السلام عليكم ورحمة الله وبركاتة
ازيكم يا احلى ساحة في الدنيا
ا انا اماني عمر خلصت 2 ثانوي ودلوقتي في 3
حسيت اني مخنوقة ومش لاقيا حتة اتكلم فيها عن مشكلتي انسب من المكان دا
انا كنت كنت في 2 ثانوي علمي وكان حلمي ابقى منكو ادخل كلية صيدلة ولكن.........
حصلتلي ظروف السنادي من ابشع ما يكون زي مثلا انفصال اهلي
معرفش اذا كان غلط اني ارمي فشلي على شماعة الاخرين ولا لا
بس والله انا طول عمري متفوقة في المدرسة
المهم مش هطول عليكو جبت 91.3 وحولت رياضة 2
وللعلم ان امتحنات السنة دي كانت جامدة شوية
واقلل صيدلة خدت من 95.5
انا حسا اني هموت يا جماعة
والمشكلة ان في مدرسين كانو بيدوني امل وبيشجعوني اكمل احياء
وبيقولولي لو شديت في تالتة هلحقها
يعني مثلا لو جبت 97 مع 91.3 مع بعض
يبقو 94 بالمستوى 95
صليت استخارة كتير
وفي الاخر سلمت للواقع وبدات في رياضة 2

ساعدوني بجد محتاجة رايكم

وعليكم السلام ورحمة الله وبركاته
مرحبا بحضرتك في بيتك يا فندم
والضربة التي لا تقسم ظهرك تقويك

بالنسبة لموضوع التحويل لرياضة أو لأ ... فبيحدده حاجتين : أولهم: المجموع __ وثانيهم : حضرتك عاوزه ايه ؟

أنا هاقول لحضرتك تجربتي في الثانويه
انا جبت في تانيه 93.6 % .. وعلى أيامينا المجاميع عالية بطريقة بشعه
دخلت علمي علوم وكنت محدد هدفي ألا وهو 99% علشان ألحق كلية نضيفه -- والحمد لله حققته بزياده وجبت 99.6% ( الناس مكنوش مصدقين ان انا جبت المجموع ده ) ( سبحان الله من المرات القليلات جدا في حياتي إني أحدد هدف وأحققه زي مانا عاوزه بالظبط -- طبعا دي مش شطاره مني بل فضل من ربنا والله -- الحمد لله )
وكنت كمان ناقص في المستوى الرفيع درجتين يعني استفدت منه بـ3 درجات بس -- يعني كنت معظم الامتحانات الحمد لله الدرجة النهائية

بس طبعا في سنه تالته عملت فورمات للسته الأصدقاء اللي عندي -- يعني اللي جايب أعلى مني كنت بصاحبه
واللي اقل مني كنت بخليه لأوقات التهييس ( كنت مصلحجي أوي الصراحه ) كان كل صديق له فايده -- ده بتاع الدح وده بتاع الخروج وهكذا



أهم حاجه في حياة الإنسان (( الهدف )) وأحلى حاجة (( التحدي )) --- لازم الحياة يبقى فيها آكشن
ولازم حضرتك تشدي حيلك لأن السنه دي متوقف عليها مستقبل حضرتك --- مش هاقول مستقبل حضرتك هايضيع لا قدر الله لو مجبتيش مجموع لكن العمليه بتبقى اصعب شوية .. ولازم تركزي وتشيلي الظروف اللي حول حضرتك من دماغك خالص علشان التركيز مهم جداااا

علشان ده مستقبل
.. يعني انا جات عليا فترات كتيره كنت ببقى عاوز احول لكليات غريبه منها تجاره مثلا ... لأني بحب التسويق وكنت عاوز أدرسه بتعمق اكتر .. بس بقول : لأ صيدلة بريستيج بردو وفيها شغل تسويق كتير .. فبقدر ما تتعنى تنل ما تتمنى .. وكمان بلدنا دي بلد شهادات


طبعا اهم حاجه حضرتك تصلي استخاره ( تاني )
وتدعي ربنا كتييييييييير
واحنا هندعي لحضرتك ان شاء الله


ومرحبا بحضرتك في ساحة صيدلة

وعليكــم السـلام ورحمة الله وبركاتـه..

عاملة اية يا أمانى ؟ ان شاء الله تكونى بخير

أولا : أنا شايفة انك مش بتعلقى غلطك على شماعة الاخرين

لأن فعلا الواحد ممكن ربنا يصيبه بابتلاء و يحصله ظروف مش كويسة

فى وقت الامتحانات و يجيب مجموع مش هو اللى بيحلم بيه

واضح من كلامك انك بتحبى صيدلة و نفسك تدخليها

بصى بقى بالنسبة للاختيار انا رأيى انك اول حاجة تشوفى



يا ترى انتى مستعدة تموتى نفسك ف المذاكرة لحد ما تجيبى مجموع صيدلة ؟؟

و لا فى احتمال انك تهملى شوية او يحصل لك ظروف تانية تعطلك عن المذاكرة؟؟


و لو جاوبتى عن السؤال دة بانك هتموتى نفسك مذاكرة عشان تجيبى مجموع يدخلك الكلية اللى انتى بتحلمى بيها

يبقى توكلى على الله و تدخلى احياء

و لو مش متأكدة يبقى احسن تكملى math 2 عشان تضمنى برضة لأنك لو كملتى احياء و مجتهدتيش

يبقى انتى بتخاطرى انك متحصليش مجموع الصيدلة

و اهم حاجة انك تصلى استخارة عشان ربنا يوفقك الى ما فيه الخير

كمان صدقينى مش دايما اللى الانسان بيكون عايزة لنفسه هو الاحسن ليه

يعنى لو مدخلتيش صيدلة ممكن يكون دة مش المجال الافضل ليكى

و ربنا اختار لك مجال افضل من الصيدلة هتنجحى و تكونى متفوقة فيه

يعنى خليكى مؤمنه بقدر ربنا و ان اللى ربنا هيختارهولك اكيد هو الاحسن

و ارجو انى اكون افدتك و لو شوية صغيرين

وفقكى الله الى ما فيه الخير

مرسي بجد على ردودكم والله حاسة اني بكلم اخواتي
بس في خلفيات كتير لسه مخلياني مش قادرة اقرر حاسة اني عايزة ادخل صيدلة برستيج بس وفي نفس لاني طول عمري كنت عايشة في الامارات وكان نفسي اخش علوم وابقى زي د. زويل واااااااااااو احلام جميلة قوي
جيت مصر وانصدمت بالوقع ونظرة المجتمع للعلوم كرهت العلوم وحسيت اني فاشلة
بدا حلم الصيدلة من 2 ثانوي

وانا بطبعي لما بصمم على حاجة بحققها ودا من ايام الدراسة والتنافس على الاولى الحمد لله
ومن ناحية تانية اني لقيت قسم في الهندسة اسمو هندسة نووية
يعني احسن من علوم كيميا اللي كانت حلمي وانا بيبي
والصيدلة في نفس الوقت مليانة كيميا وزي ما قلت فبقدر ما تتعنى تنل ما تتمنى .. وكمان بلدنا دي بلد شهادات
الحيرة من جوايا
اما بالنسبة للظروف فالله اعلم بس اللي اعرفو انها بتزيد لان انا هتنقل في المكان اللي والدي هيعيش فيه وهسيب ماما
والله اعلم بقى بظروف المكان دا



عامة بعد رد دكتور حسني انا رحت جبت كتب وملاز مالاحياء
وشكرا يا دكتور

إقتباس

بس في خلفيات كتير لسه مخلياني مش قادرة اقرر حاسة اني عايزة ادخل صيدلة برستيج بس وفي نفس لاني طول عمري كنت عايشة في الامارات وكان نفسي اخش علوم وابقى زي د. زويل واااااااااااو احلام جميلة قوي

السلام عليكم و رحمة الله

أزيك يا امانى ؟؟ عاملة اية ؟؟

بصراحة هى صيدلة برستيج بس برضة انا شايفة ان هندسة كمان برستيج

و أى كلية تدخليها و تتفوقى فيها بريستيج مش بس صيدلة و هندسة

لأن الناس بتحب الانسان المتفوق فى مجاله مهما كان المجال دة

و بجد انا برضة كان عندى احلام زى دى انى ممكن اخترع ادوية و حاجات من دى

لكن برضة اتصدمت لأنى عرفت ان تطوير الدواء فى مصر مش متطور زى بلاد بره

إقتباس

يعني احسن من علوم كيميا اللي كانت حلمي وانا بيبي
والصيدلة في نفس الوقت مليانة كيميا وزي ما قلت فبقدر ما تتعنى تنل ما تتمنى .. وكمان بلدنا دي بلد شهادات

بصى كمان يا امانى انا عندى فكرة كويسة

انتى تخيلى نفسك بعد التخرج نفسكى تكونى اية ؟

اية الحاجة اللى انتى متخيلة نفسك هتنجحى فيها اكتر ؟

شايفة نفسك صيدلانية و لا مهندسة ؟؟

شايفة نفسك ممكن تكونى فى شركة ادوية و لا تشتغلى شغل مهندسين ؟

و لو انتى حاسة انك مش هتقدرى تكونى غير صيدلانية يبقى تعقدى العزم

أنك تذاكرى باقصى قوة عندك وتجيبى اعلى مجموع ممكن توصلى له السنة دى

و ما شاء الله انتى باين عليكى اساسا متفوقة يعنى لو شديت حيلك ممكن تدخلى صيدلة زى ما انتى عايزة

إقتباس

اما بالنسبة للظروف فالله اعلم بس اللي اعرفو انها بتزيد لان انا هتنقل في المكان اللي والدي هيعيش فيه وهسيب ماما
والله اعلم بقى بظروف المكان دا

و اهم حاجة قبل ما السنة تبدأ انك تتاكدى ان مفيش حاجة هتعطلك عن المذاكرة حتى الظروف دى

يعنى تروحى المكان اللى انتى هتعيش فيه قبل الدراسة و تشوفيه

لو مطلعش مناسب للدراسة لازم تحاولى على قدر الامكان انك تخليه مناسب للمذاكرة

يعنى تكلمى باباكى و تشرحى له الموضوع و انك عايزة تجيبى مجموع عالى

و بعدين تخليه يحاول بقد الامكان يحسن لك ظروف المكان دة عشان مذاكرتك

و اوعى تنسى ان كدة السنة دى هتكون مهمة جدا بالنسبة لك يعنى مهما كانت الظروف مينفعش تخليها تاثر على

مذاكرتك زى ما د. حسين قال ان السنة دى هتحدد مستقبلك

و اى حاجة تانية عايزاها احنا كلنا فى الخدمة

فى امان الله

يا حبيبتي يا زهرات ربنا يخليكي يا رب على كلامك
بالنسبة لموضوع التفوق والله يا زهرات من 4 ابتداءي وانا بعرف يعني ايه حلم وهدف وطموح وبعرف احققهم من زمان وانا بطلع الاولى معقول مذاكرتي من وانا صغيرة ميبقاش ليها دخل في مستقبلي سبحان الله ناس بتكون عادية جدا في حياتها ودراستها و في قدراتهم وتبقى حاجة تانية في الثانوية
وناس تبقى متفوقة وهيا صغيرة وتيجي الثانوية تكسر ضهرها سبحان الله
بالنسبة بقى لموضوع الخيال دا
فاانا والله مش شيفا نفسي مهندسة خالص
مش لاني فاشلة في الماث لا
انا ميولي كيميا 100 في 100 وزي ما قلتلك كان نفسي ادخل علوم
عارفا يعني ايه واحدة تنام وتحلم بمعادلات و و و الخ .........
مخي مش رياضة خالص
وبالنسبة للظروف فربنا هوا لوحدو اللي يقدر يخفف ويشيل عني
و هوا اللي قادر زي ما خلا النار برد وسلام على سيدنا ابراهيم
يخلي ظروفي مهما كانت صعبة حافز اني اجيب نسبة
بس انتو ادعولي ربنا يختارلي الخير

إقتباس

بالنسبة لموضوع التفوق والله يا زهرات من 4 ابتداءي وانا بعرف يعني ايه حلم وهدف وطموح وبعرف احققهم من زمان وانا بطلع الاولى معقول مذاكرتي من وانا صغيرة ميبقاش ليها دخل في مستقبلي سبحان الله ناس بتكون عادية جدا في حياتها ودراستها و في قدراتهم وتبقى حاجة تانية في الثانوية

السلام عليكم و رحمة الله و بركاته

ازيك يا امانى ؟ عاملة اية؟

بصى دة شئ عادى طبعا انك يحصل لك ظروف تخيلكى تجيبى مجموع مش كويس

رغم انك متفوقة ما شاء الله عليكى

بس الموضوع كله انك لسة قدامك فرصة فى سنة تالتة يعنى مش هى دى نهاية احلامك

فى انك تدخلى صيدلة بس زى ما قلت لك لو انتى قررتى تكملى بيولوجى

يبقى لازم مفيش حاجة تعطلك خالص عن المذاكرة

يعنى تبذلى اقصى مجهود عندك و ان شاء الله ربنا يكرمك لانك اساسا متفوقة

لكن برضة لو مش متأكدة من قدرتك على انك تقضى سنة تالتة دح و مذاكرة متواصلة

مش هكدب عليكى كدة تبقى بتخاطرى انك لا تلحقى صيدلة و لا هندسة

إقتباس

وبالنسبة للظروف فربنا هوا لوحدو اللي يقدر يخفف ويشيل عني
و هوا اللي قادر زي ما خلا النار برد وسلام على سيدنا ابراهيم

أكيد كل شئ بايد ربنا

لكن برضة الانسان لازم ياخد بالاسباب

و على فكرة انتى ممكن تحاولى تتكيفى مع الظروف اللى حصلت لك

و تقدرى انك تتفوقى و تنجحى و تتغلبى على الظروف دى

ياما ناس كان عندها اظروف اوحش بكتير من ظروفك و قدروا انهم يحققوا طموحهم

لأنهم مبخلوش على احلامهم باى مجهود و لانهم قربوا اوى من ربنا عشان يوفقهم

و بقولك برضة اوعى تنسى صلاة الاستخارة دى بجد هى اهم حاجة

اقرى قرآن كتير وادعى ربنا و بجد كل ما تقربى من ربنا هيقرب منك

و يهديكى للى فيه الخير

و لو احتجتى اى حاجة انا موجودة فى الخدمة

فى أمان الله