تحب تتجوز



وتعيش حياة سعيدة



نفسك فى زوجة تملى عليك الدنيا وتخلى حياتك هنا



. . طب وانتى نفسك فى زوج يصونك و يخليكى اسعد واحدة فى الدنيا



و تحلفى و تتحالفى بيه قدام كل الناس



و ما يبقاش فى بينكم مشاكل



لو عايز الحياة الزوجية تبقى كلها استقرار و سعادة و هنا



هنا فى الموضوع ده



ان شاء الله



هناقش مع بعض



ازاى ممكن تتحقق السعادة الزوجية بين اى اتنين متجوزين



وازاى ممكن الحب يستمر بين اى اتنين متجوزين عطوووووووووووووول



وهانقول آراءنا و انطباعاتنا عن الزواج و تصور الناس ليه ممكن يكون ايه



و انت\ انتى شايف الحياة الزوجية دى ممكن تكون ايه ؟



جنة و لا نار



حب ولا كره



سجن و خنقة و لا راحة و استقرار



خناقات و مشاكل و لا سعادة و هنا


و لو واحد هايتجوز من اصحابك او قرايبك ممكن تقوله . .



( ألف مبروك و بالرفاء و البنين )



ولا هاتقوله



( انا لله و انا إليه راجعون )



لو كنت شايف الحياة الزوجية نار و كره . . يبقى ليه ؟



وليه الناس شايفة ان الحياة الزوجية بتبقى نهاية مش بداية ؟



وليه شايفين ان الحب ما بيستمرش بعد الجواز ؟



كل ده عايزين نناقشه هنا فى الموضوع ده مع بعض



وكمان هانعرض كل المشاكل اللى بتحصل بين الازواج



وازاى ممكن نحلها



وازاى ممكن نخلى الحب يستمر بين اى اتنين متزوجين و بنفس القوة بعد الجواز



وكل القضايا اللى تخص اى اتنين متزوجين



و هانعرض كل الحاجات دى



واحدة و احدة



و نتناقش فيها مع بعض



بس مش دلوقتى



الاول شوفو االفرق بين الموقفين دول و قولو لى ايه رأيكم



دول اتنين متزوجين بيحبو بعض

الزوج : انتى يا ولية فين الأكل بقالى ساعة قاعد ع السفرة ايييييييييه انتى غاوية تجوعينا

الزوجة : ما تصبر شوية مش قادر تصبر خمس دقايق عقبال ما الاكل يستوى

الزوج : نعم اصبر ايه ؟! خمس دقايق . . المفروض يا هانم انى ارجع م الشغل الاقى الاكل جاهز مش اقعد استنى و تقوليلى الاكل بيستوى و ما بيستويش

دا دلع فاضى ده لكن العيب مش عليكى العيب ع اللى جوزوكى و عاملوكى ست بيت و انتى لا ست بيت و لا غيره

الزوجة : والله مش انت لوحدك اللى بتشتغل انا كمان بشتغل و انت لازم تقدر ده و انا مش جارية عندك و لعلمك بقى انا ست بيت و نص ومكفياك برة و جوة انت بس انت اللى زى القطط تاكل و تنكر

الزوج : هى حصلت تردى عليا و تشتمينى يا ولية طب هه . .( ثم رفع الشبب و . . ديب طاخ ديب طاخ طاخ . . . .





ايه رأيك هى دى الحياة الزوجية ؟



موجودة الصورة دى فعلا ولا لأ ؟



منتشرة ولا دى حالة استثنائية ؟



طب وايه رأيك فى دول



اتنين بيحبو بعض بس بقى اكتر م اللى قبلهم


الزوجة : ألو . . ازيك يا حبيبى و حشتنى

الزوج ( فى العمل ) : الحمد لله . . انتى وحشتينى اكتر

الزوجة : كدة برضو تنزل من غير ما تفطر معايا

الزوج : معلش والله ياحبيبتى اصل انا كان لازم انزل انهاردة بدرى عشان فى شغل كتير فى المكتب

الزوجة : برضو ما كانش يصح تنزل من غير ما تصبح عليا

الزوج: اسف جدا اوعدك بعد كدة مش هانزل الا لما اصبح عليكى و بعدين انا سيبتلك و ردة على تربيزة السفرة خدتيها

الزوجة : احلى و ردة فى حياتى تسلم ايديك يا حبيبى

الزوج : تسلميلى انتى يا حياتى . . يللا انا مضطر اقفل دلوقتى عشان عندى شغل

الزوجة : خد بالك من نفسك . . لا إاله إلا الله

الزوج : محمد رسول الله





وطب و الصورة دى تفتكر موجودة على ارض الواقع



منتشرة بنسبة كبيرة ولا ده اصبح خيال مش موجود اساسا




ها يللا قولولى انطباعتكم و آرائكم عن الحياة الزوجية



وانا مستنيياكم

طبعا قبل ما اطرح اى موضوع نتناقش فيه هنا

عايزة اقول ان المواضيع دى بتبقى من اجتهادى الخاص

وهى قابلة للصواب أو الخطأ

يعنى باختصار قابلة للمناقشة و الرد و التصحيح اذا وجد بها أخطاء

يعنى كلنا عايزين نتعاون مع بعض بحيث اننا نقدر نوصل لوضع ضوابط و اصول صحيحة الى حد كبير
نقدر بيها نغير فكرة الناس عن الزواج و نساعدهم انهم يبنو بيها حياة زوجية سعيدة فى المستقبل ان شاء الله


طيب . . . .




احنا كنا عرضنا قبل كدة اول و اهم القوانين اللى بتقوم عليها الحياة الزوجية السعيدة

وقلنا ان ما بنى على باطل فهو باطل

و اتفقنا ان اى انسان لازم يتحرى الحلال دايما علشان ربنا يباركله فى زواجه ان شاء الله

واتفقنا ان اللى عاوز يتجوز يخش البيت من بابه وان دا احسن و افضل مش كدة





طيب نخش بقى على الموضوع التانى المهم واللى لازم ناخد بالنا منه فى موضوع الجواز




2_اختيار شريك او شريكة الحياة


وانا مش هاطول عليكم فى الموضوع ده

هاتسألونى ليه ؟

هاجاوب و اقول

علشان اى واحد بيتجوز واحدة بتبقى بالنسبة له زى الملبسة المقفولة معمولة بطريقة معينة و متغلفة جاهزة

يعنى اعماق شخصيتها ما بتبانش الا فى فترة الخطوبة

والولد كذلك عامل زى البونبوناية المقفولة ممكن ما تعرفش ايه حقيقة شخصيته الا لما تعاشره و تقعد معاه

يعنى كل واحد فيهم بيبقى ليه سماته الشخصية المتأصلة فيه منذ الصغر او اللى اتغيرت بمرور السنين ثم تأصلت فيه

يعنى ممكن الولد يكون بطبعه عصبى حبتين و البنت غيورة زيادة عن اللزوم مثلا مثلا يعنى

. . ودا عادى

و انا مش هاتكلم كتير لإن الصفات اللى احنا ممكن نعتقد انها وحشة و ما نقدرش نتكيف معاها كتـيييييييييييييييير

ولو استبعدناها كلها

يبقى احنا بنطلب نعيش مع ملائكة

وده مستحيل





بس احنا هانحط فى اعتبارنا صفة واحدة لازم تكون موجودة فى الانسان اللى هايتم اختياره كزوج او كزوجة

الصفة دى هى اهم حاجة

الصفة دى هى ( التدين )

وطبعا ماننساش ان الرسول عليه الصلاة و السلام قال ( فاظفر بذات الدين تربت يداك )

وكمان فى أثر عن اختيار الزوج على هذا الاساس ايضا : ( أن رجلا قال للحسن ابن على رضى الله عنهما : ان لى نبتا فمن ترى ان ازوجها له ؟

قال : زوجها ممن يتقى الله فإن أحبها أكرمها وإن أبغضها لم يظلمها )

وطبعا احنا لو وجدنا السمة دى موجودة فى شريك او شريكة الحياة . . موجودة بحق

تأكد ان ورائها العديد من الشمائل و الفضائل الأخرى فى سمات هذه الشخصية

لإن التدين معناه ان الانسان بيراعى ربنا فى كل عمل يعمل و فى كل سلوك يسلكه و فى كل شىء

فتأكد انك تلاقى فى الانسان أو الانسانة المتدينة : الادب و الاخلاق و الكرم و الصدق و الامانة و التواضع و الاحترام و الكلم الطيب و حب الخير و حب الغير و . . . .

طبعا مش هاعرف احصى كل المميزات اللى ممكن تلاقيها فى الانسان او الانسانة المتدينة

لإن الدين بيضم تحته جميع المعاملات الحسنة

واكيد اللى بيطبقه صح و بما يرضى الله اكيد هاتلاقى فيه كل المميزات دى و اكتر




. . . . . . . بس برضو احنا مش ملايكة

مهما كنا متدينين

يعنى فينا اكيد عيوب




بس بيتهيألى يا جماعة لو فيه اى حاجة تانية بعد التدين احنا ممكن نكون شايفينها وحشة ممكن تتعالج

يعنى بقى ما نتلككش وما نعملش م الحبة قبة

يعنى دور الخطيب او الخطيبة او الزوج او الزوجة المتدينين انهم لو لقو عيوب بسيطة فى الطرف التانى انهم يحاولو يصلحوها او يغيروها

مش يقعدو يتلككو عليها و يحصل فسخ خطوبة و طلاق على اسباب تافهة وعشان احنا مش عايزين نتعب و عايزين الحاجة ع الجاهز

لأ لازم يتعبو و وكل واحد منهم يحاول يغير من شخصية التانى للاحسن

او لو التغيير دا كان صعب حبيتين و مش قادرين يعملوه _ ماهو دا ممكن يحصل برضو بناء على مبدا من شب على شىء شاب عليه . . يعنى اللى فيه طبع ما بيغيروش _ يبقى الحل ان كل طرف يحاول يأقلم نفسه على شخصية الطرف التانى و يستحمل و ييجى على نفسه كتيييييييييييييييييييييييييير اوى

يبقى يا إما نغير من شخصية الطرف التانى للأحسن ياإما نستحمل

لإن هو ده الحب الحقيقى

يا جماعة اللى بيحب حد بجد بيحاول يغير من شخصيته للأفضل و يخليه احسن او يقبله كدة زى ماهو بكل صفاته . . .




بس انا عندى رأيى كمان (خاص) مش قاعدة مسلم بيها يعنى

فيه سمتين انا شايفة انهم لازم يكونو موجودين و مهمين عند اختيار شريك او شريكة الحياة

السمتين دول هما

1_ تقارب السن

2_ تقارب المستوى الثقافى

واعتقد ان دول مهمين جدا لإن من غيرهم ممكن تحصل مشاكل جامدة

يعنى مثلا الشاب ما يروحش يتجوز واحدة عجوزة و لا البنت ما تروحش تتجوز واحد قد ابوها لإنو بحكم السن كل واحد فيهم اكيد بيحن للارتباط بانسان من نفس سنه ولو ده ما حصلش فى الجواز ممكن بعد الجواز الزوجة أو الزوج يبدأ يبص برة لواحدة من سنه و تبدأ تحصل علاقات محرمة بيها يغضبو ربنا و بيها ينهدم بيت و اسرة بحالها

والرسول عليه الصلاة و السلام امرنا بكدة و كمان لما تقدم سيدنا ابو بكر و سيدنا عمر بن الخطاب لخطبة فاطمة بنت الرسول عليه الصلاة و السلام رفض و قال لهم انها صغيرة و لكن لما تقدملها على بن ابى طالب زوجها له


طيب و بالنسبة للمستوى الثقافى

انا حاسة ان ده مهم لإنه بيقرب لغة الحوار و التفاهم مابينهم و بين بعض

وبرضو لو كان فيه فارق واسع بين المستوى الثقافى عند كل منهما و نتج عن كدة عدم تفاهم و عدم استيعاب للأمور و الموضوعات

اكيد الطرف الأعلى فى المستوى الثقافى هيبدأ برضو يدور على حد تانى يفهمه و يفهم لغة حواره و يتكلم معاه فى مواضيع عجز الزوج أو الزوجة عن خوضها أو حتى فهمها

وده طبعا ممكن يولد نوع من التقارب بين الزوج وبين واحدة تانية غير مراته و من نفس مستواه الثقافى

أو العكس برضو ممكن يحصل مع الزوجة

والتقارب ده ممكن يتولد عنه علاقات غير شرعية محرمة تهدم الحياة الزوجية

فاصل و نعود بمشيئة الله