ونرجع لكلام الناس

ان الاهم من السمعه وكلام الناس ان في رب مطلع..
مش محتاجني اقولك ان العلاقه في شرع ربنا محرمه
ماهو مش علشان مش بتلمس ايديها واكتر حاجه سمعتهلها بحبك وحشتيني والاسطوانات المشروخه دي يبقي اللي بتعملوه مش حرام..
لا حرام ..
عارف ليه؟
لان ربنا خلقلك قلب غلفه بحبه ده المفروض .. جعلك حب الام من ثانيه الولاده وحب الاب بيبدأ من ثانيه اول ما تشوفه اكتر من مره وتاخد عليه
وحب الاخوات برضه كده
وحب القرايب
وحب الاصحاب من اول ما تلاقي انسان محترم يبقي صديق ليك
وحب النص التاني؟؟!!
من اول ما تلاقيه وتحس انه فعلا بقي النص التاني؟

معاييرك ايه؟!

شكل؟
استايل؟
روشنه؟

شخصيــــــــــــــــــــــــــــــــــــــــه؟

طيب عرفتها ازاي؟

h
ممممممممممم اتكلمت معاها

هعتبره في حدود الدراسه قدرت تتعرف علي شخصيتها في حدود الدراسه؟
قدرت تعرف هي بتفكر ازاي بالارقام والحروف؟

اكيد اتكلمت معاها في مواضيع خارجيه وامور شخصيه
مممممم آدي تاني غلطه محرمه يا حلو

ايوه هو مش رسولك صلي الله عليه وسلم حذر من الاختلاط وقال انه محرم في الاسلام..
طيب آديك خرقت حاجز تاني في طريقك يبقي تفتكر العلاقه هتنجح
لا يبقي انت غلطان لان ربك يمهل ولا يهمل
زي ما بتعارضه في الدنيا زي ما هيديك علي قد عملك
في الدنيا والاخره
يعني هتبص تلاقيها علاقه غلط ان نجحت في الاول هتفشل في النص وان نجحت للآخر هتفشل لآخر الآخر
يعني معني كده ان ربنا لما خلقلك قلب حطلك فيه ميعاد تحب وتوظف الحب..

امتي ؟!

لما تبقي رجل بمعني الكلمه عقل يفكر ان دي الانسانه اللي تنفع تفتح بيت وانها شريكه العمر وقلب بيحب يشوفها يلمحها بس معديه وجيب مش لازم مليان بس يقدر يفتح بيت او في طريقه انه يفتح بيت وايد تخبط علي الباب من بابه مش من شباكه يبقي هو ده ميعاد الحب

الحب اللي مش بيسمحلك بس تخرج معاها اللي بيسمحلك انكـ تعتبرها ضلع من ضلوعكـ

حبتها واللي كان كان انا عارفه وخلاص مبقتش قاادر علي بعدها

ماهو علشان متخسرهاش ولا هي تخسر حبها لازم تسمع كلامي..

روحلها حالا قولها كفايه كده بقي ؟
طبعا هي هتستغرب انت بتقول كده ليه متبصش لا في عينيها ولا في رد فعلها كمل اللي هقولك عليه ده..
قولها كفايه استهتار
كفايه استهتار ان في رب لا بيغفل ولا بينام عارف ان انا وانتي مش بنبالغ في الغلط بس بنغلط
كفايه بقي نتقابل من ورا اهلك
كفايه نتكلم في التليفون
كفايه كلمات وان كانت في نظرنا صغيره ومفيهاش حاجه كفايه انها بتغضب ربنا وفيها عصيان لأوامره
فاكره فاكره واحنا بنحلم ببيت صغير يبقي جميل واطفال نعلمهم في احسن مدارس واسبوع كل سنه نسرقه من الوقت نقضيه مع بعض في مكان بنحبه تفتكري حياه سعيده زي دي هتيجي مع كل التنازلات اللي قدمناها في الدنيا؟
تفتكري ربنا بيدي حد عصي كلامه ؟
كفايه كده بقي ..
اصبري وسيبيني انا كمان اصبر ولما ربنا يديني ويفتح عليا وينفع اجي واتكلم مع اهلك عنك هاجي واخبط الباب
بصي يا بنت الحلال انا بحبك وهفضل احبك بس مينفعش استعمل الحب ده دلوقتي الا لما ابقي قادر ارتبط بيكي قدام ربنا وقدام الناس ..
وعلشان اثبتلك اني مش بهرب منك انا مستعد اتكلم مع اهلك
ايوه مستعد هقولهم ان انا بحبك من زمان وعايزه ارتبط بيكي بس انا مستني الفرصه اللي ابقي فيها جدير بيكي..
عايزك تفهميني وتساعديني انا وانتي نطلع من بحر الاساءه اللي ان اوانتي غرقنا نفسنا فيه ..

والله عجبها كلامك وصدقتك واقتنعت ومش عايز اقولك عيطت من كتر زعلها علي نفسها.. يبقي انت اخترت صح يا مان ويبقي دي انسانه متتعوضش
المحترمين اقل من الزيتون علي البيتزا..

معجبهاش كلامك واخدته علي محمل انكـ بتكدب عليها وشكت في نيتكـ يبقي انت غلطان من الاول في اختيارك يا سيدي مش هي دي اللي قدام اي موقف بعد كده هتقدر تثبت حبها ليكـ ..

معجبهاش كلامكـ بقي ولسه عايزه تقضيها حورات والحياه عندها ايزي
بزمتك يا راجل دي واحده تأتمن علي بيت واطفال ؟؟!

شوفت انا حسبتها صح ازاي؟
شوفت ان طاعه ربنا والامتثال لامره حلوه ازاي؟
علشان يوم ما تحب وترجعله لو حصل شيء لا قدر الله قلبك ميتحطمش من كتر الجروح
شايف اصلا ربنا بيحبك ازاي..
كفايه عليك كده يا بن آدم
اظن انا قولتلك كل اللي فيها هتقولي متكلمتش عن كلام الناس
هقولك الناس مبتبطلش كلام يكفي ان احنا راضيين ربي وربك ورب الناس

ويلا بقي ارجع علي بيتك علشان الليل ليل والرحله خلصت
كنتم في رحله حب مع انســـــ ـــان

مرسى الحب

19 Dec 2007, 08:18 AM

جزاك الله ألف خير

ويا ريت كل الشباب يعملو بالنصيحه والوصيه الرائعه دي

والله دخول البيت من بابه في أكبر تعبير عن الحب

وده بيعتبر احترام وتقدير للبنت

أما شغل النط من الشبابيك وشغل الحراميه ده

مسيره ينتهي بغير ما نتمناه لأنه لا يرضي الله

يا بنات لو واحد بيحبك بجد هيصونك ويحافظ عليكم وهيحميكم من نفسه

والطريق الصح هو دخول البيت من بابه حتى ولو مبرره إنه لسه مش جاهز

و لو اترفض لو بيحبك بجد هيتقدم مره واتنين وعشره

ويا ولاد فكروا كويس في الإنسانه إللي تصلح زوجه صالحه تصونكم وتحافظ عليكم

اختاروا صح الإنسانه إللي هتئتمنوها على أنفسكم

يا ترى إللي انت اختارتها دي تصلح تكون زوجه وأم صالحه ؟؟

وانتو يا بنات يا ترى الانسان ده اللي انتي بتخدعي أهلك عشانه يصلح يكون زوج وأب صالح ؟؟

انتو الاتنين حاسين انكو تستاهلو كل ده ؟؟

تستحقوا تغضبو ربنا عشان تتبسطو ؟؟

طيب لما انتو بتحبو بعض بجد ليه ميكنش في الطريق الصح

مفيش حاجه اسمها لسه مش مستعدين

لو انت لسه مكونتش نفسك هي هتقف جنبك

وصدقني لو بتحبك بجد هتقنع أهلها بأي طريقه

icehearted girl

19 Dec 2007, 02:58 PM

ماشاء الله

موضوع رائع

حضرتك فكرتني بموضوع اتقال زمان مش فاكره علي لسان مين ولكن كان العكس

اصل يفندم مش ديما المراه هيا المسئوله الوحيده عن الغلط دا

وكمان مش هيا بس اللي يجب التأني في اختيارها كشريكه حياه

بالعكس هوا كمان عليه دور كبير

فزي محضرتك بتقول في الجزء بتاع

معجبهاش كلامك واخدته علي محمل انكـ بتكدب عليها وشكت في نيتكـ يبقي انت غلطان من الاول في اختيارك

يا سيدي مش هي دي اللي قدام اي موقف بعد كده هتقدر تثبت حبها ليكـ ..

جضرتك متتخيلش الشباب ممكن يتلككوا بالجزء دا ويتلاعبوا بالبنات اللي عيزين يخلصوا منهم ازاي

ملك روحى

20 Dec 2007, 02:26 AM

بجد موضوع جميل اوى

وكلامك صح

وياريت الكل يعمل بيه

36_4_11[1].gif

عايش بالأسلام

21 Dec 2007, 09:34 AM

بسم الله ما شاء الله لا قوة إلا بالله

على فكرة يا مش عارف أسمك ايه " بس ها اعرفه انهارده "

الموضوع ده انا كنت لسه ها انزله انهارده

بس يلا يا حبي

المبادرون هم الفائزون

جزيت خيرا و ان شاء الله فى ميزان حساناتاك

ag_bsb

22 Dec 2007, 01:38 AM

اقتباس(عايش بالأسلام @ Dec 21 2007, 12:34 PM) [snapback]1259050[/snapback]

ميرسى على زوقك وبعدين انا وانت واحد 36_4_11[1].gif

doctor_cool

22 Dec 2007, 05:33 AM

جميل أوي الموضوع ده

تسلم إيديك يا أخ ag_bsb

بجد بجد موضوع ممتاز

و لكن لي تعليقين صغيرين

الأول

إني موافق جداً كلام دكتورة آيس ، في مسألة إن شباب كتير بيسيئ استخدام المفهوم اللي أشارت له دكتورة آيس

شوفو يا اخواننا و يا أخواتنا

شاب غلط مع بنت ، و بنت غلطت مع شاب ، و الاتنين غلطوا ، يعني الاتنين زي بعض

مش علشان فجأة الشاب راح قرأ كلمتين عن الحب و ضوابطه في الإسلام و اقتنع بيهم ،

و بعدها راح كلم البنت و قال لها على الكلمتين اللي قرأهم ، و طبيعي البنت أول ما تسمع منه الكلام ده هتستغرب

هتستغرب من حاجات كتير

أولها التغير المفاجئ ، و طبيعي إنها تشك في إن الولد ده عايز يسيبها و بيقول الكلام ده علشان يتخلص منها

و تانيها إنها بتسنع كلام جديد ربما أول مرة تسمعه

فيبقى طبيعي إنها تستغرب ، و مش منتظر إنها أول ما تسمع منه الكلام ده تقوم على طول تقول له

" يااااااااااااااااااه ، تصور مش كنت واخدة بالي ، بس الحمد لله إنك تنبهت في الوقت المناسب و نبهتني "

لأ طبعاً ، مش هتقول كده ، ده كفاية بس الدهشة اللي هتكون عايشها و اللي هتخلي تفكيرها متلخبط لفترة مش قليلة

و بالتأكيد في موقف زي ده ، و مع شاب زي اللي موجه له الكلام من خلال الموضوع ده و في السن ده

فهو غالباً شاب لا يمتلك الحكمة المطلوبة لمعالجة المواقف الصعبة و احتواء ردود الفعل غير المتوقعة بالنسبة له

يبقى الشاب ده أول ما هيلاقي رد فعل على عكس اللي هو مستنيه ، هيكون تصرفه إنه على طول يحكم عليها بإنها

بنت مش محترمة و إنها فعلاً زي ما الأخ بتاع الموضوع " مش هي دي اللي قدام اي موقف بعد كده هتقدر تثبت حبها ليكـ "

كل اللي عايز أقوله

إن الموضوعات اللي زي كده ، تعالج بشيئ من الحكمة و الصبر ، و إنه لا ينسى إنه غلط زي ما هي غلطت

بل إن غلطه هو كان أكبر ، لأنه هو الرجل ، و الرجل أكثر حكمة من المرأة في أغلب الأحيان

و إنه كمان لا ينسى و هو يعالج الأمر ، قول الله تعالى ( كذلك كنتم من قبل فمن الله عليكم )

التعليق الثاني على الكلمات دي :

اقتباس

يعني هتبص تلاقيها علاقه غلط ان نجحت في الاول هتفشل في النص وان نجحت للآخر هتفشل لآخر الآخر

في الحقيقة الكلام ده مخالف للواقع إلى حد ما

فيه قصص نجاح في علاقات الزواج و الحب كانت فيها أخطاء و معاصي لله

و كمان فيه قصص ارتباط كانت لناس ملتزمين و فشلت

و العوامل تختلف من تجربة لأخري

طيب أنا ليه بقول كده مع إن اللي أنا بقوله ده قد يبدوا مضاداً لفكرة الموضوع و ضد الفكرة اللي أنا أصلاً بشجعها ؟؟

أنا بقول كده علشان لازم مواضيعناً دايماً تكون واقعية

لأننا لما نيجي نكلم الشاب ده بالكلام ده هيكون رده كالآتي :

" طيب ما أنا أعرف فلان ابن خالتي كان زيي كده و اتجوز البنت اللي حبها بعد ما كانوا زي كده و هما دلوقتي عايشين

في منتهى السعادة و قربوا من ربنا أكتر بعد ما اتجوزوا "

أو هتلاقي عنده رد أو قصة من الواقع مغاير للكلام اللي بنقوله

و بالتالي هيكون مفهوم عنده إن كلامنا مش واقعي

كل الكلام هيبقى عنده مش واقعي لأنه وجد فيه حتة صغيرة جداً مغايرة للواقع

اللي عايز أقوله

إن لازم نفهم الناس إن إلتزامهم شرع الله سبحانه و تعالى لازم يكون ابتغاء رضاه

مش يلتزم شرع الله علشان قصته تنجح أو علشان حياته الزوجية مش تفشل

لأنه لو التزم شرع الله علشان كده و بعد كده حياته الزوجية فشلت لأسباب مختلفة ، هيقول على طول

" شفت ، أديني التزمت زي ما قالوا لي يا عم الحاج و النتيجة إن قصتي اللي كانت كلها ملتزمة فشلت ،

و يمكن لو كنت اتجوزت البنت الأولانية ، كننا عشنا مع بعض في منتهى السعادة زي صاحبي فلان "

احنا لازم نفهم الناس إن التزامهم شرع ربنا لازم يكون ابتغاء رضاه ، مش علشان ينجح و مش يفشل

و نفهمهم إن النجاح و الفشل لهم سنن و قوانين لابد إنهم يأخذوا بها ، و إنه من الدين الأخذ بهذه السنن و القوانين

و جزاك الله خيراً على موضوعك الرائع جداً ، و ربنا يبارك فيك و يكرمك

حقيقي موضوع ممتاز و أسلوب جميل

شمعة الحقيقه

22 Dec 2007, 06:28 AM

ربنا يبارك لنا فيك ياريت كل الشباب تعمل بكلمك الرائع ده انا كده بصراحه شكل ربنا كرمنى بالاشتراك فى المنتدى عشان خاطر بس اسمع المواضيع بتاعتك الجباره ده بصراحه مواضيعك فوق الرائئئئئئئئئئئئئئئئئئئئئئئئئئئئئعه

شمعة الحقيقه

مرسى الحب

22 Dec 2007, 06:38 AM

دكتور كول كلامك عين العقل

ربنا يبارك فيك

ابن خفاجة

22 Dec 2007, 10:38 AM

" انه من يتق ويصبر فإن الله لا يضيع أجر المحسنين "

" ماتوادا اثنين ثم افترقا الا بذنب يحدثه احدهما "

amy amy adel

18 Jun 2008, 08:11 PM

الموضوع ده قديم اوى بس بجد جميل وموجود دلوقتى كتير اوى بس اتمنى انه يتحقق عشان محتاجينه فى حياتنا بجد واعتقد ان الشباب مش واخدة بالها من الموضوع ده بلاش اقول كل الشباب لكن المعظم

36_4_11[1].gif

amy amy adel

19 Jun 2008, 11:13 PM

mido_kinglove

20 Jun 2008, 02:54 PM

شكرا موضوعكag_bsb بس انا شايف

ان لو الواحد راح قال للي بيحبها اصبري وانا اصبر

لحد ما اكون نفسي يبقا هتستناه كتيررر اوي اوي

ممكن الانسانا يفضل يحبها علشان يحافظ عليها

بس بجوار الحب ده يحاول يكون نفسه يعني الحب

جنب الشغل علشان مضعش منك.علشان اللي انتا بتقوله ده

ان الواحد ميتكلمش موبايل ولا يشوفها ده مينفعش في الحب

يعني هو يكلمها ويشوفها بس في حدود المعقول علشان

يقدر يحافظ عليهاز عموما ده رأي مش عارف صح ولا غلط.

mido_kinglove

20 Jun 2008, 02:56 PM

[quote name='mido_kinglove' date='20 Jun 2008, 02:54 PM' post='1518847']
شكرا موضوعكag_bsb بس انا شايف

ان لو الواحد راح قال للي بيحبها اصبري وانا اصبر

لحد ما اكون نفسي يبقا هتستناه كتيررر اوي اوي

ممكن الانسانا يفضل يحبها علشان يحافظ عليها

بس بجوار الحب ده يحاول يكون نفسه يعني الحب

جنب الشغل علشان مضعش منك.علشان اللي انتا بتقوله ده

ان الواحد ميتكلمش موبايل ولا يشوفها ده مينفعش في الحب

يعني هو يكلمها ويشوفها بس في حدود المعقول علشان

يقدر يحافظ عليهاز بس ده طبعا بجوار الشغل زي ما قولت .

عموما ده رأي مش عارف صح ولا غلط.

وشكرا علي موضوعك

amy amy adel

20 Jun 2008, 03:40 PM

طب يا استاذ mido فيها ايه لو استنت البنت لما يقدر يكون نفسه وهو كمان صبر والله الحب هيكون فى الوقت ده جميل عشان هيكون مبيغضبش ربنا

اوك انا معاك فى ان يكون فى موبيل بس فى حدود ويكون احسن لو دخل البيت من بابه حتى لو مش ناوى على حاجة بس يدى فكرة لاهل البنت بس

اكيد ده مش هيكلفة كتير وعلى العموم اختلاف الرأى لا يفسد للود قضية 36_4_11[1].gif

mido_kinglove

20 Jun 2008, 06:52 PM

شكراamy amy adel احترم وجهه نظرك

amy amy adel

21 Jun 2008, 06:37 PM

اوك ميرسى وانا كمان محترمة وجهة نظرك 36_4_11[1].gif

amy amy adel

22 Jun 2008, 10:43 PM

اتمنى ان يكون الشباب صادقين فى كلامهم بجد 36_20_1[1].gif

شهيدة الأقصى

24 Jun 2008, 07:13 PM

جزاك الله خيرا

اول مرة اشوف الموضوع ده

بجد موضوع تحفة

ربنا يهدي الجميع

جزاك الله خيرا ربنا يكرمك

Snow Princess

1 Jul 2008, 08:39 AM

الموضوع اكثر من راااااااااااااائع بجد
ربنا يبارك في حضرتك ..
وانا متفقة تماما مع كلام د.كول

وليا تعليق صغير

دلوقتي في ناس كتير -وانا لاحظت ده مؤخرا- بيكونوا مثلا معجبين ببنت وصارحوها بمشاعرهم وطبعا بما ان الشاب مش ميسور الحال في الوقت الحالي مثلا..بيقولها انا مش هقدر اتقدم دلوقتي لأن مفيش امكانيات والدراسة وكدة..

والمفروض انه عايز ان البنت تستناه..هتقولولي تعتمد علي حاجات كتيرة اولها هي بتبادله نفس الشعور ولا لأ
هقولكم افرضوا انها متعرفوش اساسا..وهو عايز يتعرف بيها في الفترة قبل ما يتخرجوا..
طبعا ده كلام مش صح..والمفروض انه يدخل البيت من بابه ويتكلم معاها في بيتها

لكن انا عندي استفسار
ليه مادام الشخص ده عارف ان امكانياته مش هتسمحله انه يخطبها مثلا..ليه يتكلم من الاول؟؟

منتظرة ارائكم

أبو أنوس

1 Jul 2008, 09:54 AM

إقتباس

ليه مادام الشخص ده عارف ان امكانياته مش هتسمحله انه يخطبها مثلا..ليه يتكلم من الاول؟؟

اولا بحيكى يا فندم ع وجهة نظرك

وكلامك الواقعى جدا

يا فندم اولا انا عاوز أعرف حضرتك ان كلنا حاليا نعيش فى سن المراهقه

وهو سن من صفاته عدم التحكم فى المشاعر .... والاستهواء ... والمشى وراء الخيال

يعنى كلنا دلوقتى بنحلم بعد ما نخلص هنطلع هنلاقى الشركه والمكتب والعربيه ... والعروسه

بنحلم ونعيش لحد ما بنصدق نفسنا

دى مجرد مقدمه

بالنسبه لسؤالك ..............

يا فندم الحب دا شىء جميل اوى

بس اللى بيروحو يعمل كده نوعين

اولا ........... صادق المشاعر فعلا

ودا بيكون خايف ان البنت تضيع منه ... او يكون مش عاوز يكون الحب من طرف واحد

يعنى عاوز يعرفها وخلاص ..... ويعرف إذا كانت بتحبه ولا لا .... عشان ع كده يستمر او لا

ودا بينجح فى الاخر بنسبة 50% تعتبر حلوه يعنى بس حسب الاتنين

ودى اطرقنا ليه فى موضوع ياترى قصة الحب الجامعيه ياريت تشوفيه

اما النوع الثانى ..........................

غير صادق المشاعر ...............

ودا بيكون بيحب ... بس مش متأكد

او حب من بتاع ان شاء الله ربنا يسهل

ودا بيكون عاوز يحب لمجرد اهتمام بنت بيه

لان دى أمنية كل شاب وفتاة ......... فى اى مكان

فهو مجرد حب لأرضاء شهوه .. وهو ما نسميه بحب الامتلاك

دا طبعا مش بيكمل ... مجرد وصول لما يريد .. بيسيبها وخلاص فركش

دا رأيى يا قندم

ومنورنا تانى

amy amy adel

1 Jul 2008, 10:02 PM

رأيك مظبوط يا استاذ ابو انوس ومتفقة معاك 36_4_11[1].gif

Snow Princess

3 Jul 2008, 10:15 AM

كلام حضرتك مظبوط يا دكتور..
بس يجي سؤال هنا...ازاي البنت تفرق مابين النوعين دول عشان تعرف تحكم صح؟؟

Mahmoha

8 Jul 2008, 10:04 PM

الموضوع اكثر من رائع بجد

وربنا يبارك فيك يا ag_bsb بجد عندك مقدرة هايلة على الاقناع

ورأى doctor cool عاجبنى جدا

وعندى نصيحة صغيرة للأستاذ Mido king of love

بلاش موبايلات نهائى مش بقولك فى حدود المعقول لأ نهائى

ولا حتى يشوفها بمبرر انو كدة هايحافظ على حبه ليها

لإن دا مدخل من مداخل الشيطان ممكن يطور العلاقة لحاجات تانية لا قدر الله

ومش ممكن دا اكييييد

لإن ربنا بيقول ( ولا تتبعو خطوات الشيطان ) فخطوة هاتجر خطوة اكبر هاتجر خطوة اكبر . . و هكذا

واكيد طبعا لو اتبعت خطوات الشيطان الشيطان مش هاياخدك و يوديك الجنة

اكيد الشيطان بيجر الانسان للمعصية ودا لا شك فيه

فلو اتبعته و قولت بس علشانه احافظ على حبى ليها هاكلمها و اشوفها فى حدود المعقول

الكلام و النظرات أصلا حرام و معصية لله

فابعد عنها وما تخافش لو ربنا رايدها ليك و هى بنت على خلق هاتكون ليك حتى لو اتقدملها ألف عريس

ولو ربنا مش رايدها ليك مش هاتكون ليك حتى لو كلمتها و هاريتها مقابلات و مكالمات

انت تريد وانا اريد و الله يفعل ما يريد

وما فيش حاجة بتقف قدام إرادة ربنا سبحانه و تعالى

بس اهم حاجة نتحرى الاخلاص لله فى كل شىء حتى يريدا لله لنا الخير فى كل شىء

حتى فى اختيار شريك او شريكة الحياة

power_2010

8 Jul 2008, 10:20 PM

انا قعدت اقراء واقراء وبصرحة عارف ان حضرتك تعبت جدا قى الموضوع بس للاسف انا حاسس انى بكلم حد كبير عندة 50 سنه مش حاسس المعاناه اللى احنا بنعانيها يعنى انا عملت زى ما انت بتقول فى الاخر اللى حصل انها شافت حد جاهز ونفضتلى ودة لان الاختلاط حرام ومينفعش اقابلها انا مقبلتهاش غيرها عرف يحسسها بحبه وانا ماشاء الله قعدت اتفرج ............ انا بكلمك كاخ والله وعارف انك خايف على مصلحتنا بس عيزين الواقع شوية
انا مبقولش ان اخذ البنت اللى بحبها واسرح بيها وامسك ايديها لكن مفيش مانع اننا نبقا عرفين اننا بنحب بعض ومتفاهمين وعقليتنا متقاربه بس هنصبر شوية حتى تتحسن الظروف

شكرا مرة اخرى على الموضوع

Mahmoha

8 Jul 2008, 11:19 PM

إقتباس
انا مبقولش ان اخذ البنت اللى بحبها واسرح بيها وامسك ايديها لكن مفيش مانع اننا نبقا عرفين اننا بنحب بعض ومتفاهمين وعقليتنا متقاربه بس هنصبر شوية حتى تتحسن الظروف

طيب تبقو عارفين ان انتو بتحبو بعض ازاى اكيد هايبقى فيه بينكم كلام و مقابلات

مش كدة و للا انتو هاتعرفو بالمراسلة ؟ . . !!!!!!

وده حراااااااااام حراااااااااااام حرااااااااااام

والله العظيم حرام

بص يا استاذ باور لو ليك اخوات بنا ت او بنت خالة او بنت خال او بنت عمة او بنت عم

حطها فى الموقف ده

ترضى انها تقابل شاب بمبرر الحب؟

أكيد لأ . . اللى ما ترضهوش لأهل بيتك ما ترضهوش لغيرك

وأكيد تفرحلها لو اتجوزت مش كدة؟

اكيد برضو ليه؟ لإن الجواز سترة للبنت

ما احنا برضو عايزين نبقى واقعيين . .

لكن انا مش هازعلك

طيب لو انت بتحب واحدة و امكانياتك المادية مش سامحة انك ترتبط دلوقتى و ف نفس الوقت مش عايز تعمل حاجة حرام و عايز تتحق الحب ده بالحلال يعنى تتجوزها

تعمل ايه ؟

انا مش هارد

بس انصحك تدخل موضوع أبو أنوس بتاع ( ياترى قصة حب الجامعة هاتنتهى بإيه بعد التخرج )

الموضوع حلو أوى

وانا مشاركة فيه و حاطة فيه شوية حلول للشباب اللى بيحب و ظروفه المادية مش سامحة بالجواز يعمل إيه

ياريت تقراها

مش بعمل بروباجاندا لنفسى ولا حاجة والله

بس انا نفسى كل الناس تقراها بهدف التغيير و عشان نغير تفكيرنا و عشان ما نعقدش الشباب و عشان الحياة تبقى اسهل

بجد اقرا الموضوع من أوله لأخره و هاتستفيد الكثييييييييييييييييييير بإذن الله تعالى

وربنا يهدى الناس جميعا

Rooody22

9 Jul 2008, 09:27 AM

السلام عليكم.......

بجد شكرا عالموضوع الرائع....... و انا حبية اتناقش معاكى يا mahmoha بس فى حاجة .......انا معاكى فان حرام انهم يقابلو بعض او كلام الموبيلات من غير اى ارتباط و من ورا الاهل و متفقة معاكى جدا فى الموضوع ده.........

بس مفيش مشكلة لو بس يصارحها بحبه و يفهمها زى مالموضوع اتكلم و هى اكيد لو محترمة وبتحبه هتستناه اكييد.....

بدل ماضيع منه لانها مش هتستناه على احساس من غير اى واقع او حاجة تربطه بيها على الاقل....... و بعدين يتعرفهوا على بعض فى فترة الخطوبة زى ما هما عايزين ...

لان زى ما حضرتك قولتى قبل كدة ان لما تكون الحاجة بعيدة عنه هيموت عليها ولو ابتدوا فى الكلام من دلوقتى مش هيلاقوا حاجة يقلوها بعدين........ بس المشكلة فى الاهل الى

بيصعبوا الدنيا على دماغه خصوصا فى الزمن الى احنا فيه ......... و انا قراة الحلول بتاعتك معلش حسية انها خيالية جدا و دى الحاجة الى عايزه اقولها لحضرتك لان مش ممكن الاهل

يوافقوا على الحلول دى لاى سبب من الاسباب......... يعنى مثلا انا اعرف اتنين واحة فيهم اتفركش الموضوع لان اهلها موافقوش انها تعيش فى محافظة غير محافظتها و التانية عشان
ماينفعش تعيش فى بيت العيلة بحجة المشاكل الى هتحصل بين العروسة وحماتها بالرغم ان فى شقة!!!!!!!!!! شوفتى ازاى ... مبالك اوضة فى بيت العريس ؟؟؟؟؟؟؟ ماتهيئليش حد

يوافق على كده.......... مع العلم انها لازم توافق اهلها فى الاخر....... يعنى المشكلة فى الاخر برضه الاهل... و لازم برضه الواحد يكون واقعى........

معلش طولت عليكم وشكرا......

amy amy adel

9 Jul 2008, 11:09 AM

انا معاكى فى كلامك يا مهمومه بس فى نقطه احب اعرفها هو حرام الكلام فى الموبيلات والكلام الذيذ ده

انا معاكى بس ثوانى ممكن تقوليلى اذاى يعبروا عن كلامهم ؟؟؟؟؟؟؟؟؟؟؟؟؟

انا من وجهة نظرى ممكن الباب بتاع الحوار بنهم والكلام فى حاله واحدة الخطوبه او الارتباط قدام اهلها والناس كلها

بس لو الشاب مش ناوى على كده المفروض الباب يتقفل عشان كده لعب عيال ولا انتم رأيكم ايه؟؟؟؟؟؟؟؟؟؟؟

مستنيه رأيكم هل انا غلط ولا صح؟؟؟؟؟؟؟

amy amy adel

9 Jul 2008, 11:15 AM

انا متفقه معاكى يا مهمومه كلامك مظبوط بس كنت عاوز اعرف حاجة

اوك الكلام فى الموبيلات حرام والحورات ده بس دلو قتى لو واحد عاوز يعبر عن نفسه يعمل ايه ؟؟؟؟؟؟؟؟؟؟؟؟

انا وجهة نظرى ان لازم الموضوع يكون رسمى خطوبه او اى حاجة بس فى النور وقدام الاهل ده اعتقد مش حرام

ولو مش فى امكانيات الولد انه يتقدم اى خطوة يبقى بلاش يبقى لعب عيال هى ده وجهة نظرى معرفش صح ولا غلط

مستنيه رأيك على كلامى وشكرا 36_4_11[1].gif

Mahmoha

9 Jul 2008, 11:57 AM

صح كلامك يا ايمى

لو عاوز يعرفها انو بيحبها و عاوزها تستناه كلامه يبقى مع اهلها وبس هى مالهاش دعوة واكيد هو لما يكلم اهلها و يقولهم انو بيحبها وانو عاوز يتجوزها و انو عايزها تستناه بس لحد ما ربنا ييسرها و يكون نفسه اكيد هاتعرف انو بيحبها و بكدة يبقى عرفها انو بيحبها و فى نفس الوقت ماعملش حاجة حرام و دخل البيت من بابه
وهى لو بتحبه اكيد هاتقول لأهلها انا موافقة عليه و هاستناه وبكدة هو هايعرف اذا كانت بتحبه ولا لأ

مش يروح يكلمها هى بحجة انو عايز يعرفها انو بيحبها و يعرف انها بتحبه ولا لأ

إقتباس
بس مفيش مشكلة لو بس يصارحها بحبه و يفهمها زى مالموضوع اتكلم و هى اكيد لو محترمة وبتحبه هتستناه اكييد.....

رودى اديكى قولتيها زى ما الموضوع اتكلم

والموضوع ده اتكلم عن ان الولد هايروح يكلم البنت بهدف محدد انو يقطع علاقة بيها و عشان ما يفضلوش غارقنين كدة فى بحر العصيان لله و الذنوب

يعنى مش بغرض انو يعرف انها بتحبه و انو بيحبها

ماهم عارفين و هارين بعض خروجات و مقابلات . . كل ده و لسة ما عرفوش ؟!!!!!!!

انا بتكلم فى حتة وانتى بتتكلمى فى حتة تانية خالص

وبالنسبة للحلول اللى انا طرحتها ياجماعة باقول لعاشر مرة و للمليون مرة هى مش صعبة و لا خيالية بس محتاجة مننا شوية مجهود مع الأهالى علشان نقدر نغير طريقة تفكيرهم وهاتحتاج مننا شوية مجهود عشان نحققها و ما فيش حاجة مستحيلة و لا كبيرة على ربنا

وطالما هانسعى اكيد ربنا هايساعدنا نوصل للحنا عايزينه

ولو مش عايزين ناخد بيها و نرفضها كدة بالدماغ حتى من قبل حتى ما نحاول نجربها

يبقى العيب فينا و يبقى الولد او البنت بقى ما يزعلوش لو كل واحد فيهم شافله زى ما بيقولو كدة حد جاهز يكمل معاه بقية حياته ماهو مش هايفضل عانس كدة علطول علشان خاطر عيون الطرف التانى مش عايز يتحرك ولا يحاول يسعى فى انهم يحققو حبهم ده بالجواز

والله يا جماعة لو احنا عملنا بالحلول دى هاتغيير حياتنا كلها و ربنا هايرضى عننا

عارفين ليه لإنها من روح التسامح و الرحمة بالبشر فى الاسلام ولو مش مصدقينى اقرو موضوع أمير الجراح بتاع (الحب قبل الجواز حرام ولا حلال) و شوفو الجواز فى عهد الرسول كان عامل ازاى ازاى كان بحلول بسيطة و سهلة اوى زى دى و لو ماعملناش بالحلول دى يبقى هانعيش فى غابة و الجرايم هاتكتر و نفضل ننام و نقوم فى اللى احنا فيه ونفضل كدة على حالنا

و الحكم ليكم انتم يا شباب تختاروا الطريقة اللى تعيشو بيها حياتكم

amy amy adel

24 Jul 2008, 06:52 PM

رأيك جميل يا مهمومه بجد ربنا يكرمك فى حياتك

وانا شايفه ان حلولك مش خياليه اوى بس عاوزة شويه صبر ومجهود بس مش مستحيله

36_4_11[1].gif

بسمةأمل

24 Jul 2008, 09:07 PM

الموضوع بجد رااااااااااااااااائع يعني حضرتك لم تترك لااحد لفرصه يقول حاجه

أشكرك اخي علي هذا الطرح المتميز

تحياتي

جريحه الايام

31 Jul 2008, 12:51 AM

موضوع اكتر من رائع والله تسلم ايدك بجد

وبجد كلمه رائع لا تصفه

تسلم ايدك

جزاك الله خيرا

سموره وبس

2 Aug 2008, 08:08 PM

ان شاء الله ربنا هيكرمك ويوفقك في الدنيا وفي الأخره

بجد جزاك الله كل الخير وربنا يجعله في ميزان حسناتك

وجزيت الفردوس الأعلي

وربنا يهدي كل شباب وبنات المسلمين أجمعين ااااااااااااااااااااااامين

سموره وبس

2 Aug 2008, 08:23 PM

بس أنا عند صاحبتي مشكله

وهيا انها مرتبطه بواحد وكانت مقضياها مقابلات وتليفونات الخ

المهم حاولت اقنعها بأن ده حرام اللي بتعمله ولازم بتقي زي اسرتك محافظه وكده

والمفروض انك متعمليش حاجه من ورا أهلك

المهم حاولت اقنعها الحمد لله واقتنعت وقالت له مره واتنين علي علاقتهم المحرمه بس هو متمسك بيها أوي

والحمد لله هو عمل أول خطوه واشتري شقه ولسا له الشغل

لأنه بيدور حاليا علي شغل علي حسب ماهيا قالتلي

المهم بردو مقضيينها اتصالات وهيا محتاره أوي مش عارفه تعمل ايه معاه عاوزه تبطل موضوع الارتباط بس مش قادره

تقوله أو قالت له قبل كده وقال لها طب لما احب اطمن عليكي يبقي ازاي وكده

وهيا مالقيتش كلام ترد عليه ومع ده كلو هو اللي أقنعها انها تلبس الأسدال ولبسته والحمد لله[size=4][/size]

وبعدين غير كده دخلنا شعبان الحمد لله ورمضان جاي بأه ولازم نلتزم شويه

عاوزه رأيكم ربنا يخليكو

لأنها صاحبتي أوي وانا حاسسه ان انا اللي واقعه في المشكله دي مش هيا

عاوزه رد اقوله لها عشان تقول له انهم ينهو موضوع الارتباط

بس ف أسرع وقت الله يخليكم

والسلام عليكم ورحمة الله وبركاته

Taher For Allah

3 Aug 2008, 04:56 AM

جزاكم الله خيرا .... بصراحة موضوع حلو أوي

وانا مقتنع ان الطرفين مسؤولين ان الغلط اللي بيحصل

ولازم تيجي منهم هما الاتنين

ويا ريت الشباب كلهم يفكروا بالشكل ده

Relena

4 Aug 2008, 08:13 PM

مشكوووووووووووووووووور ولله

موضوع أكثر من رائع

ومعاك حق

لأني بحتقر ألي بيحاول يكلمني

أو بيكلم أي واحده

هؤلاء أنا لا أفكر ولن أفكر في الزواج منهم أبدااااااااااً

أنا قبل ما ألتزم كنت بكلم كتييييير عادي يعني

وكلهم كان مجرد تسلية و السلام

ولما هداني الله

ولا واحد دلوقتي أنا بعبره

مهما قالي

ومهما حزن

ومهما

ومهما

أنا لا أبالي ولن أبالي بهم أبداً دول مينفعونيش

كانوا مجرد تسلية أو بمعني أصح تضييع وقت

~~~~~~~~~~~~~~~~

أما الشاب الملتزم الذي لا يتحدث اي فتاة

هذاااااااااا هو الرجل بمعني الكلمة

هممممممممم هيه دية الرجالة ولا بلاش

أما الباقي لا شيء

جزيل الشكر علي مجهودك موضوع بجد راااااااااائع

المشتاق لله

5 Aug 2008, 10:42 PM

السلام عليكم

موضوع اكثر من رائع جزاكم الله خيرا عن شخص يري هذا الموضوع و يأثير فيه

بجد هو اثر في ناس كتير

......................

ردي بقي بالنسبة للناس الي بتقول هطمن عليها ازاي

دية هتوحشني

انا مش متخيل ازاي مش هكلمها

الاجابة في سؤال واحد بسسسسسسسسس

هل انك تكلمها او تطمن عليها او ايا كان المسمي

اهم ولا انك ترضي ربنا

بسسسسسسسسسس كدا شوف انهين اهم !!!

سموره وبس

12 Aug 2008, 11:17 AM

ايوه كده

هو ده الكلام

أسير الخطايا

12 Aug 2008, 08:41 PM

بســم الله الـرحمــن الرحيــم

جزاك الله خيراً يا أخى و ربنا يكرمك

و أكركم بحديث النبى صلى الله عليه و سلم :

(( من ترك شيئا لله ، عوضه الله خيرا منه ))
< قال الألبانى : إسناده صحيح >

36_4_11[1].gif